శ్రీమద్వాల్మీకీయ రామాయణే అరణ్యకాండమ్ ।
అథ షష్ఠస్సర్గః ।
శరభంగే దివం ప్రాప్తే మునిసంఘాస్సమాగతాః ।
అభ్యగచ్ఛంత కాకుత్స్థం రామం జ్వలితతేజసమ్ ॥ 1 ॥
వైఖానసా వాలఖిల్యాస్సంప్రక్షాలా మరీచిపాః ।
అశ్మకుట్టాశ్చ బహవః పత్రాహారాశ్చ తాపసాః ॥ 2 ॥
దంతోలూఖలినశ్చైవ తథైవోన్మజ్జకాః పరే ।
గాత్రశయ్యా అశయ్యాశ్చ తథైవాభ్రావకాశకాః ॥ 3 ॥
మునయస్సలిలాహారావాయుభక్షా స్తథాపరే ।
ఆకాశనిలయాశ్చైవ తథా స్థండిలశాయినః ॥ 4 ॥
వ్రతోపవాసినో దాంతాస్తథాఽర్ద్రపటవాససః ।
సజపాశ్చ తపోనిత్యాస్తథా పంచతపోఽన్వితాః ॥ 5 ॥
సర్వే బ్రాహ్మ్యా శ్రియా జుష్టా దృఢయోగాస్సమాహితాః ।
శరభంగాశ్రమే రామమభిజగ్ముశ్చ తాపసాః ॥ 6 ॥
అభిగమ్య చ ధర్మజ్ఞా రామం ధర్మభృతాం వరమ్ ।
ఊచుః పరమధర్మజ్ఞమృషిసంఘాస్సమాహితాః ॥ 7 ॥
త్వమిక్ష్వాకుకులస్యాస్య పృథివ్యాశ్చ మహారథ ।
ప్రధానశ్చాసి నాథశ్చ దేవానాం మఘవానివ ॥ 8 ॥
విశ్రుతస్త్రిషు లోకేషు యశసా విక్రమేణ చ ।
పితృభక్తిశ్చ సత్యం చ త్వయి ధర్మశ్చ పుష్కలః ॥ 9 ॥
త్వామాసాద్య మహాత్మానం ధర్మజ్ఞం ధర్మవత్సలమ్ ।
అర్థిత్వాన్నాథ వక్ష్యామస్తచ్చ నః క్షంతుమర్హసి ॥ 10 ॥
అధర్మస్సుమహాంస్తాత భవేత్తస్య మహీపతేః ।
యో హరేద్బలిషడ్భాగాం న చ రక్షతి పుత్రవత్ ॥ 11 ॥
యుంజానస్స్వానివ ప్రాణాన్ప్రాణైరిష్టాన్సుతానివ ।
నిత్యయుక్తస్సదా రక్షన్సర్వాన్విషయవాసినః ॥ 12 ॥
ప్రాప్నోతి శాశ్వతీం రామ కీర్తిం స బహువార్షికీమ్ ।
బ్రహ్మణస్స్థానమాసాద్య తత్ర చాపి మహీయతే ॥ 13 ॥
యత్కరోతి పరం ధర్మ మునిర్మూలఫలాశనః ।
తత్ర రాజ్ఞశ్చతుర్భాగ ప్రజా ధర్మేణ రక్షితః ॥ 14 ॥
సోఽయం బ్రాహ్మణభూయిష్ఠో వానప్రస్థగణో మహాన్ ।
త్వన్నాథోఽనాథవద్రామ రాక్షసైర్వధ్యతే భృశమ్ ॥ 15 ॥
ఏహి పశ్య శరీరాణి మునీనాం భావితాత్మనామ్ ।
హతానాం రాక్షసైర్ఘోరైర్బహూనాం బహుధా వనే ॥ 16 ॥
పంపానదీనివాసానామనుమందాకినీమపి ।
చిత్రకూటాలయానాం చ క్రియతే కదనం మహత్ ॥ 17 ॥
ఏవం వయం న మృష్యామో విప్రకారం తపస్వినామ్ ।
క్రియమాణం వనే ఘోరం రక్షోభిర్భీమకర్మభిః ॥ 18 ॥
తతస్త్వాం శరణార్థం చ శరణ్యం సముపస్థితాః ।
పరిపాలయ నో రామ వధ్యమానాన్నిశాచరైః ॥ 19 ॥
పరా త్వత్తో గతిర్వీర పృథివ్యాం నోపపద్యతే ।
పరిపాలయ న స్సర్వాన్రాక్షసేభ్యో నృపాత్మజ ॥ 20 ॥
ఏతచ్ఛ్రుత్వా తు కాకుత్స్థస్తాపసానాం తపస్వినామ్ ।
ఇదం ప్రోవాచ ధర్మాత్మా సర్వానేవ తపస్వినః ॥ 21 ॥
నైవమర్హథ మాం వక్తుమాజ్ఞాప్యోఽహం తపస్వినామ్ ।
కేవలేనాత్మకార్యేణ ప్రవేష్టవ్యం మయా వనమ్ ॥ 22 ॥
విప్రకారమపాక్రష్టుం రాక్షసైర్భవతామిమమ్ ।
పితుస్తు నిర్దేశకరః ప్రవిష్టోఽహమిదం వనమ్ ॥ 23 ॥
భవతామర్థసిద్ధ్యర్థమాగతోఽహం యదృచ్ఛయా ।
తస్య మేఽయం వనే వాసో భవిష్యతి మహాఫలః ॥ 24 ॥
తపస్వినాం రణే శత్రూన్హంతుమిచ్ఛామి రాక్షసాన్ ।
పశ్యంతు వీర్యమృషయస్సభ్రాతుర్మే తపోధనాః ॥ 25 ॥
దత్త్వాఽభయం చాపి తపోధనానాం ధర్మే ధృతాత్మా సహ లక్ష్మణేన ।
తపోధనైశ్చాపి సభాజ్యవృత్తః సుతీక్ష్ణమేవాభిజగామ వీరః ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే షష్ఠస్సర్గః ॥
