శ్రీమద్వాల్మీకీయ రామాయణే అరణ్యకాండమ్ ।
అథ అష్టచత్వారింశస్సర్గః ।
ఏవం బృవంత్యాం సీతాయాం సంరబ్దః పరుషం వచః ।
లలాటే భృకుటీం కృత్వా రావణః ప్రత్యువాచ హ ॥ 1 ॥
భ్రాతా వైశ్రవణస్యాహం సాపత్న్యో వరవర్ణిని ।
రావణో నామ భద్రం తే దశగ్రీవః ప్రతాపవాన్ ॥ 2 ॥
యస్య దేవాస్సగంధర్వాః పిశాచపతగోరగాః ।
విద్రవంతి భయాద్భీతా మృత్యోరివ సదా ప్రజాః ॥ 3 ॥
యేన వైశ్రవణో రాజా ద్వైమాత్రః కారణాంతరే ।
ద్వంద్వమాసాదితః క్రోధాద్రణే విక్రమ్య నిర్జితః ॥ 4 ॥
యద్భయార్తః పరిత్యజ్య స్వమధిష్ఠానమృద్ధిమత్ ।
కైలాసం పర్వతశ్రేష్ఠమధ్యాస్తే నరవాహనః ॥ 5 ॥
యస్య తత్పుష్పకం నామ విమానం కామగం శుభమ్ ।
వీర్యాదేవార్జితం భద్రే యేన యామి విహాయసమ్ ॥ 6 ॥
మమ సంజాతరోషస్య ముఖం దృష్ట్వైవ మైథిలి ।
విద్రవంతి పరిత్రస్తాస్సురాశ్శక్రపురోగమాః ॥ 7 ॥
యత్ర తిష్ఠామ్యహం తత్ర మారుతో వాతి శంకితః ।
తీవ్రాంశుశ్శిశిరాంశుశ్చ భయాత్సంపద్యతే రవిః ॥ 8 ॥
నిష్కంపపత్రాస్తరవో నద్యశ్చ స్తిమితోదకాః ।
భవంతి యత్ర యత్రాహం తిష్ఠామి విచరామి చ ॥ 9 ॥
మమ పారే సముద్రస్య లంకా నామ పురీ శుభా ।
సంపూర్ణా రాక్షసైర్ఘోరైర్యథేంద్రస్యామరావతీ ॥ 10 ॥
ప్రాకారేణ పరిక్షిప్తా పాండురేణ విరాజతా ।
హేమకక్ష్యా పురీ రమ్యా వైఢూర్యమయతోరణా ॥ 11 ॥
హస్త్యశ్వరథసంబాధా తూర్యనాదవినాదితా ।
సర్వకాలఫలైర్వృక్షైస్సంకులోద్ద్యానశోభితా ॥ 12 ॥
తత్ర త్వం వసతీ సీతే రాజపుత్రి మయా సహ ।
న స్మరిష్యసి నారీణాం మానుషీణాం మనస్విని ॥ 13 ॥
భుంజానా మానుషాన్భోగాందివ్యాంశ్చ వరవర్ణిని ।
న స్మరిష్యసి రామస్య మానుషస్య గతాయుషః ॥ 14 ॥
స్థాపయిత్వా ప్రియం పుత్రం రాజ్ఞా దశరథేన యః ।
మందవీర్యస్సుతో జ్యేష్ఠస్తతః ప్రస్థాపితో వనమ్ ॥ 15 ॥
తేన కిం భ్రష్టరాజ్యేన రామేణ గతచేతసా ।
కరిష్యసి విశాలాక్షి తాపసేన తపస్వినా ॥ 16 ॥
సర్వరాక్షసభర్తారం కామాత్స్వయమిహాగతమ్ ।
న మన్మథశరావిష్టం ప్రత్యాఖ్యాతుం త్వమర్హసి ॥ 17 ॥
ప్రత్యాఖ్యాయ హి మాం భీరు పరితాపం గమిష్యసి ।
చరణేనాభిహత్యేవ పురూరవసమూర్వశీ ॥ 18 ॥
అంగుల్యా న సమో రామో మమ యుద్ధే స మానుషః ।
తవ భాగ్యేన సంప్రాప్తం భజస్వ వరవర్ణిని ॥ 19 ॥
ఏవముక్తా తు వైదేహీ క్రుద్ధా సంరక్తలోచనా ।
అబ్రవీత్పరుషం వాక్యం రహితే రాక్షసాధిపమ్ ॥ 20 ॥
కథం వైశ్రవణం దేవం సర్వభూతనమస్కృతమ్ ।
భ్రాతరం వ్యపదిశ్య త్వమశుభం కర్తుమిచ్ఛసి ॥ 21 ॥
అవశ్యం వినశిష్యంతి సర్వే రావణ రాక్షసాః ।
యేషాం త్వం కర్కశో రాజా దుర్బుద్ధిరజితేంద్రియః ॥ 22 ॥
అపహృత్య శచీం భార్యాం శక్యమింద్రస్య జీవితుమ్ ।
న చ రామస్య భార్యాం మామపనీయాస్తి జీవితమ్ ॥ 23 ॥
జీవేచ్చిరం వజ్రధరస్య హస్తాచ్ఛచీం ప్రధృష్యాప్రతిరూపరూపామ్ ।
న మాదృశీం రాక్షస దూశయిత్వా పీతామృతస్యాపి తవాస్తి మోక్షః ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే అష్టచత్వారింశస్సర్గః ॥
