ශ්රීමද්වාල්මීකීය රාමායණේ අරණ්යකාංඩම් ।
අථ ද්විපංචාශස්සර්ගඃ ।
සා තු තාරාධිපමුඛී රාවණේන සමීක්ෂ්ය තම් ।
ගෘධ්රරාජං විනිහතං විලලාප සුදුඃඛිතා ॥ 1 ॥
නිමිත්තං ලක්ෂණජ්ඤානං ශකුනිස්වරදර්ශනම් ।
අවශ්යං සුඛදුඃඛේෂු නරාණාං ප්රතිදෘශ්යතේ ॥ 2 ॥
නූනං රාම න ජානාසි මහද්ව්යසනමාත්මනඃ ।
ධාවංති නූනං කාකුත්ස්ථං මදර්ථං මෘගපක්ෂිණඃ ॥ 3 ॥
අයං හි පාපචාරේණ මාං ත්රාතුමභිසංගතඃ ।
ශේතේ විනිහතෝ භූමෞ මමාභාග්යාද්විහංගමඃ ॥ 4 ॥
ත්රාහි මාමද්ය කාකුත්ස්ථ ලක්ෂ්මණේති වරාංගනා ।
සුසංත්රස්තා සමාක්රංදච්ඡෘණ්වතාං තු යථාංතිකේ ॥ 5 ॥
තාං ක්ලිෂ්ටමාල්යාභරණාං විලපංතීමනාථවත් ।
අභ්යධාවත් වෛදේහීං රාවණෝ රාක්ෂසාධිපඃ ॥ 6 ॥
තාං ලතාමිව වේෂ්ටංතීමාලිංගංතීං මහාද්රුමාන් ।
මුංච මුංචේති බහුශඃ ප්රවදන්රාක්ෂසාධිපඃ ॥ 7 ॥
ක්රෝශංතීං රාම රාමේති රාමේණ රහිතාං වනේ ।
ජීවිතාංතාය කේශේෂු ජග්රාහාංතකසන්නිභඃ ॥ 8 ॥
ප්රධර්ෂිතායාං සීතායාං බභූව සචරාචරම් ।
ජගත්සර්වමමර්යාදං තමසාංධේන සංවෘතම් ॥ 9 ॥
න වාති මාරුතස්තත්ර නිෂ්ප්රභෝऽභූද්දිවාකරඃ ।
දෘෂ්ට්වා සීතාං පරාමෘෂ්ටාං දීනාං දිව්යේන චක්ෂුෂා ॥ 10 ॥
කෘතං කාර්යමිති ශ්රීමාන්ව්යාජහාර පිතාමහඃ ।
ප්රහෘෂ්ටා ව්යථිතාශ්චාසන්සර්වේ තේ පරමර්ෂයඃ ॥ 11 ॥
දෘෂ්ට්වා සීතාං පරාමෘෂ්ටාං දංඩකාරණ්යවාසිනඃ ।
රාවණස්ය විනාශං ච ප්රාප්තං බුද්ධ්වා යදෘච්ඡයා ॥ 12 ॥
ස තු තාං රාම රාමේති රුදංතීං ලක්ෂ්මණේති ච ।
ජගාමාදාය චාකාශං රාවණෝ රාක්ෂසාධිපඃ ॥ 13 ॥
තප්තාභරණජුෂ්ටාංගී පීතකෞශේයවාසිනී ।
රරාජරාජපුත්රී තුවිද්යුත්සෞදාමිනී යථා ॥ 14 ॥
උද්ධූතේන ච වස්ත්රේණ තස්යාඃ පීතේන රාවණඃ ।
අධිකං පරිබභ්රාජ ගිරිර්දීප්ත ඉවාග්නිනා ॥ 15 ॥
තස්යාඃ පරමකල්යාණ්යාස්තාම්රාණි සුරභීණි ච ।
පද්මපත්රාණි වෛදේහ්යා අභ්යකීර්යංත රාවණම් ॥ 16 ॥
තස්යාඃ කෞශේයමුද්ධූතමාකාශේ කනකප්රභම් ।
බභෞ චාදිත්යරාගේණ තාම්රමභ්රමිවාතපේ ॥ 17 ॥
තස්යාස්තත්සුනසං වක්ත්රමාකාශේ රාවණාංකගම් ।
න රරාජ විනා රාමං විනාලමිව පංකජම් ॥ 18 ॥
බභූව ජලදං නීලං භිත්ත්වා චංද්ර ඉවෝදිතඃ ।
සුලලාටං සුකේශාංතං පද්මගර්භාභමව්රණම් ॥ 19 ॥
ශුක්ලෛස්සුවිමලෛර්දංතෛ ප්රභාවද්භිරලංකෘතම් ।
තස්යාස්තද්විමලං වක්ත්රමාකාශේ රාවණාංකගම් ॥ 20 ॥
රුදිතං ව්යපමෘෂ්ටාස්රං චංද්රවත්ප්රියදර්ශනම් ।
සුනාසං චාරුතාම්රෝෂ්ඨමාකාශේ හාටකප්රභම් ॥ 21 ॥
රාක්ෂසේන සමාධූතං තස්යාස්තද්වදනං ශුභම් ।
ශුශුභේ න විනා රාමංදිවා චංද්ර ඉවෝදිතඃ ॥ 22 ॥
සා හේමවර්ණා නීලාංගං මෛථිලී රාක්ෂසාධිපම් ।
