ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଅଷ୍ଟପଂଚାଶସ୍ସର୍ଗଃ ।
ସ ଦୃଷ୍ଟ୍ଵା ଲକ୍ଷ୍ମଣଂ ଦୀନଂ ଶୂନ୍ୟେ ଦଶରଥାତ୍ମଜଃ ।
ପର୍ୟପୃଚ୍ଛତ ଧର୍ମାତ୍ମା ଵୈଦେହୀମାଗତଂ ଵିନା ॥ 1 ॥
ପ୍ରସ୍ଥିତଂ ଦଂଡକାରଣ୍ୟଂ ୟା ମାମନୁଜଗାମ ହ ।
କ୍ଵ ସା ଲକ୍ଷ୍ମଣ ଵୈଦେହୀ ୟାଂ ହିତ୍ଵା ତ୍ଵମିହାଗତଃ ॥ 2 ॥
ରାଜ୍ୟଭ୍ରଷ୍ଟସ୍ୟ ଦୀନସ୍ୟ ଦଂଡକାନ୍ପରିଧାଵତଃ ।
କ୍ଵ ସା ଦୁଃଖସହାୟା ମେ ଵୈଦେହୀ ତନୁମଧ୍ୟମା ॥ 3 ॥
ୟାଂ ଵିନା ନୋତ୍ସହେ ଵୀର ମୁହୂର୍ତମପି ଜୀଵିତୁମ୍ ।
କ୍ଵ ସା ପ୍ରାଣସହାୟା ମେ ସୀତା ସୁରସୁତୋପମା ॥ 4 ॥
ପତିତ୍ଵମମରାଣାଂ ଵା ପୃଥିଵ୍ୟାଶ୍ଚାପି ଲକ୍ଷ୍ମଣ ।
ତାଂ ଵିନା ତପନୀୟାଭାଂ ନେଚ୍ଛେୟଂ ଜନକାତ୍ମଜାମ୍ ॥ 5 ॥
କଚ୍ଚିଜ୍ଜୀଵତି ଵୈଦେହି ପ୍ରାଣୈଃ ପ୍ରିୟତରା ମମ ।
କଚ୍ଚିତ୍ପ୍ରଵ୍ରାଜନଂ ସୌମ୍ୟ ନ ମେ ମିଥ୍ୟା ଭଵିଷ୍ୟତି ॥ 6 ॥
ସୀତାନିମିତ୍ତଂ ସୌମିତ୍ରେ ମୃତେ ମୟି ଗତେ ତ୍ଵୟି ।
କଚ୍ଚିତ୍ସକାମା ସୁଖିତା କୈକେୟୀ ସା ଭଵିଷ୍ୟତି ॥ 7 ॥
ସପୁତ୍ରରାଜ୍ୟାଂ ସିଦ୍ଧାର୍ଥାଂ ମୃତପୁତ୍ରା ତପସ୍ଵିନୀ ।
ଉପସ୍ଥାସ୍ୟତିକୌସଲ୍ୟା କଚ୍ଚିତ୍ସୌମ୍ୟ ନ କେକୟୀମ୍ ॥ 8 ॥
ୟଦି ଜୀଵତି ଵୈଦେହୀ ଗମିଷ୍ୟାମ୍ୟାଶ୍ରମଂ ପୁନଃ ।
ସୁଵୃତ୍ତା ୟଦି ଵୃତ୍ତା ପ୍ରାଣାଂସ୍ତ୍ୟକ୍ଷ୍ୟାମି ଲକ୍ଷ୍ମଣ ॥ 9 ॥
ୟଦି ମାମାଶ୍ରମଗତଂ ଵୈଦେହୀ ନାଭିଭାଷତେ ।
ପୁନଃ ପ୍ରହସିତା ସୀତା ଵିନଶିଷ୍ୟାମି ଲକ୍ଷ୍ମଣ ॥ 10 ॥
ବ୍ରୂହି ଲକ୍ଷ୍ମଣ ଵୈଦେହୀ ୟଦି ଜୀଵତି ଵା ନ ଵା ।
