শ্রীমদ্বাল্মীকীয় রামাযণে অরণ্যকাংডম্ ।
অথ দ্বিপংচাশস্সর্গঃ ।
সা তু তারাধিপমুখী রাবণেন সমীক্ষ্য় তম্ ।
গৃধ্ররাজং বিনিহতং বিললাপ সুদুঃখিতা ॥ 1 ॥
নিমিত্তং লক্ষণজ্ঞানং শকুনিস্বরদর্শনম্ ।
অবশ্য়ং সুখদুঃখেষু নরাণাং প্রতিদৃশ্যতে ॥ 2 ॥
নূনং রাম ন জানাসি মহদ্ব্যসনমাত্মনঃ ।
ধাবংতি নূনং কাকুত্স্থং মদর্থং মৃগপক্ষিণঃ ॥ 3 ॥
অয়ং হি পাপচারেণ মাং ত্রাতুমভিসংগতঃ ।
শেতে বিনিহতো ভূমৌ মমাভাগ্য়াদ্বিহংগমঃ ॥ 4 ॥
ত্রাহি মামদ্য় কাকুত্স্থ লক্ষ্মণেতি বরাংগনা ।
সুসংত্রস্তা সমাক্রংদচ্ছৃণ্বতাং তু যথাংতিকে ॥ 5 ॥
তাং ক্লিষ্টমাল্য়াভরণাং বিলপংতীমনাথবত্ ।
অভ্যধাবত্ বৈদেহীং রাবণো রাক্ষসাধিপঃ ॥ 6 ॥
তাং লতামিব বেষ্টংতীমালিংগংতীং মহাদ্রুমান্ ।
মুংচ মুংচেতি বহুশঃ প্রবদন্রাক্ষসাধিপঃ ॥ 7 ॥
ক্রোশংতীং রাম রামেতি রামেণ রহিতাং বনে ।
জীবিতাংতায় কেশেষু জগ্রাহাংতকসন্নিভঃ ॥ 8 ॥
প্রধর্ষিতায়াং সীতায়াং বভূব সচরাচরম্ ।
জগত্সর্বমমর্য়াদং তমসাংধেন সংবৃতম্ ॥ 9 ॥
ন বাতি মারুতস্তত্র নিষ্প্রভোঽভূদ্দিবাকরঃ ।
দৃষ্ট্বা সীতাং পরামৃষ্টাং দীনাং দিব্য়েন চক্ষুষা ॥ 10 ॥
কৃতং কার্যমিতি শ্রীমান্ব্য়াজহার পিতামহঃ ।
প্রহৃষ্টা ব্যথিতাশ্চাসন্সর্বে তে পরমর্ষয়ঃ ॥ 11 ॥
দৃষ্ট্বা সীতাং পরামৃষ্টাং দংডকারণ্যবাসিনঃ ।
রাবণস্য় বিনাশং চ প্রাপ্তং বুদ্ধ্বা যদৃচ্ছয়া ॥ 12 ॥
স তু তাং রাম রামেতি রুদংতীং লক্ষ্মণেতি চ ।
জগামাদায় চাকাশং রাবণো রাক্ষসাধিপঃ ॥ 13 ॥
তপ্তাভরণজুষ্টাংগী পীতকৌশেযবাসিনী ।
ররাজরাজপুত্রী তুবিদ্য়ুত্সৌদামিনী যথা ॥ 14 ॥
উদ্ধূতেন চ বস্ত্রেণ তস্য়াঃ পীতেন রাবণঃ ।
অধিকং পরিবভ্রাজ গিরির্দীপ্ত ইবাগ্নিনা ॥ 15 ॥
তস্য়াঃ পরমকল্য়াণ্য়াস্তাম্রাণি সুরভীণি চ ।
পদ্মপত্রাণি বৈদেহ্য়া অভ্যকীর্য়ংত রাবণম্ ॥ 16 ॥
তস্য়াঃ কৌশেযমুদ্ধূতমাকাশে কনকপ্রভম্ ।
বভৌ চাদিত্যরাগেণ তাম্রমভ্রমিবাতপে ॥ 17 ॥
তস্য়াস্তত্সুনসং বক্ত্রমাকাশে রাবণাংকগম্ ।
ন ররাজ বিনা রামং বিনালমিব পংকজম্ ॥ 18 ॥
বভূব জলদং নীলং ভিত্ত্বা চংদ্র ইবোদিতঃ ।
সুললাটং সুকেশাংতং পদ্মগর্ভাভমব্রণম্ ॥ 19 ॥
শুক্লৈস্সুবিমলৈর্দংতৈ প্রভাবদ্ভিরলংকৃতম্ ।
তস্য়াস্তদ্বিমলং বক্ত্রমাকাশে রাবণাংকগম্ ॥ 20 ॥
রুদিতং ব্যপমৃষ্টাস্রং চংদ্রবত্প্রিযদর্শনম্ ।
সুনাসং চারুতাম্রোষ্ঠমাকাশে হাটকপ্রভম্ ॥ 21 ॥
রাক্ষসেন সমাধূতং তস্য়াস্তদ্বদনং শুভম্ ।
শুশুভে ন বিনা রামংদিবা চংদ্র ইবোদিতঃ ॥ 22 ॥
সা হেমবর্ণা নীলাংগং মৈথিলী রাক্ষসাধিপম্ ।
