ශ්රීමද්වාල්මීකීය රාමායණේ අරණ්යකාංඩම් ।
අථ ත්රිපංචාශස්සර්ගඃ ।
ඛමුත්පතංතං තං දෘෂ්ට්වා මෛථිලී ජනකාත්මජා ।
දුඃඛිතා පරමෝද්විග්නා භයේ මහති වර්තිනී ॥ 1 ॥
රෝෂරෝදනතාම්රාක්ෂී භීමාක්ෂං රාක්ෂසාධිපම් ।
රුදංතී කරුණං සීතා හ්රියමාණේදමබ්රවීත් ॥ 2 ॥
න ව්යපත්රපසේ නීච කර්මණානේන රාවණ ।
ජ්ඤාත්වා විරහිතාං යන්මාං චෝරයිත්වා පලායසේ ॥ 3 ॥
ත්වයෛව නූනං දුෂ්ටාත්මන් භීරුණා හර්තුමිච්ඡතා ।
මමාපවාහිතෝ භර්තා මෘගරූපේණ මායයා ॥ 4 ॥
යෝ හි මාමුද්යතස්ත්රාතුං සෝऽප්යයං විනිපාතිතඃ ।
ගෘධ්රරාජඃ පුරාණෝऽසෞ ශ්වශුරස්ය සඛා මම ॥ 5 ॥
පරමං ඛලු තේ වීර්යං දෘශ්යතේ රාක්ෂසාධම ।
විශ්රාව්ය නාමධේයං හි යුද්ධේ නාස්මි ජිතා ත්වයා ॥ 6 ॥
ඊදෘශං ගර්හිතං කර්ම කථං කෘත්වා න ලජ්ජසේ ।
ස්ත්රියාශ්ච හරණං නීච රහිතේ ච පරස්ය ච ॥ 7 ॥
කථයිෂ්යංති ලෝකේෂු පුරුෂාඃ කර්ම කුත්සිතම් ।
සුනෘශංසමධර්මිෂ්ඨං තව ශෞංඩීර්යමානිනඃ ॥ 8 ॥
ධික්තේ ශෞර්යං ච සත්ත්වං ච යත්ත්වං කථිතවාංස්තදා ।
කුලාක්රෝශකරං ලෝකේ ධික්තේ චාරිත්රමීදෘශම් ॥ 9 ॥
කිං කර්තුං ශක්යමේවං හි යජ්ජවේනෛව ධාවසි ।
මුහූර්තමපි තිෂ්ඨස්ව න ජීවන්ප්රතියාස්යසි ॥ 10 ॥
න හි චක්ෂුෂ්පථං ප්රාප්ය තයෝඃ පාර්ථිවපුත්රයෝඃ ।
සසෛන්යෝऽපි සමර්ථස්ත්වං මුහූර්තමපි ජීවිතුම් ॥ 11 ॥
න ත්වං තයෝශ්ශරස්පර්ශං සෝඪුං ශක්තඃ කථංචන ।
වනේ ප්රජ්වලිතස්යේව ස්පර්ශමග්නේර්විහංගමඃ ॥ 12 ॥
සාධු කුර්වාऽऽත්මනඃ පථ්යං සාධු මාං මුංච රාවණ ।
මත්ප්රධර්ෂණරුෂ්ටෝ හි භ්රාත්රා සහ පතිර්මම ॥ 13 ॥
විධාස්යති විනාශාය ත්වං මාං යදි න මුංචසි ।
යේන ත්වං ව්යවසායේන බලාන්මාං හර්තුමිච්ඡසි ॥ 14 ॥
ව්යවසායස්ස තේ නීච භවිෂ්යති නිරර්ථකඃ ।
න හ්යහං තමපශ්යංතී භර්තාරං විබුධෝපමම් ॥ 15 ॥
උත්සහේ ශත්රුවශගා ප්රාණාංධාරයිතුං චිරම් ।
න නූනං චාත්මනඃ පථ්යං ශ්රේයෝ වා සමවේක්ෂසේ ॥ 16 ॥
මෘත්යුකාලේ යථා මර්ත්යෝ විපරීතානි සේවතේ ।
මුමූර්ෂූණාං හි සර්වේෂාං යත්පථ්යං තන්න රෝචතේ ॥ 17 ॥
පශ්යාම්යද්ය හි කංඨේත්වාං කාලපාශාවපාශිතම් ।
යථා චාස්මින්භයස්ථානේ න බිභේෂි දශානන ॥ 18 ॥
ව්යක්තං හිරණ්මයාන් හි ත්වං සංපශ්යසි මහීරුහාන් ।
නදීං වෛතරණීං ඝෝරාං රුධිරෞඝනිවාහිනීම් ॥ 19 ॥
අසිපත්රවනං චෛව භීමං පශ්යසි රාවණ ।
තප්තකාංචනපුෂ්පාං ච වෛඩූර්යප්රවරච්ඡදාම් ॥ 20 ॥
ද්රක්ෂ්යසේ ශාල්මලීං තීක්ෂ්ණාමායසෛඃ කංටකෛශ්චිතාම් ।
න හි ත්වමීදෘශං කෘත්වා තස්යාලීකං මහාත්මනඃ ॥ 21 ॥
ධරිතුං ශක්ෂ්යසි චිරං විෂං පීත්වේව නිර්ඝෘණඃ ।
බද්ධස්ත්වං කාලපාශේන දුර්නිවාරේණ රාවණ ॥ 22 ॥
ක්වගතෝ ලප්ස්යසේ ශර්ම භර්තුර්මම මහාත්මනඃ ।
නිමේෂාංතරමාත්රේණ විනා භ්රාත්රා මහාවනේ ॥ 23 ॥
රාක්ෂසා නිහතා යේන සහස්රාණි චතුර්දශ ।
ස කථං රාඝවෝ වීරස්සර්වාස්ත්රකුශලෝ බලී ॥ 24 ॥
න ත්වාං හන්යාච්ඡරෛස්තීක්ෂ්ණෛරිෂ්ටභාර්යාපහාරිණම් ।
තච්චාන්යච්ච පරුෂං වෛදේහී රාවණාංකගා ॥ 25 ॥
භයශෝකසමාවිෂ්ටා කරුණං විලලාප හ ।
තථා භෘශාර්තාං බහුචෛව භාෂිණීං විලාපපූර්වං කරුණං ච භාමිනීම් ।
ජහාර පාපඃ කරුණං විචේෂ්ටතීං නෘපාත්මජාමාගතගාත්රවේපථුම් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ත්රිපංචාශස්සර්ගඃ ॥
