ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଷଷ୍ଠସ୍ସର୍ଗଃ ।
ଶରଭଂଗେ ଦିଵଂ ପ୍ରାପ୍ତେ ମୁନିସଂଘାସ୍ସମାଗତାଃ ।
ଅଭ୍ୟଗଚ୍ଛଂତ କାକୁତ୍ସ୍ଥଂ ରାମଂ ଜ୍ଵଲିତତେଜସମ୍ ॥ 1 ॥
ଵୈଖାନସା ଵାଲଖିଲ୍ୟାସ୍ସଂପ୍ରକ୍ଷାଲା ମରୀଚିପାଃ ।
ଅଶ୍ମକୁଟ୍ଟାଶ୍ଚ ବହଵଃ ପତ୍ରାହାରାଶ୍ଚ ତାପସାଃ ॥ 2 ॥
ଦଂତୋଲୂଖଲିନଶ୍ଚୈଵ ତଥୈଵୋନ୍ମଜ୍ଜକାଃ ପରେ ।
ଗାତ୍ରଶୟ୍ୟା ଅଶୟ୍ୟାଶ୍ଚ ତଥୈଵାଭ୍ରାଵକାଶକାଃ ॥ 3 ॥
ମୁନୟସ୍ସଲିଲାହାରାଵାୟୁଭକ୍ଷା ସ୍ତଥାପରେ ।
ଆକାଶନିଲୟାଶ୍ଚୈଵ ତଥା ସ୍ଥଂଡିଲଶାୟିନଃ ॥ 4 ॥
ଵ୍ରତୋପଵାସିନୋ ଦାଂତାସ୍ତଥାଽର୍ଦ୍ରପଟଵାସସଃ ।
ସଜପାଶ୍ଚ ତପୋନିତ୍ୟାସ୍ତଥା ପଂଚତପୋଽନ୍ଵିତାଃ ॥ 5 ॥
ସର୍ଵେ ବ୍ରାହ୍ମ୍ୟା ଶ୍ରିୟା ଜୁଷ୍ଟା ଦୃଢୟୋଗାସ୍ସମାହିତାଃ ।
ଶରଭଂଗାଶ୍ରମେ ରାମମଭିଜଗ୍ମୁଶ୍ଚ ତାପସାଃ ॥ 6 ॥
ଅଭିଗମ୍ୟ ଚ ଧର୍ମଜ୍ଞା ରାମଂ ଧର୍ମଭୃତାଂ ଵରମ୍ ।
ଊଚୁଃ ପରମଧର୍ମଜ୍ଞମୃଷିସଂଘାସ୍ସମାହିତାଃ ॥ 7 ॥
ତ୍ଵମିକ୍ଷ୍ଵାକୁକୁଲସ୍ୟାସ୍ୟ ପୃଥିଵ୍ୟାଶ୍ଚ ମହାରଥ ।
ପ୍ରଧାନଶ୍ଚାସି ନାଥଶ୍ଚ ଦେଵାନାଂ ମଘଵାନିଵ ॥ 8 ॥
ଵିଶ୍ରୁତସ୍ତ୍ରିଷୁ ଲୋକେଷୁ ୟଶସା ଵିକ୍ରମେଣ ଚ ।
ପିତୃଭକ୍ତିଶ୍ଚ ସତ୍ୟଂ ଚ ତ୍ଵୟି ଧର୍ମଶ୍ଚ ପୁଷ୍କଲଃ ॥ 9 ॥
ତ୍ଵାମାସାଦ୍ୟ ମହାତ୍ମାନଂ ଧର୍ମଜ୍ଞଂ ଧର୍ମଵତ୍ସଲମ୍ ।
ଅର୍ଥିତ୍ଵାନ୍ନାଥ ଵକ୍ଷ୍ୟାମସ୍ତଚ୍ଚ ନଃ କ୍ଷଂତୁମର୍ହସି ॥ 10 ॥
ଅଧର୍ମସ୍ସୁମହାଂସ୍ତାତ ଭଵେତ୍ତସ୍ୟ ମହୀପତେଃ ।
ୟୋ ହରେଦ୍ବଲିଷଡ୍ଭାଗାଂ ନ ଚ ରକ୍ଷତି ପୁତ୍ରଵତ୍ ॥ 11 ॥
ୟୁଂଜାନସ୍ସ୍ଵାନିଵ ପ୍ରାଣାନ୍ପ୍ରାଣୈରିଷ୍ଟାନ୍ସୁତାନିଵ ।
ନିତ୍ୟୟୁକ୍ତସ୍ସଦା ରକ୍ଷନ୍ସର୍ଵାନ୍ଵିଷୟଵାସିନଃ ॥ 12 ॥
ପ୍ରାପ୍ନୋତି ଶାଶ୍ଵତୀଂ ରାମ କୀର୍ତିଂ ସ ବହୁଵାର୍ଷିକୀମ୍ ।
ବ୍ରହ୍ମଣସ୍ସ୍ଥାନମାସାଦ୍ୟ ତତ୍ର ଚାପି ମହୀୟତେ ॥ 13 ॥
