ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଅଷ୍ଟଚତ୍ଵାରିଂଶସ୍ସର୍ଗଃ ।
ଏଵଂ ବୃଵଂତ୍ୟାଂ ସୀତାୟାଂ ସଂରବ୍ଦଃ ପରୁଷଂ ଵଚଃ ।
ଲଲାଟେ ଭୃକୁଟୀଂ କୃତ୍ଵା ରାଵଣଃ ପ୍ରତ୍ୟୁଵାଚ ହ ॥ 1 ॥
ଭ୍ରାତା ଵୈଶ୍ରଵଣସ୍ୟାହଂ ସାପତ୍ନ୍ୟୋ ଵରଵର୍ଣିନି ।
ରାଵଣୋ ନାମ ଭଦ୍ରଂ ତେ ଦଶଗ୍ରୀଵଃ ପ୍ରତାପଵାନ୍ ॥ 2 ॥
ୟସ୍ୟ ଦେଵାସ୍ସଗଂଧର୍ଵାଃ ପିଶାଚପତଗୋରଗାଃ ।
ଵିଦ୍ରଵଂତି ଭୟାଦ୍ଭୀତା ମୃତ୍ୟୋରିଵ ସଦା ପ୍ରଜାଃ ॥ 3 ॥
ୟେନ ଵୈଶ୍ରଵଣୋ ରାଜା ଦ୍ଵୈମାତ୍ରଃ କାରଣାଂତରେ ।
ଦ୍ଵଂଦ୍ଵମାସାଦିତଃ କ୍ରୋଧାଦ୍ରଣେ ଵିକ୍ରମ୍ୟ ନିର୍ଜିତଃ ॥ 4 ॥
ୟଦ୍ଭୟାର୍ତଃ ପରିତ୍ୟଜ୍ୟ ସ୍ଵମଧିଷ୍ଠାନମୃଦ୍ଧିମତ୍ ।
କୈଲାସଂ ପର୍ଵତଶ୍ରେଷ୍ଠମଧ୍ୟାସ୍ତେ ନରଵାହନଃ ॥ 5 ॥
ୟସ୍ୟ ତତ୍ପୁଷ୍ପକଂ ନାମ ଵିମାନଂ କାମଗଂ ଶୁଭମ୍ ।
ଵୀର୍ୟାଦେଵାର୍ଜିତଂ ଭଦ୍ରେ ୟେନ ୟାମି ଵିହାୟସମ୍ ॥ 6 ॥
ମମ ସଂଜାତରୋଷସ୍ୟ ମୁଖଂ ଦୃଷ୍ଟ୍ଵୈଵ ମୈଥିଲି ।
ଵିଦ୍ରଵଂତି ପରିତ୍ରସ୍ତାସ୍ସୁରାଶ୍ଶକ୍ରପୁରୋଗମାଃ ॥ 7 ॥
ୟତ୍ର ତିଷ୍ଠାମ୍ୟହଂ ତତ୍ର ମାରୁତୋ ଵାତି ଶଂକିତଃ ।
ତୀଵ୍ରାଂଶୁଶ୍ଶିଶିରାଂଶୁଶ୍ଚ ଭୟାତ୍ସଂପଦ୍ୟତେ ରଵିଃ ॥ 8 ॥
ନିଷ୍କଂପପତ୍ରାସ୍ତରଵୋ ନଦ୍ୟଶ୍ଚ ସ୍ତିମିତୋଦକାଃ ।
ଭଵଂତି ୟତ୍ର ୟତ୍ରାହଂ ତିଷ୍ଠାମି ଵିଚରାମି ଚ ॥ 9 ॥
ମମ ପାରେ ସମୁଦ୍ରସ୍ୟ ଲଂକା ନାମ ପୁରୀ ଶୁଭା ।
ସଂପୂର୍ଣା ରାକ୍ଷସୈର୍ଘୋରୈର୍ୟଥେଂଦ୍ରସ୍ୟାମରାଵତୀ ॥ 10 ॥
ପ୍ରାକାରେଣ ପରିକ୍ଷିପ୍ତା ପାଂଡୁରେଣ ଵିରାଜତା ।
ହେମକକ୍ଷ୍ୟା ପୁରୀ ରମ୍ୟା ଵୈଢୂର୍ୟମୟତୋରଣା ॥ 11 ॥
ହସ୍ତ୍ୟଶ୍ଵରଥସଂବାଧା ତୂର୍ୟନାଦଵିନାଦିତା ।
ସର୍ଵକାଲଫଲୈର୍ଵୃକ୍ଷୈସ୍ସଂକୁଲୋଦ୍ଦ୍ୟାନଶୋଭିତା ॥ 12 ॥
