শ্রীমদ্বাল্মীকীয় রামাযণে অরণ্যকাংডম্ ।
অথ দ্বিষষ্টিতমস্সর্গঃ ।
সীতামপশ্য়ংধর্মাত্মা শোকোপহতচেতনঃ ।
বিললাপ মহাবাহূ রামঃ কমললোচনঃ ॥ 1 ॥
পশ্যন্নিব চ তাং সীতামপশ্যন্মদনার্দিতঃ ।
উবাচ রাঘবো বাক্য়ং বিলাপাশ্রযদুর্বচম্ ॥ 2 ॥
ত্বমশোকস্য় শাখাভিঃ পুষ্পপ্রিযতয়া প্রিয়ে ।
আবৃণোষি শরীরং তে মম শোকবিবর্ধিনী ॥ 3 ॥
কদলীস্কংধসদৃশৌ কদল্য়া সংবৃতাবুভৌ ।
ঊরূ পশ্য়ামি তে দেবি নাসি শক্তা নিগূহিতুম্ ॥ 4 ॥
কর্ণিকারবনং ভদ্রে হসংতী দেবি সেবসে ।
অলং তে পরিহাসেন মম বাধাবহেন বৈ ॥ 5 ॥
পরিহাসেন কিং সীতে পরিশ্রাংতস্য় মে প্রিয়ে ।
অয়ং স পরিহাসোঽপি সাধু দেবি ন রোচতে ॥ 6 ॥
বিশেষেণাশ্রমস্থানে হাসোঽয়ং ন প্রশস্যতে ।
অবগচ্ছামি তে শীলং পরিহাসপ্রিয়ং প্রিয়ে ॥ 7 ॥
আগচ্ছ ত্বং বিশালাক্ষি শূন্য়োঽযমুটজস্তব ।
সুব্যক্তং রাক্ষসৈস্সীতা ভক্ষিতা বা হৃতাপি বা ॥ 8 ॥
ন হি সা বিলপংতং মামুপসংপ্রৈতি লক্ষ্মণ ।
এতানি মৃগয়ূথানি সাশ্রুনেত্রাণি লক্ষ্মণ ॥ 9 ॥
শংসংতীব হি বৈদেহীং ভক্ষিতাং রজনীচরৈঃ ।
হা মমার্য়ে ক্ব যাতাসি হা সাধ্বি বরবর্ণিনি ॥ 10 ॥
হা সকামা ত্বয়া দেবী কৈকেয়ী সা ভবিষ্যতি ।
সীতয়া সহ নির্য়াতো বিনা সীতামুপাগতঃ ॥ 11 ॥
কথং নাম প্রবেক্ষ্য়ামি শূন্যমংতঃপুরং পুনঃ ।
নির্বীর্য় ইতি লোকো মাং নির্দযশ্চেতি বক্ষ্যতি ॥ 12 ॥
কাতরত্বং প্রকাশং হি সীতাপনযনেন মে ।
নিবৃত্তবনবাসশ্চ জনকং মিথিলাধিপম্ ॥ 13 ॥
কুশলং পরিপৃচ্ছংতং কথং শক্ষ্য়ে নিরীক্ষিতুম্ ।
বিদেহরাজো নূনং মাং দৃষ্ট্বা বিরহিতং তয়া ॥ 14 ॥
সুতাস্নেহেন সংতপ্তো মোহস্য় বশমেষ্যতি ।
অথবা ন গমিষ্য়ামি পুরীং ভরতপালিতাম্ ॥ 15 ॥
স্বর্গোঽপি সীতয়া হীনশ্শূন্য় এব মতো মম ।
মামিহোত্সৃজ্য় হি বনে গচ্ছায়োধ্য়াং পুরীং শুভাম্ ॥ 16 ॥
ন ত্বহং তাং বিনা সীতাং জীবেয়ং হি কথংচন ।
গাঢমাশ্লিষ্য় ভরতো বাচ্য়ো মদ্বচনাত্ত্বয়া ॥ 17 ॥
অনুজ্ঞাতোঽসি রামেণ পালয়েতি বসুংধরাম্ ।
অংবা চ মম কৈকেয়ী সুমিত্রা চ ত্বয়া বিভো ॥ 18 ॥
কৌসল্য়া চ যথান্য়াযমভিবাদ্য়া মমাঽজ্ঞয়া ।
রক্ষণীয়া প্রযত্নেন ভবতা সূক্তকারিণা ॥ 19 ॥
সীতায়াশ্চ বিনাশোঽয়ং মম চামিত্রকর্শন ।
বিস্তরেণ জনন্য়া মে বিনিবেদ্যস্ত্বয়া ভবেত্ ॥ 20 ॥
ইতি বিলপতি রাঘবে সুদীনে বনমুপগম্য় তয়া বিনা সুকেশ্য়া ।
ভযবিকলমুখস্তু লক্ষ্মণোঽপি ব্যথিতমনা ভৃশমাতুরো বভূব ॥ 21 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে দ্বিষষ্টিতমস্সর্গঃ ॥
