śrīmadvālmīkīya rāmāyaṇē araṇyakāṇḍam ।
atha aṣṭapañchāśassargaḥ ।
sa dṛṣṭvā lakṣmaṇaṃ dīnaṃ śūnyē daśarathātmajaḥ ।
paryapṛchChata dharmātmā vaidēhīmāgataṃ vinā ॥ 1 ॥
prasthitaṃ daṇḍakāraṇyaṃ yā māmanujagāma ha ।
kva sā lakṣmaṇa vaidēhī yāṃ hitvā tvamihāgataḥ ॥ 2 ॥
rājyabhraṣṭasya dīnasya daṇḍakānparidhāvataḥ ।
kva sā duḥkhasahāyā mē vaidēhī tanumadhyamā ॥ 3 ॥
yāṃ vinā nōtsahē vīra muhūrtamapi jīvitum ।
kva sā prāṇasahāyā mē sītā surasutōpamā ॥ 4 ॥
patitvamamarāṇāṃ vā pṛthivyāśchāpi lakṣmaṇa ।
tāṃ vinā tapanīyābhāṃ nēchChēyaṃ janakātmajām ॥ 5 ॥
kachchijjīvati vaidēhi prāṇaiḥ priyatarā mama ।
kachchitpravrājanaṃ saumya na mē mithyā bhaviṣyati ॥ 6 ॥
sītānimittaṃ saumitrē mṛtē mayi gatē tvayi ।
kachchitsakāmā sukhitā kaikēyī sā bhaviṣyati ॥ 7 ॥
saputrarājyāṃ siddhārthāṃ mṛtaputrā tapasvinī ।
upasthāsyatikausalyā kachchitsaumya na kēkayīm ॥ 8 ॥
yadi jīvati vaidēhī gamiṣyāmyāśramaṃ punaḥ ।
suvṛttā yadi vṛttā prāṇāṃstyakṣyāmi lakṣmaṇa ॥ 9 ॥
yadi māmāśramagataṃ vaidēhī nābhibhāṣatē ।
punaḥ prahasitā sītā vinaśiṣyāmi lakṣmaṇa ॥ 10 ॥
brūhi lakṣmaṇa vaidēhī yadi jīvati vā na vā ।
tvayi pramattē rakṣōbhirbhakṣitā vā tapasvinī ॥ 11 ॥
sukumārī cha bālā cha nityaṃ chāduḥkhadarśinī ।
madviyōgēna vaidēhī vyaktaṃ śōchati durmanāḥ ॥ 12 ॥
sarvadā rakṣasā tēna jihmēna sudurātmanā ।
vadatā lakṣmaṇētyuchchaistavāpi janitaṃ bhayam ॥ 13 ॥
śrutastu śaṅkē vaidēhyā sa svarassadṛśō mama ।
trastayā prēṣitastvaṃ cha draṣṭuṃ māṃ śīghramāgataḥ ॥ 14 ॥
sarvathā tu kṛtaṃ kaṣṭaṃ sītāmutsṛjatā vanē ।
pratikartuṃ nṛśaṃsānāṃ rakṣasāṃ dattamantaram ॥ 15 ॥
duḥkhitāḥ kharaghātēna rākṣasāḥ piśitāśanāḥ ।
taissītā nihatā ghōrairbhaviṣyati na saṃśayaḥ ॥ 16 ॥
ahō'smin vyasanē magnassarvathā śatrusūdana ।
kiṃ nvidānīṃ kariṣyāmi śaṅkē prāptavyamīdṛśam ॥ 17 ॥
iti sītāṃ varārōhāṃ chintayannēva rāghavaḥ ।
ājagāma janasthānaṃ tvarayā saha lakṣmaṇaḥ ॥ 18 ॥
vigarhamāṇō'nujamārtarūpaṃ kṣudhā śramāchchaiva pipāsayā cha ।
viniśśvasan śuṣkamukhō vivarṇaḥ pratiśrayaṃ prāpya samīkṣya śūnyam ॥ 19 ॥
svamāśramaṃ sampravigāhya vīrō vihāradēśānanusṛtya kāṃśchit ।
ētattadityēva nivāsabhūmau prahṛṣṭarōmā vyathitō babhūva ॥ 20 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē aṣṭapañchāśassargaḥ ॥
