ශ්රීමද්වාල්මීකීය රාමායණේ අරණ්යකාංඩම් ।
අථ ද්විෂෂ්ටිතමස්සර්ගඃ ।
සීතාමපශ්යංධර්මාත්මා ශෝකෝපහතචේතනඃ ।
විලලාප මහාබාහූ රාමඃ කමලලෝචනඃ ॥ 1 ॥
පශ්යන්නිව ච තාං සීතාමපශ්යන්මදනාර්දිතඃ ।
උවාච රාඝවෝ වාක්යං විලාපාශ්රයදුර්වචම් ॥ 2 ॥
ත්වමශෝකස්ය ශාඛාභිඃ පුෂ්පප්රියතයා ප්රියේ ।
ආවෘණෝෂි ශරීරං තේ මම ශෝකවිවර්ධිනී ॥ 3 ॥
කදලීස්කංධසදෘශෞ කදල්යා සංවෘතාවුභෞ ।
ඌරූ පශ්යාමි තේ දේවි නාසි ශක්තා නිගූහිතුම් ॥ 4 ॥
කර්ණිකාරවනං භද්රේ හසංතී දේවි සේවසේ ।
අලං තේ පරිහාසේන මම බාධාවහේන වෛ ॥ 5 ॥
පරිහාසේන කිං සීතේ පරිශ්රාංතස්ය මේ ප්රියේ ।
අයං ස පරිහාසෝऽපි සාධු දේවි න රෝචතේ ॥ 6 ॥
විශේෂේණාශ්රමස්ථානේ හාසෝऽයං න ප්රශස්යතේ ।
අවගච්ඡාමි තේ ශීලං පරිහාසප්රියං ප්රියේ ॥ 7 ॥
ආගච්ඡ ත්වං විශාලාක්ෂි ශූන්යෝऽයමුටජස්තව ।
සුව්යක්තං රාක්ෂසෛස්සීතා භක්ෂිතා වා හෘතාපි වා ॥ 8 ॥
න හි සා විලපංතං මාමුපසංප්රෛති ලක්ෂ්මණ ।
ඒතානි මෘගයූථානි සාශ්රුනේත්රාණි ලක්ෂ්මණ ॥ 9 ॥
ශංසංතීව හි වෛදේහීං භක්ෂිතාං රජනීචරෛඃ ।
හා මමාර්යේ ක්ව යාතාසි හා සාධ්වි වරවර්ණිනි ॥ 10 ॥
හා සකාමා ත්වයා දේවී කෛකේයී සා භවිෂ්යති ।
සීතයා සහ නිර්යාතෝ විනා සීතාමුපාගතඃ ॥ 11 ॥
කථං නාම ප්රවේක්ෂ්යාමි ශූන්යමංතඃපුරං පුනඃ ।
නිර්වීර්ය ඉති ලෝකෝ මාං නිර්දයශ්චේති වක්ෂ්යති ॥ 12 ॥
කාතරත්වං ප්රකාශං හි සීතාපනයනේන මේ ।
නිවෘත්තවනවාසශ්ච ජනකං මිථිලාධිපම් ॥ 13 ॥
කුශලං පරිපෘච්ඡංතං කථං ශක්ෂ්යේ නිරීක්ෂිතුම් ।
විදේහරාජෝ නූනං මාං දෘෂ්ට්වා විරහිතං තයා ॥ 14 ॥
සුතාස්නේහේන සංතප්තෝ මෝහස්ය වශමේෂ්යති ।
අථවා න ගමිෂ්යාමි පුරීං භරතපාලිතාම් ॥ 15 ॥
ස්වර්ගෝऽපි සීතයා හීනශ්ශූන්ය ඒව මතෝ මම ।
මාමිහෝත්සෘජ්ය හි වනේ ගච්ඡායෝධ්යාං පුරීං ශුභාම් ॥ 16 ॥
න ත්වහං තාං විනා සීතාං ජීවේයං හි කථංචන ।
ගාඪමාශ්ලිෂ්ය භරතෝ වාච්යෝ මද්වචනාත්ත්වයා ॥ 17 ॥
අනුජ්ඤාතෝऽසි රාමේණ පාලයේති වසුංධරාම් ।
අංබා ච මම කෛකේයී සුමිත්රා ච ත්වයා විභෝ ॥ 18 ॥
කෞසල්යා ච යථාන්යායමභිවාද්යා මමාऽජ්ඤයා ।
රක්ෂණීයා ප්රයත්නේන භවතා සූක්තකාරිණා ॥ 19 ॥
සීතායාශ්ච විනාශෝऽයං මම චාමිත්රකර්ශන ।
විස්තරේණ ජනන්යා මේ විනිවේද්යස්ත්වයා භවේත් ॥ 20 ॥
ඉති විලපති රාඝවේ සුදීනේ වනමුපගම්ය තයා විනා සුකේශ්යා ।
භයවිකලමුඛස්තු ලක්ෂ්මණෝऽපි ව්යථිතමනා භෘශමාතුරෝ බභූව ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්විෂෂ්ටිතමස්සර්ගඃ ॥
