ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടപംചാശസ്സര്ഗഃ ।
സ ദൃഷ്ട്വാ ലക്ഷ്മണം ദീനം ശൂന്യേ ദശരഥാത്മജഃ ।
പര്യപൃച്ഛത ധര്മാത്മാ വൈദേഹീമാഗതം വിനാ ॥ 1 ॥
പ്രസ്ഥിതം ദംഡകാരണ്യം യാ മാമനുജഗാമ ഹ ।
ക്വ സാ ലക്ഷ്മണ വൈദേഹീ യാം ഹിത്വാ ത്വമിഹാഗതഃ ॥ 2 ॥
രാജ്യഭ്രഷ്ടസ്യ ദീനസ്യ ദംഡകാന്പരിധാവതഃ ।
ക്വ സാ ദുഃഖസഹായാ മേ വൈദേഹീ തനുമധ്യമാ ॥ 3 ॥
യാം വിനാ നോത്സഹേ വീര മുഹൂര്തമപി ജീവിതുമ് ।
ക്വ സാ പ്രാണസഹായാ മേ സീതാ സുരസുതോപമാ ॥ 4 ॥
പതിത്വമമരാണാം വാ പൃഥിവ്യാശ്ചാപി ലക്ഷ്മണ ।
താം വിനാ തപനീയാഭാം നേച്ഛേയം ജനകാത്മജാമ് ॥ 5 ॥
കച്ചിജ്ജീവതി വൈദേഹി പ്രാണൈഃ പ്രിയതരാ മമ ।
കച്ചിത്പ്രവ്രാജനം സൌമ്യ ന മേ മിഥ്യാ ഭവിഷ്യതി ॥ 6 ॥
സീതാനിമിത്തം സൌമിത്രേ മൃതേ മയി ഗതേ ത്വയി ।
കച്ചിത്സകാമാ സുഖിതാ കൈകേയീ സാ ഭവിഷ്യതി ॥ 7 ॥
സപുത്രരാജ്യാം സിദ്ധാര്ഥാം മൃതപുത്രാ തപസ്വിനീ ।
ഉപസ്ഥാസ്യതികൌസല്യാ കച്ചിത്സൌമ്യ ന കേകയീമ് ॥ 8 ॥
യദി ജീവതി വൈദേഹീ ഗമിഷ്യാമ്യാശ്രമം പുനഃ ।
സുവൃത്താ യദി വൃത്താ പ്രാണാംസ്ത്യക്ഷ്യാമി ലക്ഷ്മണ ॥ 9 ॥
യദി മാമാശ്രമഗതം വൈദേഹീ നാഭിഭാഷതേ ।
പുനഃ പ്രഹസിതാ സീതാ വിനശിഷ്യാമി ലക്ഷ്മണ ॥ 10 ॥
ബ്രൂഹി ലക്ഷ്മണ വൈദേഹീ യദി ജീവതി വാ ന വാ ।
ത്വയി പ്രമത്തേ രക്ഷോഭിര്ഭക്ഷിതാ വാ തപസ്വിനീ ॥ 11 ॥
സുകുമാരീ ച ബാലാ ച നിത്യം ചാദുഃഖദര്ശിനീ ।
മദ്വിയോഗേന വൈദേഹീ വ്യക്തം ശോചതി ദുര്മനാഃ ॥ 12 ॥
സർവദാ രക്ഷസാ തേന ജിഹ്മേന സുദുരാത്മനാ ।
വദതാ ലക്ഷ്മണേത്യുച്ചൈസ്തവാപി ജനിതം ഭയമ് ॥ 13 ॥
ശ്രുതസ്തു ശംകേ വൈദേഹ്യാ സ സ്വരസ്സദൃശോ മമ ।
ത്രസ്തയാ പ്രേഷിതസ്ത്വം ച ദ്രഷ്ടും മാം ശീഘ്രമാഗതഃ ॥ 14 ॥
സർവഥാ തു കൃതം കഷ്ടം സീതാമുത്സൃജതാ വനേ ।
പ്രതികര്തും നൃശംസാനാം രക്ഷസാം ദത്തമംതരമ് ॥ 15 ॥
ദുഃഖിതാഃ ഖരഘാതേന രാക്ഷസാഃ പിശിതാശനാഃ ।
തൈസ്സീതാ നിഹതാ ഘോരൈര്ഭവിഷ്യതി ന സംശയഃ ॥ 16 ॥
അഹോഽസ്മിന് വ്യസനേ മഗ്നസ്സർവഥാ ശത്രുസൂദന ।
കിം ന്വിദാനീം കരിഷ്യാമി ശംകേ പ്രാപ്തവ്യമീദൃശമ് ॥ 17 ॥
ഇതി സീതാം വരാരോഹാം ചിംതയന്നേവ രാഘവഃ ।
ആജഗാമ ജനസ്ഥാനം ത്വരയാ സഹ ലക്ഷ്മണഃ ॥ 18 ॥
വിഗര്ഹമാണോഽനുജമാര്തരൂപം ക്ഷുധാ ശ്രമാച്ചൈവ പിപാസയാ ച ।
വിനിശ്ശ്വസന് ശുഷ്കമുഖോ വിവര്ണഃ പ്രതിശ്രയം പ്രാപ്യ സമീക്ഷ്യ ശൂന്യമ് ॥ 19 ॥
സ്വമാശ്രമം സംപ്രവിഗാഹ്യ വീരോ വിഹാരദേശാനനുസൃത്യ കാംശ്ചിത് ।
ഏതത്തദിത്യേവ നിവാസഭൂമൌ പ്രഹൃഷ്ടരോമാ വ്യഥിതോ ബഭൂവ ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടപംചാശസ്സര്ഗഃ ॥
