ශ්රීමද්වාල්මීකීය රාමායණේ අරණ්යකාංඩම් ।
අථ ෂෂ්ඨස්සර්ගඃ ।
ශරභංගේ දිවං ප්රාප්තේ මුනිසංඝාස්සමාගතාඃ ।
අභ්යගච්ඡංත කාකුත්ස්ථං රාමං ජ්වලිතතේජසම් ॥ 1 ॥
වෛඛානසා වාලඛිල්යාස්සංප්රක්ෂාලා මරීචිපාඃ ।
අශ්මකුට්ටාශ්ච බහවඃ පත්රාහාරාශ්ච තාපසාඃ ॥ 2 ॥
දංතෝලූඛලිනශ්චෛව තථෛවෝන්මජ්ජකාඃ පරේ ।
ගාත්රශය්යා අශය්යාශ්ච තථෛවාභ්රාවකාශකාඃ ॥ 3 ॥
මුනයස්සලිලාහාරාවායුභක්ෂා ස්තථාපරේ ।
ආකාශනිලයාශ්චෛව තථා ස්ථංඩිලශායිනඃ ॥ 4 ॥
ව්රතෝපවාසිනෝ දාංතාස්තථාऽර්ද්රපටවාසසඃ ।
සජපාශ්ච තපෝනිත්යාස්තථා පංචතපෝऽන්විතාඃ ॥ 5 ॥
සර්වේ බ්රාහ්ම්යා ශ්රියා ජුෂ්ටා දෘඪයෝගාස්සමාහිතාඃ ।
ශරභංගාශ්රමේ රාමමභිජග්මුශ්ච තාපසාඃ ॥ 6 ॥
අභිගම්ය ච ධර්මජ්ඤා රාමං ධර්මභෘතාං වරම් ।
ඌචුඃ පරමධර්මජ්ඤමෘෂිසංඝාස්සමාහිතාඃ ॥ 7 ॥
ත්වමික්ෂ්වාකුකුලස්යාස්ය පෘථිව්යාශ්ච මහාරථ ।
ප්රධානශ්චාසි නාථශ්ච දේවානාං මඝවානිව ॥ 8 ॥
විශ්රුතස්ත්රිෂු ලෝකේෂු යශසා වික්රමේණ ච ।
පිතෘභක්තිශ්ච සත්යං ච ත්වයි ධර්මශ්ච පුෂ්කලඃ ॥ 9 ॥
ත්වාමාසාද්ය මහාත්මානං ධර්මජ්ඤං ධර්මවත්සලම් ।
අර්ථිත්වාන්නාථ වක්ෂ්යාමස්තච්ච නඃ ක්ෂංතුමර්හසි ॥ 10 ॥
අධර්මස්සුමහාංස්තාත භවේත්තස්ය මහීපතේඃ ।
යෝ හරේද්බලිෂඩ්භාගාං න ච රක්ෂති පුත්රවත් ॥ 11 ॥
යුංජානස්ස්වානිව ප්රාණාන්ප්රාණෛරිෂ්ටාන්සුතානිව ।
නිත්යයුක්තස්සදා රක්ෂන්සර්වාන්විෂයවාසිනඃ ॥ 12 ॥
ප්රාප්නෝති ශාශ්වතීං රාම කීර්තිං ස බහුවාර්ෂිකීම් ।
බ්රහ්මණස්ස්ථානමාසාද්ය තත්ර චාපි මහීයතේ ॥ 13 ॥
යත්කරෝති පරං ධර්ම මුනිර්මූලඵලාශනඃ ।
තත්ර රාජ්ඤශ්චතුර්භාග ප්රජා ධර්මේණ රක්ෂිතඃ ॥ 14 ॥
සෝऽයං බ්රාහ්මණභූයිෂ්ඨෝ වානප්රස්ථගණෝ මහාන් ।
ත්වන්නාථෝऽනාථවද්රාම රාක්ෂසෛර්වධ්යතේ භෘශම් ॥ 15 ॥
ඒහි පශ්ය ශරීරාණි මුනීනාං භාවිතාත්මනාම් ।
හතානාං රාක්ෂසෛර්ඝෝරෛර්බහූනාං බහුධා වනේ ॥ 16 ॥
පංපානදීනිවාසානාමනුමංදාකිනීමපි ।
චිත්රකූටාලයානාං ච ක්රියතේ කදනං මහත් ॥ 17 ॥
ඒවං වයං න මෘෂ්යාමෝ විප්රකාරං තපස්විනාම් ।
ක්රියමාණං වනේ ඝෝරං රක්ෂෝභිර්භීමකර්මභිඃ ॥ 18 ॥
තතස්ත්වාං ශරණාර්ථං ච ශරණ්යං සමුපස්ථිතාඃ ।
පරිපාලය නෝ රාම වධ්යමානාන්නිශාචරෛඃ ॥ 19 ॥
පරා ත්වත්තෝ ගතිර්වීර පෘථිව්යාං නෝපපද්යතේ ।
පරිපාලය න ස්සර්වාන්රාක්ෂසේභ්යෝ නෘපාත්මජ ॥ 20 ॥
ඒතච්ඡ්රුත්වා තු කාකුත්ස්ථස්තාපසානාං තපස්විනාම් ।
ඉදං ප්රෝවාච ධර්මාත්මා සර්වානේව තපස්විනඃ ॥ 21 ॥
නෛවමර්හථ මාං වක්තුමාජ්ඤාප්යෝऽහං තපස්විනාම් ।
කේවලේනාත්මකාර්යේණ ප්රවේෂ්ටව්යං මයා වනම් ॥ 22 ॥
විප්රකාරමපාක්රෂ්ටුං රාක්ෂසෛර්භවතාමිමම් ।
පිතුස්තු නිර්දේශකරඃ ප්රවිෂ්ටෝऽහමිදං වනම් ॥ 23 ॥
භවතාමර්ථසිද්ධ්යර්ථමාගතෝऽහං යදෘච්ඡයා ।
තස්ය මේऽයං වනේ වාසෝ භවිෂ්යති මහාඵලඃ ॥ 24 ॥
තපස්විනාං රණේ ශත්රූන්හංතුමිච්ඡාමි රාක්ෂසාන් ।
පශ්යංතු වීර්යමෘෂයස්සභ්රාතුර්මේ තපෝධනාඃ ॥ 25 ॥
දත්ත්වාऽභයං චාපි තපෝධනානාං ධර්මේ ධෘතාත්මා සහ ලක්ෂ්මණේන ।
තපෝධනෛශ්චාපි සභාජ්යවෘත්තඃ සුතීක්ෂ්ණමේවාභිජගාම වීරඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂෂ්ඨස්සර්ගඃ ॥
