શ્રીમદ્વાલ્મીકીય રામાયણે અરણ્યકાંડમ્ ।
અથ ષષ્ઠસ્સર્ગઃ ।
શરભંગે દિવં પ્રાપ્તે મુનિસંઘાસ્સમાગતાઃ ।
અભ્યગચ્છંત કાકુત્સ્થં રામં જ્વલિતતેજસમ્ ॥ 1 ॥
વૈખાનસા વાલખિલ્યાસ્સંપ્રક્ષાલા મરીચિપાઃ ।
અશ્મકુટ્ટાશ્ચ બહવઃ પત્રાહારાશ્ચ તાપસાઃ ॥ 2 ॥
દંતોલૂખલિનશ્ચૈવ તથૈવોન્મજ્જકાઃ પરે ।
ગાત્રશય્યા અશય્યાશ્ચ તથૈવાભ્રાવકાશકાઃ ॥ 3 ॥
મુનયસ્સલિલાહારાવાયુભક્ષા સ્તથાપરે ।
આકાશનિલયાશ્ચૈવ તથા સ્થંડિલશાયિનઃ ॥ 4 ॥
વ્રતોપવાસિનો દાંતાસ્તથાઽર્દ્રપટવાસસઃ ।
સજપાશ્ચ તપોનિત્યાસ્તથા પંચતપોઽન્વિતાઃ ॥ 5 ॥
સર્વે બ્રાહ્મ્યા શ્રિયા જુષ્ટા દૃઢયોગાસ્સમાહિતાઃ ।
શરભંગાશ્રમે રામમભિજગ્મુશ્ચ તાપસાઃ ॥ 6 ॥
અભિગમ્ય ચ ધર્મજ્ઞા રામં ધર્મભૃતાં વરમ્ ।
ઊચુઃ પરમધર્મજ્ઞમૃષિસંઘાસ્સમાહિતાઃ ॥ 7 ॥
ત્વમિક્ષ્વાકુકુલસ્યાસ્ય પૃથિવ્યાશ્ચ મહારથ ।
પ્રધાનશ્ચાસિ નાથશ્ચ દેવાનાં મઘવાનિવ ॥ 8 ॥
વિશ્રુતસ્ત્રિષુ લોકેષુ યશસા વિક્રમેણ ચ ।
પિતૃભક્તિશ્ચ સત્યં ચ ત્વયિ ધર્મશ્ચ પુષ્કલઃ ॥ 9 ॥
ત્વામાસાદ્ય મહાત્માનં ધર્મજ્ઞં ધર્મવત્સલમ્ ।
અર્થિત્વાન્નાથ વક્ષ્યામસ્તચ્ચ નઃ ક્ષંતુમર્હસિ ॥ 10 ॥
અધર્મસ્સુમહાંસ્તાત ભવેત્તસ્ય મહીપતેઃ ।
યો હરેદ્બલિષડ્ભાગાં ન ચ રક્ષતિ પુત્રવત્ ॥ 11 ॥
યુંજાનસ્સ્વાનિવ પ્રાણાન્પ્રાણૈરિષ્ટાન્સુતાનિવ ।
નિત્યયુક્તસ્સદા રક્ષન્સર્વાન્વિષયવાસિનઃ ॥ 12 ॥
પ્રાપ્નોતિ શાશ્વતીં રામ કીર્તિં સ બહુવાર્ષિકીમ્ ।
બ્રહ્મણસ્સ્થાનમાસાદ્ય તત્ર ચાપિ મહીયતે ॥ 13 ॥
યત્કરોતિ પરં ધર્મ મુનિર્મૂલફલાશનઃ ।
તત્ર રાજ્ઞશ્ચતુર્ભાગ પ્રજા ધર્મેણ રક્ષિતઃ ॥ 14 ॥
સોઽયં બ્રાહ્મણભૂયિષ્ઠો વાનપ્રસ્થગણો મહાન્ ।
ત્વન્નાથોઽનાથવદ્રામ રાક્ષસૈર્વધ્યતે ભૃશમ્ ॥ 15 ॥
એહિ પશ્ય શરીરાણિ મુનીનાં ભાવિતાત્મનામ્ ।
હતાનાં રાક્ષસૈર્ઘોરૈર્બહૂનાં બહુધા વને ॥ 16 ॥
પંપાનદીનિવાસાનામનુમંદાકિનીમપિ ।
ચિત્રકૂટાલયાનાં ચ ક્રિયતે કદનં મહત્ ॥ 17 ॥
એવં વયં ન મૃષ્યામો વિપ્રકારં તપસ્વિનામ્ ।
ક્રિયમાણં વને ઘોરં રક્ષોભિર્ભીમકર્મભિઃ ॥ 18 ॥
તતસ્ત્વાં શરણાર્થં ચ શરણ્યં સમુપસ્થિતાઃ ।
પરિપાલય નો રામ વધ્યમાનાન્નિશાચરૈઃ ॥ 19 ॥
પરા ત્વત્તો ગતિર્વીર પૃથિવ્યાં નોપપદ્યતે ।
પરિપાલય ન સ્સર્વાન્રાક્ષસેભ્યો નૃપાત્મજ ॥ 20 ॥
એતચ્છ્રુત્વા તુ કાકુત્સ્થસ્તાપસાનાં તપસ્વિનામ્ ।
ઇદં પ્રોવાચ ધર્માત્મા સર્વાનેવ તપસ્વિનઃ ॥ 21 ॥
નૈવમર્હથ માં વક્તુમાજ્ઞાપ્યોઽહં તપસ્વિનામ્ ।
કેવલેનાત્મકાર્યેણ પ્રવેષ્ટવ્યં મયા વનમ્ ॥ 22 ॥
વિપ્રકારમપાક્રષ્ટું રાક્ષસૈર્ભવતામિમમ્ ।
પિતુસ્તુ નિર્દેશકરઃ પ્રવિષ્ટોઽહમિદં વનમ્ ॥ 23 ॥
ભવતામર્થસિદ્ધ્યર્થમાગતોઽહં યદૃચ્છયા ।
તસ્ય મેઽયં વને વાસો ભવિષ્યતિ મહાફલઃ ॥ 24 ॥
તપસ્વિનાં રણે શત્રૂન્હંતુમિચ્છામિ રાક્ષસાન્ ।
પશ્યંતુ વીર્યમૃષયસ્સભ્રાતુર્મે તપોધનાઃ ॥ 25 ॥
દત્ત્વાઽભયં ચાપિ તપોધનાનાં ધર્મે ધૃતાત્મા સહ લક્ષ્મણેન ।
તપોધનૈશ્ચાપિ સભાજ્યવૃત્તઃ સુતીક્ષ્ણમેવાભિજગામ વીરઃ ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે ષષ્ઠસ્સર્ગઃ ॥
