ஶ்ரீமத்³வால்மீகீய ராமாயணே அரண்யகாண்ட³ம் ।
அத² அஷ்டபஞ்சாஶஸ்ஸர்க:³ ।
ஸ த்³ருஷ்ட்வா லக்ஷ்மணம் தீ³னம் ஶூன்யே த³ஶரதா²த்மஜ: ।
பர்யப்ருச்ச²த த⁴ர்மாத்மா வைதே³ஹீமாக³தம் வினா ॥ 1 ॥
ப்ரஸ்தி²தம் த³ண்ட³காரண்யம் யா மாமனுஜகா³ம ஹ ।
க்வ ஸா லக்ஷ்மண வைதே³ஹீ யாம் ஹித்வா த்வமிஹாக³த: ॥ 2 ॥
ராஜ்யப்⁴ரஷ்டஸ்ய தீ³னஸ்ய த³ண்ட³கான்பரிதா⁴வத: ।
க்வ ஸா து³:க²ஸஹாயா மே வைதே³ஹீ தனுமத்⁴யமா ॥ 3 ॥
யாம் வினா நோத்ஸஹே வீர முஹூர்தமபி ஜீவிதும் ।
க்வ ஸா ப்ராணஸஹாயா மே ஸீதா ஸுரஸுதோபமா ॥ 4 ॥
பதித்வமமராணாம் வா ப்ருதி²வ்யாஶ்சாபி லக்ஷ்மண ।
தாம் வினா தபனீயாபா⁴ம் நேச்சே²யம் ஜனகாத்மஜாம் ॥ 5 ॥
கச்சிஜ்ஜீவதி வைதே³ஹி ப்ராணை: ப்ரியதரா மம ।
கச்சித்ப்ரவ்ராஜனம் ஸௌம்ய ந மே மித்²யா ப⁴விஷ்யதி ॥ 6 ॥
ஸீதானிமித்தம் ஸௌமித்ரே ம்ருதே மயி க³தே த்வயி ।
கச்சித்ஸகாமா ஸுகி²தா கைகேயீ ஸா ப⁴விஷ்யதி ॥ 7 ॥
ஸபுத்ரராஜ்யாம் ஸித்³தா⁴ர்தா²ம் ம்ருதபுத்ரா தபஸ்வினீ ।
உபஸ்தா²ஸ்யதிகௌஸல்யா கச்சித்ஸௌம்ய ந கேகயீம் ॥ 8 ॥
யதி³ ஜீவதி வைதே³ஹீ க³மிஷ்யாம்யாஶ்ரமம் புன: ।
ஸுவ்ருத்தா யதி³ வ்ருத்தா ப்ராணாம்ஸ்த்யக்ஷ்யாமி லக்ஷ்மண ॥ 9 ॥
யதி³ மாமாஶ்ரமக³தம் வைதே³ஹீ நாபி⁴பா⁴ஷதே ।
புன: ப்ரஹஸிதா ஸீதா வினஶிஷ்யாமி லக்ஷ்மண ॥ 1௦ ॥
ப்³ரூஹி லக்ஷ்மண வைதே³ஹீ யதி³ ஜீவதி வா ந வா ।
த்வயி ப்ரமத்தே ரக்ஷோபி⁴ர்ப⁴க்ஷிதா வா தபஸ்வினீ ॥ 11 ॥
ஸுகுமாரீ ச பா³லா ச நித்யம் சாது³:க²த³ர்ஶினீ ।
மத்³வியோகே³ன வைதே³ஹீ வ்யக்தம் ஶோசதி து³ர்மனா: ॥ 12 ॥
ஸர்வதா³ ரக்ஷஸா தேன ஜிஹ்மேன ஸுது³ராத்மனா ।
வத³தா லக்ஷ்மணேத்யுச்சைஸ்தவாபி ஜனிதம் ப⁴யம் ॥ 13 ॥
ஶ்ருதஸ்து ஶங்கே வைதே³ஹ்யா ஸ ஸ்வரஸ்ஸத்³ருஶோ மம ।
த்ரஸ்தயா ப்ரேஷிதஸ்த்வம் ச த்³ரஷ்டும் மாம் ஶீக்⁴ரமாக³த: ॥ 14 ॥
ஸர்வதா² து க்ருதம் கஷ்டம் ஸீதாமுத்ஸ்ருஜதா வனே ।
ப்ரதிகர்தும் ந்ருஶம்ஸானாம் ரக்ஷஸாம் த³த்தமந்தரம் ॥ 15 ॥
து³:கி²தா: க²ரகா⁴தேன ராக்ஷஸா: பிஶிதாஶனா: ।
தைஸ்ஸீதா நிஹதா கோ⁴ரைர்ப⁴விஷ்யதி ந ஸம்ஶய: ॥ 16 ॥
அஹோஸ்மின் வ்யஸனே மக்³னஸ்ஸர்வதா² ஶத்ருஸூத³ன ।
கிம் ந்விதா³னீம் கரிஷ்யாமி ஶங்கே ப்ராப்தவ்யமீத்³ருஶம் ॥ 17 ॥
இதி ஸீதாம் வராரோஹாம் சிந்தயன்னேவ ராக⁴வ: ।
ஆஜகா³ம ஜனஸ்தா²னம் த்வரயா ஸஹ லக்ஷ்மண: ॥ 18 ॥
விக³ர்ஹமாணோனுஜமார்தரூபம் க்ஷுதா⁴ ஶ்ரமாச்சைவ பிபாஸயா ச ।
வினிஶ்ஶ்வஸன் ஶுஷ்கமுகோ² விவர்ண: ப்ரதிஶ்ரயம் ப்ராப்ய ஸமீக்ஷ்ய ஶூன்யம் ॥ 19 ॥
ஸ்வமாஶ்ரமம் ஸம்ப்ரவிகா³ஹ்ய வீரோ விஹாரதே³ஶானநுஸ்ருத்ய காம்ஶ்சித் ।
ஏதத்ததி³த்யேவ நிவாஸபூ⁴மௌ ப்ரஹ்ருஷ்டரோமா வ்யதி²தோ ப³பூ⁴வ ॥ 2௦ ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அரண்யகாண்டே³ அஷ்டபஞ்சாஶஸ்ஸர்க:³ ॥
