ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටපංචාශස්සර්ගඃ ।
ස දෘෂ්ට්වා ලක්ෂ්මණං දීනං ශූන්යේ දශරථාත්මජඃ ।
පර්යපෘච්ඡත ධර්මාත්මා වෛදේහීමාගතං විනා ॥ 1 ॥
ප්රස්ථිතං දංඩකාරණ්යං යා මාමනුජගාම හ ।
ක්ව සා ලක්ෂ්මණ වෛදේහී යාං හිත්වා ත්වමිහාගතඃ ॥ 2 ॥
රාජ්යභ්රෂ්ටස්ය දීනස්ය දංඩකාන්පරිධාවතඃ ।
ක්ව සා දුඃඛසහායා මේ වෛදේහී තනුමධ්යමා ॥ 3 ॥
යාං විනා නෝත්සහේ වීර මුහූර්තමපි ජීවිතුම් ।
ක්ව සා ප්රාණසහායා මේ සීතා සුරසුතෝපමා ॥ 4 ॥
පතිත්වමමරාණාං වා පෘථිව්යාශ්චාපි ලක්ෂ්මණ ।
තාං විනා තපනීයාභාං නේච්ඡේයං ජනකාත්මජාම් ॥ 5 ॥
කච්චිජ්ජීවති වෛදේහි ප්රාණෛඃ ප්රියතරා මම ।
කච්චිත්ප්රව්රාජනං සෞම්ය න මේ මිථ්යා භවිෂ්යති ॥ 6 ॥
සීතානිමිත්තං සෞමිත්රේ මෘතේ මයි ගතේ ත්වයි ।
කච්චිත්සකාමා සුඛිතා කෛකේයී සා භවිෂ්යති ॥ 7 ॥
සපුත්රරාජ්යාං සිද්ධාර්ථාං මෘතපුත්රා තපස්විනී ।
උපස්ථාස්යතිකෞසල්යා කච්චිත්සෞම්ය න කේකයීම් ॥ 8 ॥
යදි ජීවති වෛදේහී ගමිෂ්යාම්යාශ්රමං පුනඃ ।
සුවෘත්තා යදි වෘත්තා ප්රාණාංස්ත්යක්ෂ්යාමි ලක්ෂ්මණ ॥ 9 ॥
යදි මාමාශ්රමගතං වෛදේහී නාභිභාෂතේ ।
පුනඃ ප්රහසිතා සීතා විනශිෂ්යාමි ලක්ෂ්මණ ॥ 10 ॥
බ්රූහි ලක්ෂ්මණ වෛදේහී යදි ජීවති වා න වා ।
ත්වයි ප්රමත්තේ රක්ෂෝභිර්භක්ෂිතා වා තපස්විනී ॥ 11 ॥
සුකුමාරී ච බාලා ච නිත්යං චාදුඃඛදර්ශිනී ।
මද්වියෝගේන වෛදේහී ව්යක්තං ශෝචති දුර්මනාඃ ॥ 12 ॥
සර්වදා රක්ෂසා තේන ජිහ්මේන සුදුරාත්මනා ।
වදතා ලක්ෂ්මණේත්යුච්චෛස්තවාපි ජනිතං භයම් ॥ 13 ॥
ශ්රුතස්තු ශංකේ වෛදේහ්යා ස ස්වරස්සදෘශෝ මම ।
ත්රස්තයා ප්රේෂිතස්ත්වං ච ද්රෂ්ටුං මාං ශීඝ්රමාගතඃ ॥ 14 ॥
සර්වථා තු කෘතං කෂ්ටං සීතාමුත්සෘජතා වනේ ।
ප්රතිකර්තුං නෘශංසානාං රක්ෂසාං දත්තමංතරම් ॥ 15 ॥
දුඃඛිතාඃ ඛරඝාතේන රාක්ෂසාඃ පිශිතාශනාඃ ।
තෛස්සීතා නිහතා ඝෝරෛර්භවිෂ්යති න සංශයඃ ॥ 16 ॥
අහෝऽස්මින් ව්යසනේ මග්නස්සර්වථා ශත්රුසූදන ।
කිං න්විදානීං කරිෂ්යාමි ශංකේ ප්රාප්තව්යමීදෘශම් ॥ 17 ॥
ඉති සීතාං වරාරෝහාං චිංතයන්නේව රාඝවඃ ।
ආජගාම ජනස්ථානං ත්වරයා සහ ලක්ෂ්මණඃ ॥ 18 ॥
විගර්හමාණෝऽනුජමාර්තරූපං ක්ෂුධා ශ්රමාච්චෛව පිපාසයා ච ।
විනිශ්ශ්වසන් ශුෂ්කමුඛෝ විවර්ණඃ ප්රතිශ්රයං ප්රාප්ය සමීක්ෂ්ය ශූන්යම් ॥ 19 ॥
ස්වමාශ්රමං සංප්රවිගාහ්ය වීරෝ විහාරදේශානනුසෘත්ය කාංශ්චිත් ।
ඒතත්තදිත්යේව නිවාසභූමෞ ප්රහෘෂ්ටරෝමා ව්යථිතෝ බභූව ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටපංචාශස්සර්ගඃ ॥
