śrīmadvālmīkīya rāmāyaṇē araṇyakāṇḍam ।
atha ṣaṣṭhassargaḥ ।
śarabhaṅgē divaṃ prāptē munisaṅghāssamāgatāḥ ।
abhyagachChanta kākutsthaṃ rāmaṃ jvalitatējasam ॥ 1 ॥
vaikhānasā vālakhilyāssamprakṣālā marīchipāḥ ।
aśmakuṭṭāścha bahavaḥ patrāhārāścha tāpasāḥ ॥ 2 ॥
dantōlūkhalinaśchaiva tathaivōnmajjakāḥ parē ।
gātraśayyā aśayyāścha tathaivābhrāvakāśakāḥ ॥ 3 ॥
munayassalilāhārāvāyubhakṣā stathāparē ।
ākāśanilayāśchaiva tathā sthaṇḍilaśāyinaḥ ॥ 4 ॥
vratōpavāsinō dāntāstathā'rdrapaṭavāsasaḥ ।
sajapāścha tapōnityāstathā pañchatapō'nvitāḥ ॥ 5 ॥
sarvē brāhmyā śriyā juṣṭā dṛḍhayōgāssamāhitāḥ ।
śarabhaṅgāśramē rāmamabhijagmuścha tāpasāḥ ॥ 6 ॥
abhigamya cha dharmajñā rāmaṃ dharmabhṛtāṃ varam ।
ūchuḥ paramadharmajñamṛṣisaṅghāssamāhitāḥ ॥ 7 ॥
tvamikṣvākukulasyāsya pṛthivyāścha mahāratha ।
pradhānaśchāsi nāthaścha dēvānāṃ maghavāniva ॥ 8 ॥
viśrutastriṣu lōkēṣu yaśasā vikramēṇa cha ।
pitṛbhaktiścha satyaṃ cha tvayi dharmaścha puṣkalaḥ ॥ 9 ॥
tvāmāsādya mahātmānaṃ dharmajñaṃ dharmavatsalam ।
arthitvānnātha vakṣyāmastachcha naḥ kṣantumarhasi ॥ 10 ॥
adharmassumahāṃstāta bhavēttasya mahīpatēḥ ।
yō harēdbaliṣaḍbhāgāṃ na cha rakṣati putravat ॥ 11 ॥
yuñjānassvāniva prāṇānprāṇairiṣṭānsutāniva ।
nityayuktassadā rakṣansarvānviṣayavāsinaḥ ॥ 12 ॥
prāpnōti śāśvatīṃ rāma kīrtiṃ sa bahuvārṣikīm ।
brahmaṇassthānamāsādya tatra chāpi mahīyatē ॥ 13 ॥
yatkarōti paraṃ dharma munirmūlaphalāśanaḥ ।
tatra rājñaśchaturbhāga prajā dharmēṇa rakṣitaḥ ॥ 14 ॥
sō'yaṃ brāhmaṇabhūyiṣṭhō vānaprasthagaṇō mahān ।
tvannāthō'nāthavadrāma rākṣasairvadhyatē bhṛśam ॥ 15 ॥
ēhi paśya śarīrāṇi munīnāṃ bhāvitātmanām ।
hatānāṃ rākṣasairghōrairbahūnāṃ bahudhā vanē ॥ 16 ॥
pampānadīnivāsānāmanumandākinīmapi ।
chitrakūṭālayānāṃ cha kriyatē kadanaṃ mahat ॥ 17 ॥
ēvaṃ vayaṃ na mṛṣyāmō viprakāraṃ tapasvinām ।
kriyamāṇaṃ vanē ghōraṃ rakṣōbhirbhīmakarmabhiḥ ॥ 18 ॥
tatastvāṃ śaraṇārthaṃ cha śaraṇyaṃ samupasthitāḥ ।
paripālaya nō rāma vadhyamānānniśācharaiḥ ॥ 19 ॥
parā tvattō gatirvīra pṛthivyāṃ nōpapadyatē ।
paripālaya na ssarvānrākṣasēbhyō nṛpātmaja ॥ 20 ॥
ētachChrutvā tu kākutsthastāpasānāṃ tapasvinām ।
idaṃ prōvācha dharmātmā sarvānēva tapasvinaḥ ॥ 21 ॥
naivamarhatha māṃ vaktumājñāpyō'haṃ tapasvinām ।
kēvalēnātmakāryēṇa pravēṣṭavyaṃ mayā vanam ॥ 22 ॥
viprakāramapākraṣṭuṃ rākṣasairbhavatāmimam ।
pitustu nirdēśakaraḥ praviṣṭō'hamidaṃ vanam ॥ 23 ॥
bhavatāmarthasiddhyarthamāgatō'haṃ yadṛchChayā ।
tasya mē'yaṃ vanē vāsō bhaviṣyati mahāphalaḥ ॥ 24 ॥
tapasvināṃ raṇē śatrūnhantumichChāmi rākṣasān ।
paśyantu vīryamṛṣayassabhrāturmē tapōdhanāḥ ॥ 25 ॥
dattvā'bhayaṃ chāpi tapōdhanānāṃ dharmē dhṛtātmā saha lakṣmaṇēna ।
tapōdhanaiśchāpi sabhājyavṛttaḥ sutīkṣṇamēvābhijagāma vīraḥ ॥ 26 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē ṣaṣṭhassargaḥ ॥