ୟତ୍କରୋତି ପରଂ ଧର୍ମ ମୁନିର୍ମୂଲଫଲାଶନଃ ।
ତତ୍ର ରାଜ୍ଞଶ୍ଚତୁର୍ଭାଗ ପ୍ରଜା ଧର୍ମେଣ ରକ୍ଷିତଃ ॥ 14 ॥
ସୋଽୟଂ ବ୍ରାହ୍ମଣଭୂୟିଷ୍ଠୋ ଵାନପ୍ରସ୍ଥଗଣୋ ମହାନ୍ ।
ତ୍ଵନ୍ନାଥୋଽନାଥଵଦ୍ରାମ ରାକ୍ଷସୈର୍ଵଧ୍ୟତେ ଭୃଶମ୍ ॥ 15 ॥
ଏହି ପଶ୍ୟ ଶରୀରାଣି ମୁନୀନାଂ ଭାଵିତାତ୍ମନାମ୍ ।
ହତାନାଂ ରାକ୍ଷସୈର୍ଘୋରୈର୍ବହୂନାଂ ବହୁଧା ଵନେ ॥ 16 ॥
ପଂପାନଦୀନିଵାସାନାମନୁମଂଦାକିନୀମପି ।
ଚିତ୍ରକୂଟାଲୟାନାଂ ଚ କ୍ରିୟତେ କଦନଂ ମହତ୍ ॥ 17 ॥
ଏଵଂ ଵୟଂ ନ ମୃଷ୍ୟାମୋ ଵିପ୍ରକାରଂ ତପସ୍ଵିନାମ୍ ।
କ୍ରିୟମାଣଂ ଵନେ ଘୋରଂ ରକ୍ଷୋଭିର୍ଭୀମକର୍ମଭିଃ ॥ 18 ॥
ତତସ୍ତ୍ଵାଂ ଶରଣାର୍ଥଂ ଚ ଶରଣ୍ୟଂ ସମୁପସ୍ଥିତାଃ ।
ପରିପାଲୟ ନୋ ରାମ ଵଧ୍ୟମାନାନ୍ନିଶାଚରୈଃ ॥ 19 ॥
ପରା ତ୍ଵତ୍ତୋ ଗତିର୍ଵୀର ପୃଥିଵ୍ୟାଂ ନୋପପଦ୍ୟତେ ।
ପରିପାଲୟ ନ ସ୍ସର୍ଵାନ୍ରାକ୍ଷସେଭ୍ୟୋ ନୃପାତ୍ମଜ ॥ 20 ॥
ଏତଚ୍ଛ୍ରୁତ୍ଵା ତୁ କାକୁତ୍ସ୍ଥସ୍ତାପସାନାଂ ତପସ୍ଵିନାମ୍ ।
ଇଦଂ ପ୍ରୋଵାଚ ଧର୍ମାତ୍ମା ସର୍ଵାନେଵ ତପସ୍ଵିନଃ ॥ 21 ॥
ନୈଵମର୍ହଥ ମାଂ ଵକ୍ତୁମାଜ୍ଞାପ୍ୟୋଽହଂ ତପସ୍ଵିନାମ୍ ।
କେଵଲେନାତ୍ମକାର୍ୟେଣ ପ୍ରଵେଷ୍ଟଵ୍ୟଂ ମୟା ଵନମ୍ ॥ 22 ॥
ଵିପ୍ରକାରମପାକ୍ରଷ୍ଟୁଂ ରାକ୍ଷସୈର୍ଭଵତାମିମମ୍ ।
ପିତୁସ୍ତୁ ନିର୍ଦେଶକରଃ ପ୍ରଵିଷ୍ଟୋଽହମିଦଂ ଵନମ୍ ॥ 23 ॥
ଭଵତାମର୍ଥସିଦ୍ଧ୍ୟର୍ଥମାଗତୋଽହଂ ୟଦୃଚ୍ଛୟା ।
ତସ୍ୟ ମେଽୟଂ ଵନେ ଵାସୋ ଭଵିଷ୍ୟତି ମହାଫଲଃ ॥ 24 ॥
ତପସ୍ଵିନାଂ ରଣେ ଶତ୍ରୂନ୍ହଂତୁମିଚ୍ଛାମି ରାକ୍ଷସାନ୍ ।
ପଶ୍ୟଂତୁ ଵୀର୍ୟମୃଷୟସ୍ସଭ୍ରାତୁର୍ମେ ତପୋଧନାଃ ॥ 25 ॥
ଦତ୍ତ୍ଵାଽଭୟଂ ଚାପି ତପୋଧନାନାଂ ଧର୍ମେ ଧୃତାତ୍ମା ସହ ଲକ୍ଷ୍ମଣେନ ।
ତପୋଧନୈଶ୍ଚାପି ସଭାଜ୍ୟଵୃତ୍ତଃ ସୁତୀକ୍ଷ୍ଣମେଵାଭିଜଗାମ ଵୀରଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଷଷ୍ଠସ୍ସର୍ଗଃ ॥