ශුශුභේ කාංචනී කාංචී නීලං මණිමිවාශ්රිතා ॥ 23 ॥
සා පද්මගෞරී හේමාභා රාවණං ජනකාත්මජා ।
විද්යුද්ඝනමිවාවිශ්ය ශුශුභේ තප්තභූෂණා ॥ 24 ॥
තස්යා භූෂණඝෝෂේණ වෛදේහ්යා රාක්ෂසාධිපඃ ।
බභෞ සචපලෝ නීලස්සඝෝෂ ඉව තෝයදඃ ॥ 25 ॥
උත්තමාංගාච්ච්යුතා තස්යාඃ පුෂ්පවෘෂ්ටිස්සමංතතඃ ।
සීතායා හ්රිමමාණායාඃ පපාත ධරණීතලේ ॥ 26 ॥
සා තු රාවණවේගේන පුෂ්පවෘෂ්ටිඃ සමංතතඃ ।
සමාධූතා දශග්රීවං පුනරේවාභ්යවර්තත ॥ 27 ॥
අභ්යවර්තත පුෂ්පාණාං ධාරා වෛශ්රවණානුජම් ।
නක්ෂත්රමාලා විමලා මේරුං නගමිවෝන්නතම් ॥ 28 ॥
චරණාන්නූපුරං භ්රෂ්ටං වෛදේහ්යා රත්නභූෂිතම් ।
විද්යුන්මංඩලසංකාශං පපාත මධුරස්වනම් ॥ 29 ॥
තරුප්රවාලරක්තා සා නීලාංගං රාක්ෂසේශ්වරම් ।
ප්රාශෝභයත වෛදේහී ගජං කක්ෂ්යේව කාංචනී ॥ 30 ॥
තාං මහෝල්කාමිවාකාශේ දීප්යමානාං ස්වතේජසා ।
ජහාරාऽකාශමාවිස්ය සීතාං වෛශ්රවණානුජඃ ॥ 31 ॥
තස්යාස්තාන්යග්නිවර්ණානි භූෂණානි මහීතලේ ।
සඝෝෂාණ්යවකීර්යංත ක්ෂීණාස්තාරා ඉවාංබරාත් ॥ 32 ॥
තස්යාස්ස්තනාංතරාද්භ්රෂ්ටෝ හාරස්තාරාධිපද්යුතිඃ ।
වෛදේහ්යා නිපතන්භාති ගංගේව ගගනාච්ච්යුතා ॥ 33 ॥
උත්පාතවාතාභිහතා නානාද්විජගණායුතාඃ ।
මාභෛරිති විධූතාග්රා ව්යාජහ්රුරිව පාදපාඃ ॥ 34 ॥
නලින්යෝ ධ්වස්තකමලාස්ත්රස්තමීනජලේචරාඃ ।
සඛීමිව ගතෝච්ඡ්වාසාමන්වශෝචංත මෛථිලීම් ॥ 35 ॥
සමංතාදභිසංපත්ය සිංහව්යාඝ්රමෘගද්විජාඃ ।
අන්වධාවංස්තදා රෝෂාත්සීතාං ඡායානුගාමිනඃ ॥ 36 ॥
ජලප්රපාතාස්රමුඛාශ්ශෘංගෛරුච්ඡ්රිතබාහුභිඃ ।
සීතායාං හ්රියමාණායාං වික්රෝශංතීව පර්වතාඃ ॥ 37 ॥
හ්රියමාණාං තු වෛදේහීං දෘෂ්ට්වා දීනෝ දිවාකරඃ ।
ප්රතිධ්වස්තප්රභශ්ශ්රීමානාසීත්පාංඩරමංඩලඃ ॥ 38 ॥
නාස්ති ධර්මඃ කුතස්සත්යං නාර්ජවං නානෘශංසතා ।
යත්ර රාමස්ය වෛදේහීං භාර්යාං හරති රාවණඃ ॥ 39 ॥
ඉති සර්වාණි භූතානි ගණශඃ පර්යදේවයන් ।
විත්රස්තකා දීනමුඛා රුරුදුර්මෘගපෝතකාඃ ॥ 40 ॥
උද්වීක්ෂ්යෝද්වීක්ෂ්ය නයනෛරස්රපාතාවිලේක්ෂණාඃ ।
සුප්රවේපිතගාත්රාශ්ච බභූවුර්වනදේවතාඃ ॥ 41 ॥
වික්රෝශංතීං දෘඪං සීතාං දෘෂ්ට්වා දුඃඛං තථා ගතාම් ।
තාං තු ලක්ෂ්මණ රාමේති ක්රෝශංතීං මධුරස්වරම් ॥ 42 ॥
අවේක්ෂමාණාං බහුශෝ වෛදේහීං ධරණීතලම් ।
ස තාමාකුලකේශාංතාං විප්රමෘෂ්ටවිශේෂකාම් ॥ 43 ॥
ජහාරාත්ම විනාශාය දශග්රීවෝ මනස්ස්විනීම් ।
තතස්තු සා චාරුදතී ශුචිස්මිතා විනාකෘතා බංධුජනේන මෛථිලී ।
අපශ්යතී රාඝවලක්ෂ්මණාවුභෞ විවර්ණවක්ත්රාභයභාරපීඩිතා ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්විපංචාශස්සර්ගඃ ॥