শুশুভে কাংচনী কাংচী নীলং মণিমিবাশ্রিতা ॥ 23 ॥
সা পদ্মগৌরী হেমাভা রাবণং জনকাত্মজা ।
বিদ্য়ুদ্ঘনমিবাবিশ্য় শুশুভে তপ্তভূষণা ॥ 24 ॥
তস্য়া ভূষণঘোষেণ বৈদেহ্য়া রাক্ষসাধিপঃ ।
বভৌ সচপলো নীলস্সঘোষ ইব তোযদঃ ॥ 25 ॥
উত্তমাংগাচ্চ্য়ুতা তস্য়াঃ পুষ্পবৃষ্টিস্সমংততঃ ।
সীতায়া হ্রিমমাণায়াঃ পপাত ধরণীতলে ॥ 26 ॥
সা তু রাবণবেগেন পুষ্পবৃষ্টিঃ সমংততঃ ।
সমাধূতা দশগ্রীবং পুনরেবাভ্যবর্তত ॥ 27 ॥
অভ্যবর্তত পুষ্পাণাং ধারা বৈশ্রবণানুজম্ ।
নক্ষত্রমালা বিমলা মেরুং নগমিবোন্নতম্ ॥ 28 ॥
চরণান্নূপুরং ভ্রষ্টং বৈদেহ্য়া রত্নভূষিতম্ ।
বিদ্য়ুন্মংডলসংকাশং পপাত মধুরস্বনম্ ॥ 29 ॥
তরুপ্রবালরক্তা সা নীলাংগং রাক্ষসেশ্বরম্ ।
প্রাশোভযত বৈদেহী গজং কক্ষ্য়েব কাংচনী ॥ 30 ॥
তাং মহোল্কামিবাকাশে দীপ্যমানাং স্বতেজসা ।
জহারাঽকাশমাবিস্য় সীতাং বৈশ্রবণানুজঃ ॥ 31 ॥
তস্য়াস্তান্যগ্নিবর্ণানি ভূষণানি মহীতলে ।
সঘোষাণ্যবকীর্য়ংত ক্ষীণাস্তারা ইবাংবরাত্ ॥ 32 ॥
তস্য়াস্স্তনাংতরাদ্ভ্রষ্টো হারস্তারাধিপদ্য়ুতিঃ ।
বৈদেহ্য়া নিপতন্ভাতি গংগেব গগনাচ্চ্য়ুতা ॥ 33 ॥
উত্পাতবাতাভিহতা নানাদ্বিজগণায়ুতাঃ ।
মাভৈরিতি বিধূতাগ্রা ব্য়াজহ্রুরিব পাদপাঃ ॥ 34 ॥
নলিন্য়ো ধ্বস্তকমলাস্ত্রস্তমীনজলেচরাঃ ।
সখীমিব গতোচ্ছ্বাসামন্বশোচংত মৈথিলীম্ ॥ 35 ॥
সমংতাদভিসংপত্য় সিংহব্য়াঘ্রমৃগদ্বিজাঃ ।
অন্বধাবংস্তদা রোষাত্সীতাং ছায়ানুগামিনঃ ॥ 36 ॥
জলপ্রপাতাস্রমুখাশ্শৃংগৈরুচ্ছ্রিতবাহুভিঃ ।
সীতায়াং হ্রিযমাণায়াং বিক্রোশংতীব পর্বতাঃ ॥ 37 ॥
হ্রিযমাণাং তু বৈদেহীং দৃষ্ট্বা দীনো দিবাকরঃ ।
প্রতিধ্বস্তপ্রভশ্শ্রীমানাসীত্পাংডরমংডলঃ ॥ 38 ॥
নাস্তি ধর্মঃ কুতস্সত্য়ং নার্জবং নানৃশংসতা ।
যত্র রামস্য় বৈদেহীং ভার্য়াং হরতি রাবণঃ ॥ 39 ॥
ইতি সর্বাণি ভূতানি গণশঃ পর্যদেবযন্ ।
বিত্রস্তকা দীনমুখা রুরুদুর্মৃগপোতকাঃ ॥ 40 ॥
উদ্বীক্ষ্য়োদ্বীক্ষ্য় নযনৈরস্রপাতাবিলেক্ষণাঃ ।
সুপ্রবেপিতগাত্রাশ্চ বভূবুর্বনদেবতাঃ ॥ 41 ॥
বিক্রোশংতীং দৃঢং সীতাং দৃষ্ট্বা দুঃখং তথা গতাম্ ।
তাং তু লক্ষ্মণ রামেতি ক্রোশংতীং মধুরস্বরম্ ॥ 42 ॥
অবেক্ষমাণাং বহুশো বৈদেহীং ধরণীতলম্ ।
স তামাকুলকেশাংতাং বিপ্রমৃষ্টবিশেষকাম্ ॥ 43 ॥
জহারাত্ম বিনাশায় দশগ্রীবো মনস্স্বিনীম্ ।
ততস্তু সা চারুদতী শুচিস্মিতা বিনাকৃতা বংধুজনেন মৈথিলী ।
অপশ্যতী রাঘবলক্ষ্মণাবুভৌ বিবর্ণবক্ত্রাভযভারপীডিতা ॥ 44 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে দ্বিপংচাশস্সর্গঃ ॥
