ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഷഷ്ഠസ്സര്ഗഃ ।
ശരഭംഗേ ദിവം പ്രാപ്തേ മുനിസംഘാസ്സമാഗതാഃ ।
അഭ്യഗച്ഛംത കാകുത്സ്ഥം രാമം ജ്വലിതതേജസമ് ॥ 1 ॥
വൈഖാനസാ വാലഖില്യാസ്സംപ്രക്ഷാലാ മരീചിപാഃ ।
അശ്മകുട്ടാശ്ച ബഹവഃ പത്രാഹാരാശ്ച താപസാഃ ॥ 2 ॥
ദംതോലൂഖലിനശ്ചൈവ തഥൈവോന്മജ്ജകാഃ പരേ ।
ഗാത്രശയ്യാ അശയ്യാശ്ച തഥൈവാഭ്രാവകാശകാഃ ॥ 3 ॥
മുനയസ്സലിലാഹാരാവായുഭക്ഷാ സ്തഥാപരേ ।
ആകാശനിലയാശ്ചൈവ തഥാ സ്ഥംഡിലശായിനഃ ॥ 4 ॥
വ്രതോപവാസിനോ ദാംതാസ്തഥാഽര്ദ്രപടവാസസഃ ।
സജപാശ്ച തപോനിത്യാസ്തഥാ പംചതപോഽന്വിതാഃ ॥ 5 ॥
സർവേ ബ്രാഹ്മ്യാ ശ്രിയാ ജുഷ്ടാ ദൃഢയോഗാസ്സമാഹിതാഃ ।
ശരഭംഗാശ്രമേ രാമമഭിജഗ്മുശ്ച താപസാഃ ॥ 6 ॥
അഭിഗമ്യ ച ധര്മജ്ഞാ രാമം ധര്മഭൃതാം വരമ് ।
ഊചുഃ പരമധര്മജ്ഞമൃഷിസംഘാസ്സമാഹിതാഃ ॥ 7 ॥
ത്വമിക്ഷ്വാകുകുലസ്യാസ്യ പൃഥിവ്യാശ്ച മഹാരഥ ।
പ്രധാനശ്ചാസി നാഥശ്ച ദേവാനാം മഘവാനിവ ॥ 8 ॥
വിശ്രുതസ്ത്രിഷു ലോകേഷു യശസാ വിക്രമേണ ച ।
പിതൃഭക്തിശ്ച സത്യം ച ത്വയി ധര്മശ്ച പുഷ്കലഃ ॥ 9 ॥
ത്വാമാസാദ്യ മഹാത്മാനം ധര്മജ്ഞം ധര്മവത്സലമ് ।
അര്ഥിത്വാന്നാഥ വക്ഷ്യാമസ്തച്ച നഃ ക്ഷംതുമര്ഹസി ॥ 10 ॥
അധര്മസ്സുമഹാംസ്താത ഭവേത്തസ്യ മഹീപതേഃ ।
യോ ഹരേദ്ബലിഷഡ്ഭാഗാം ന ച രക്ഷതി പുത്രവത് ॥ 11 ॥
യുംജാനസ്സ്വാനിവ പ്രാണാന്പ്രാണൈരിഷ്ടാന്സുതാനിവ ।
നിത്യയുക്തസ്സദാ രക്ഷന്സർവാന്വിഷയവാസിനഃ ॥ 12 ॥
പ്രാപ്നോതി ശാശ്വതീം രാമ കീര്തിം സ ബഹുവാര്ഷികീമ് ।
ബ്രഹ്മണസ്സ്ഥാനമാസാദ്യ തത്ര ചാപി മഹീയതേ ॥ 13 ॥
യത്കരോതി പരം ധര്മ മുനിര്മൂലഫലാശനഃ ।
തത്ര രാജ്ഞശ്ചതുര്ഭാഗ പ്രജാ ധര്മേണ രക്ഷിതഃ ॥ 14 ॥
സോഽയം ബ്രാഹ്മണഭൂയിഷ്ഠോ വാനപ്രസ്ഥഗണോ മഹാന് ।
ത്വന്നാഥോഽനാഥവദ്രാമ രാക്ഷസൈർവധ്യതേ ഭൃശമ് ॥ 15 ॥
ഏഹി പശ്യ ശരീരാണി മുനീനാം ഭാവിതാത്മനാമ് ।
ഹതാനാം രാക്ഷസൈര്ഘോരൈര്ബഹൂനാം ബഹുധാ വനേ ॥ 16 ॥
പംപാനദീനിവാസാനാമനുമംദാകിനീമപി ।
ചിത്രകൂടാലയാനാം ച ക്രിയതേ കദനം മഹത് ॥ 17 ॥
ഏവം വയം ന മൃഷ്യാമോ വിപ്രകാരം തപസ്വിനാമ് ।
ക്രിയമാണം വനേ ഘോരം രക്ഷോഭിര്ഭീമകര്മഭിഃ ॥ 18 ॥
തതസ്ത്വാം ശരണാര്ഥം ച ശരണ്യം സമുപസ്ഥിതാഃ ।
പരിപാലയ നോ രാമ വധ്യമാനാന്നിശാചരൈഃ ॥ 19 ॥
പരാ ത്വത്തോ ഗതിർവീര പൃഥിവ്യാം നോപപദ്യതേ ।
പരിപാലയ ന സ്സർവാന്രാക്ഷസേഭ്യോ നൃപാത്മജ ॥ 20 ॥
ഏതച്ഛ്രുത്വാ തു കാകുത്സ്ഥസ്താപസാനാം തപസ്വിനാമ് ।
ഇദം പ്രോവാച ധര്മാത്മാ സർവാനേവ തപസ്വിനഃ ॥ 21 ॥
നൈവമര്ഹഥ മാം വക്തുമാജ്ഞാപ്യോഽഹം തപസ്വിനാമ് ।
കേവലേനാത്മകാര്യേണ പ്രവേഷ്ടവ്യം മയാ വനമ് ॥ 22 ॥
വിപ്രകാരമപാക്രഷ്ടും രാക്ഷസൈര്ഭവതാമിമമ് ।
പിതുസ്തു നിര്ദേശകരഃ പ്രവിഷ്ടോഽഹമിദം വനമ് ॥ 23 ॥
ഭവതാമര്ഥസിദ്ധ്യര്ഥമാഗതോഽഹം യദൃച്ഛയാ ।
തസ്യ മേഽയം വനേ വാസോ ഭവിഷ്യതി മഹാഫലഃ ॥ 24 ॥
തപസ്വിനാം രണേ ശത്രൂന്ഹംതുമിച്ഛാമി രാക്ഷസാന് ।
പശ്യംതു വീര്യമൃഷയസ്സഭ്രാതുര്മേ തപോധനാഃ ॥ 25 ॥
ദത്ത്വാഽഭയം ചാപി തപോധനാനാം ധര്മേ ധൃതാത്മാ സഹ ലക്ഷ്മണേന ।
തപോധനൈശ്ചാപി സഭാജ്യവൃത്തഃ സുതീക്ഷ്ണമേവാഭിജഗാമ വീരഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഷഷ്ഠസ്സര്ഗഃ ॥
