ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടചത്വാരിംശസ്സര്ഗഃ ।
ഏവം ബൃവംത്യാം സീതായാം സംരബ്ദഃ പരുഷം വചഃ ।
ലലാടേ ഭൃകുടീം കൃത്വാ രാവണഃ പ്രത്യുവാച ഹ ॥ 1 ॥
ഭ്രാതാ വൈശ്രവണസ്യാഹം സാപത്ന്യോ വരവര്ണിനി ।
രാവണോ നാമ ഭദ്രം തേ ദശഗ്രീവഃ പ്രതാപവാന് ॥ 2 ॥
യസ്യ ദേവാസ്സഗംധർവാഃ പിശാചപതഗോരഗാഃ ।
വിദ്രവംതി ഭയാദ്ഭീതാ മൃത്യോരിവ സദാ പ്രജാഃ ॥ 3 ॥
യേന വൈശ്രവണോ രാജാ ദ്വൈമാത്രഃ കാരണാംതരേ ।
ദ്വംദ്വമാസാദിതഃ ക്രോധാദ്രണേ വിക്രമ്യ നിര്ജിതഃ ॥ 4 ॥
യദ്ഭയാര്തഃ പരിത്യജ്യ സ്വമധിഷ്ഠാനമൃദ്ധിമത് ।
കൈലാസം പർവതശ്രേഷ്ഠമധ്യാസ്തേ നരവാഹനഃ ॥ 5 ॥
യസ്യ തത്പുഷ്പകം നാമ വിമാനം കാമഗം ശുഭമ് ।
വീര്യാദേവാര്ജിതം ഭദ്രേ യേന യാമി വിഹായസമ് ॥ 6 ॥
മമ സംജാതരോഷസ്യ മുഖം ദൃഷ്ട്വൈവ മൈഥിലി ।
വിദ്രവംതി പരിത്രസ്താസ്സുരാശ്ശക്രപുരോഗമാഃ ॥ 7 ॥
യത്ര തിഷ്ഠാമ്യഹം തത്ര മാരുതോ വാതി ശംകിതഃ ।
തീവ്രാംശുശ്ശിശിരാംശുശ്ച ഭയാത്സംപദ്യതേ രവിഃ ॥ 8 ॥
നിഷ്കംപപത്രാസ്തരവോ നദ്യശ്ച സ്തിമിതോദകാഃ ।
ഭവംതി യത്ര യത്രാഹം തിഷ്ഠാമി വിചരാമി ച ॥ 9 ॥
മമ പാരേ സമുദ്രസ്യ ലംകാ നാമ പുരീ ശുഭാ ।
സംപൂര്ണാ രാക്ഷസൈര്ഘോരൈര്യഥേംദ്രസ്യാമരാവതീ ॥ 10 ॥
പ്രാകാരേണ പരിക്ഷിപ്താ പാംഡുരേണ വിരാജതാ ।
ഹേമകക്ഷ്യാ പുരീ രമ്യാ വൈഢൂര്യമയതോരണാ ॥ 11 ॥
ഹസ്ത്യശ്വരഥസംബാധാ തൂര്യനാദവിനാദിതാ ।
സർവകാലഫലൈർവൃക്ഷൈസ്സംകുലോദ്ദ്യാനശോഭിതാ ॥ 12 ॥
തത്ര ത്വം വസതീ സീതേ രാജപുത്രി മയാ സഹ ।
ന സ്മരിഷ്യസി നാരീണാം മാനുഷീണാം മനസ്വിനി ॥ 13 ॥
ഭുംജാനാ മാനുഷാന്ഭോഗാംദിവ്യാംശ്ച വരവര്ണിനി ।
ന സ്മരിഷ്യസി രാമസ്യ മാനുഷസ്യ ഗതായുഷഃ ॥ 14 ॥
സ്ഥാപയിത്വാ പ്രിയം പുത്രം രാജ്ഞാ ദശരഥേന യഃ ।
മംദവീര്യസ്സുതോ ജ്യേഷ്ഠസ്തതഃ പ്രസ്ഥാപിതോ വനമ് ॥ 15 ॥
തേന കിം ഭ്രഷ്ടരാജ്യേന രാമേണ ഗതചേതസാ ।
കരിഷ്യസി വിശാലാക്ഷി താപസേന തപസ്വിനാ ॥ 16 ॥
സർവരാക്ഷസഭര്താരം കാമാത്സ്വയമിഹാഗതമ് ।
ന മന്മഥശരാവിഷ്ടം പ്രത്യാഖ്യാതും ത്വമര്ഹസി ॥ 17 ॥
പ്രത്യാഖ്യായ ഹി മാം ഭീരു പരിതാപം ഗമിഷ്യസി ।
ചരണേനാഭിഹത്യേവ പുരൂരവസമൂർവശീ ॥ 18 ॥
അംഗുല്യാ ന സമോ രാമോ മമ യുദ്ധേ സ മാനുഷഃ ।
തവ ഭാഗ്യേന സംപ്രാപ്തം ഭജസ്വ വരവര്ണിനി ॥ 19 ॥
ഏവമുക്താ തു വൈദേഹീ ക്രുദ്ധാ സംരക്തലോചനാ ।
അബ്രവീത്പരുഷം വാക്യം രഹിതേ രാക്ഷസാധിപമ് ॥ 20 ॥
കഥം വൈശ്രവണം ദേവം സർവഭൂതനമസ്കൃതമ് ।
ഭ്രാതരം വ്യപദിശ്യ ത്വമശുഭം കര്തുമിച്ഛസി ॥ 21 ॥
അവശ്യം വിനശിഷ്യംതി സർവേ രാവണ രാക്ഷസാഃ ।
യേഷാം ത്വം കര്കശോ രാജാ ദുര്ബുദ്ധിരജിതേംദ്രിയഃ ॥ 22 ॥
അപഹൃത്യ ശചീം ഭാര്യാം ശക്യമിംദ്രസ്യ ജീവിതുമ് ।
ന ച രാമസ്യ ഭാര്യാം മാമപനീയാസ്തി ജീവിതമ് ॥ 23 ॥
ജീവേച്ചിരം വജ്രധരസ്യ ഹസ്താച്ഛചീം പ്രധൃഷ്യാപ്രതിരൂപരൂപാമ് ।
ന മാദൃശീം രാക്ഷസ ദൂശയിത്വാ പീതാമൃതസ്യാപി തവാസ്തി മോക്ഷഃ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടചത്വാരിംശസ്സര്ഗഃ ॥