ତ୍ଵୟି ପ୍ରମତ୍ତେ ରକ୍ଷୋଭିର୍ଭକ୍ଷିତା ଵା ତପସ୍ଵିନୀ ॥ 11 ॥
ସୁକୁମାରୀ ଚ ବାଲା ଚ ନିତ୍ୟଂ ଚାଦୁଃଖଦର୍ଶିନୀ ।
ମଦ୍ଵିୟୋଗେନ ଵୈଦେହୀ ଵ୍ୟକ୍ତଂ ଶୋଚତି ଦୁର୍ମନାଃ ॥ 12 ॥
ସର୍ଵଦା ରକ୍ଷସା ତେନ ଜିହ୍ମେନ ସୁଦୁରାତ୍ମନା ।
ଵଦତା ଲକ୍ଷ୍ମଣେତ୍ୟୁଚ୍ଚୈସ୍ତଵାପି ଜନିତଂ ଭୟମ୍ ॥ 13 ॥
ଶ୍ରୁତସ୍ତୁ ଶଂକେ ଵୈଦେହ୍ୟା ସ ସ୍ଵରସ୍ସଦୃଶୋ ମମ ।
ତ୍ରସ୍ତୟା ପ୍ରେଷିତସ୍ତ୍ଵଂ ଚ ଦ୍ରଷ୍ଟୁଂ ମାଂ ଶୀଘ୍ରମାଗତଃ ॥ 14 ॥
ସର୍ଵଥା ତୁ କୃତଂ କଷ୍ଟଂ ସୀତାମୁତ୍ସୃଜତା ଵନେ ।
ପ୍ରତିକର୍ତୁଂ ନୃଶଂସାନାଂ ରକ୍ଷସାଂ ଦତ୍ତମଂତରମ୍ ॥ 15 ॥
ଦୁଃଖିତାଃ ଖରଘାତେନ ରାକ୍ଷସାଃ ପିଶିତାଶନାଃ ।
ତୈସ୍ସୀତା ନିହତା ଘୋରୈର୍ଭଵିଷ୍ୟତି ନ ସଂଶୟଃ ॥ 16 ॥
ଅହୋଽସ୍ମିନ୍ ଵ୍ୟସନେ ମଗ୍ନସ୍ସର୍ଵଥା ଶତ୍ରୁସୂଦନ ।
କିଂ ନ୍ଵିଦାନୀଂ କରିଷ୍ୟାମି ଶଂକେ ପ୍ରାପ୍ତଵ୍ୟମୀଦୃଶମ୍ ॥ 17 ॥
ଇତି ସୀତାଂ ଵରାରୋହାଂ ଚିଂତୟନ୍ନେଵ ରାଘଵଃ ।
ଆଜଗାମ ଜନସ୍ଥାନଂ ତ୍ଵରୟା ସହ ଲକ୍ଷ୍ମଣଃ ॥ 18 ॥
ଵିଗର୍ହମାଣୋଽନୁଜମାର୍ତରୂପଂ କ୍ଷୁଧା ଶ୍ରମାଚ୍ଚୈଵ ପିପାସୟା ଚ ।
ଵିନିଶ୍ଶ୍ଵସନ୍ ଶୁଷ୍କମୁଖୋ ଵିଵର୍ଣଃ ପ୍ରତିଶ୍ରୟଂ ପ୍ରାପ୍ୟ ସମୀକ୍ଷ୍ୟ ଶୂନ୍ୟମ୍ ॥ 19 ॥
ସ୍ଵମାଶ୍ରମଂ ସଂପ୍ରଵିଗାହ୍ୟ ଵୀରୋ ଵିହାରଦେଶାନନୁସୃତ୍ୟ କାଂଶ୍ଚିତ୍ ।
ଏତତ୍ତଦିତ୍ୟେଵ ନିଵାସଭୂମୌ ପ୍ରହୃଷ୍ଟରୋମା ଵ୍ୟଥିତୋ ବଭୂଵ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଅଷ୍ଟପଂଚାଶସ୍ସର୍ଗଃ ॥