ତତ୍ର ତ୍ଵଂ ଵସତୀ ସୀତେ ରାଜପୁତ୍ରି ମୟା ସହ ।
ନ ସ୍ମରିଷ୍ୟସି ନାରୀଣାଂ ମାନୁଷୀଣାଂ ମନସ୍ଵିନି ॥ 13 ॥
ଭୁଂଜାନା ମାନୁଷାନ୍ଭୋଗାଂଦିଵ୍ୟାଂଶ୍ଚ ଵରଵର୍ଣିନି ।
ନ ସ୍ମରିଷ୍ୟସି ରାମସ୍ୟ ମାନୁଷସ୍ୟ ଗତାୟୁଷଃ ॥ 14 ॥
ସ୍ଥାପୟିତ୍ଵା ପ୍ରିୟଂ ପୁତ୍ରଂ ରାଜ୍ଞା ଦଶରଥେନ ୟଃ ।
ମଂଦଵୀର୍ୟସ୍ସୁତୋ ଜ୍ୟେଷ୍ଠସ୍ତତଃ ପ୍ରସ୍ଥାପିତୋ ଵନମ୍ ॥ 15 ॥
ତେନ କିଂ ଭ୍ରଷ୍ଟରାଜ୍ୟେନ ରାମେଣ ଗତଚେତସା ।
କରିଷ୍ୟସି ଵିଶାଲାକ୍ଷି ତାପସେନ ତପସ୍ଵିନା ॥ 16 ॥
ସର୍ଵରାକ୍ଷସଭର୍ତାରଂ କାମାତ୍ସ୍ଵୟମିହାଗତମ୍ ।
ନ ମନ୍ମଥଶରାଵିଷ୍ଟଂ ପ୍ରତ୍ୟାଖ୍ୟାତୁଂ ତ୍ଵମର୍ହସି ॥ 17 ॥
ପ୍ରତ୍ୟାଖ୍ୟାୟ ହି ମାଂ ଭୀରୁ ପରିତାପଂ ଗମିଷ୍ୟସି ।
ଚରଣେନାଭିହତ୍ୟେଵ ପୁରୂରଵସମୂର୍ଵଶୀ ॥ 18 ॥
ଅଂଗୁଲ୍ୟା ନ ସମୋ ରାମୋ ମମ ୟୁଦ୍ଧେ ସ ମାନୁଷଃ ।
ତଵ ଭାଗ୍ୟେନ ସଂପ୍ରାପ୍ତଂ ଭଜସ୍ଵ ଵରଵର୍ଣିନି ॥ 19 ॥
ଏଵମୁକ୍ତା ତୁ ଵୈଦେହୀ କ୍ରୁଦ୍ଧା ସଂରକ୍ତଲୋଚନା ।
ଅବ୍ରଵୀତ୍ପରୁଷଂ ଵାକ୍ୟଂ ରହିତେ ରାକ୍ଷସାଧିପମ୍ ॥ 20 ॥
କଥଂ ଵୈଶ୍ରଵଣଂ ଦେଵଂ ସର୍ଵଭୂତନମସ୍କୃତମ୍ ।
ଭ୍ରାତରଂ ଵ୍ୟପଦିଶ୍ୟ ତ୍ଵମଶୁଭଂ କର୍ତୁମିଚ୍ଛସି ॥ 21 ॥
ଅଵଶ୍ୟଂ ଵିନଶିଷ୍ୟଂତି ସର୍ଵେ ରାଵଣ ରାକ୍ଷସାଃ ।
ୟେଷାଂ ତ୍ଵଂ କର୍କଶୋ ରାଜା ଦୁର୍ବୁଦ୍ଧିରଜିତେଂଦ୍ରିୟଃ ॥ 22 ॥
ଅପହୃତ୍ୟ ଶଚୀଂ ଭାର୍ୟାଂ ଶକ୍ୟମିଂଦ୍ରସ୍ୟ ଜୀଵିତୁମ୍ ।
ନ ଚ ରାମସ୍ୟ ଭାର୍ୟାଂ ମାମପନୀୟାସ୍ତି ଜୀଵିତମ୍ ॥ 23 ॥
ଜୀଵେଚ୍ଚିରଂ ଵଜ୍ରଧରସ୍ୟ ହସ୍ତାଚ୍ଛଚୀଂ ପ୍ରଧୃଷ୍ୟାପ୍ରତିରୂପରୂପାମ୍ ।
ନ ମାଦୃଶୀଂ ରାକ୍ଷସ ଦୂଶୟିତ୍ଵା ପୀତାମୃତସ୍ୟାପି ତଵାସ୍ତି ମୋକ୍ଷଃ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଅଷ୍ଟଚତ୍ଵାରିଂଶସ୍ସର୍ଗଃ ॥
