শ্রীমদ্বাল্মীকীয় রামাযণে অরণ্যকাংডম্ ।
অথ ত্রিষষ্টিতমস্সর্গঃ ।
স রাজপুত্রঃ প্রিযয়া বিহীনঃ শোকেন মোহেন চ পীড্যমানঃ ।
বিষাদযন্ভ্রাতরমার্তরূপো ভূয়ো বিষাদং প্রবিবেশ তীব্রম্ ॥ 1 ॥
স লক্ষ্মণং শোকবশাভিপন্নং শোকে নিমগ্নো বিপুলে তু রামঃ ।
উবাচ বাক্য়ং ব্যসনানুরূপমুষ্ণং বিনিশ্শ্বস্য় রুদংত্সশোকম্ ॥ 2 ॥
ন মদ্বিধো দুষ্কৃতকর্মকারী মন্য়ে দ্বিতীয়োঽস্তি বসুংধরায়াম্ ।
শোকেন শোকো হি পরংপরায়া মা মেতি ভিংদন্হৃদয়ং মনশ্চ ॥ 3 ॥
পূর্বং ময়া নূনমভীপ্সিতানি পাপানি কর্মাণ্যসকৃত্কৃতানি ।
তত্রাযমদ্য়াপতিতো বিপাকো দুঃখেন দুঃখং যদহং বিশামি ॥ 4 ॥
রাজ্যপ্রণাশস্স্বজনৈর্বিয়োগঃ পিতুর্বিনাশো জননীবিয়োগঃ ।
সর্বাণি মে লক্ষ্মণ শোকবেগমাপূরয়ংতি প্রবিচিংতিতানি ॥ 5 ॥
সর্বং তু দুঃখং মম লক্ষ্মণেদং শাংতং শরীরে বনমেত্য় শূন্যম্ ।
সীতাবিয়োগাত্পুনরপ্য়ুদীর্ণং কাষ্ঠৈরিবাগ্নিস্সহসা প্রদীপ্তঃ ॥ 6 ॥
সা নূনমার্য়া মম রাক্ষসেন বলাদ্দৃতা খং সমুপেত্য় ভীরুঃ ।
অপস্বরং সস্বরবিপ্রলাপা ভয়েন বিক্রংদিতবত্যভীক্ষ্ণম্ ॥ 7 ॥
তৌ লোহিতস্য় প্রিযদর্শনস্য় সদোচিতাবুত্তমচংদনস্য় ।
বৃত্তৌ স্তনৌ শোণিতপংকদিগ্ধৌ নূনং প্রিয়ায়া মম নাভিভাতঃ ॥ 8 ॥
তচ্ছলক্ষ্ণসুব্যক্তমৃদুপ্রলাপং তস্য়া মুখং কুংচিতকেশভারম্ ।
রক্ষোবশং নূনমুপাগতায়া ন ভ্রাজতে রাহুমুখে যথেংদুঃ ॥ 9 ॥
তাং হারপাশস্য় সদোচিতায়া গ্রীবাং প্রিয়ায়া মম সুব্রতায়াঃ ।
রক্ষাংসি নূনং পরিপীতবংতি বিভিদ্য় শূন্য়ে রুধিরাশনানি ॥ 10 ॥
ময়া বিহীনা বিজনে বনে যা রক্ষোভিরাহৃত্য় বিকৃষ্যমাণা ।
নূনং নিনাদং কুররীব দীনা সা মুক্তবত্য়াযতকাংতনেত্রা ॥ 11 ॥
অস্মিন্ময়াসার্ধমুদারশীলা শিলাতলে পূর্বমুপোপবিষ্টা ।
কাংতস্মিতা লক্ষ্মণ জাতহাসা ত্বামাহ সীতা বহুবাক্যজাতম্ ॥ 12 ॥
গোদাবরীয়ং সরিতাং বরিষ্ঠা প্রিয়া প্রিয়ায়া মম নিত্যকালম্ ।
অপ্যত্র গচ্ছেদিতি চিংতয়ামি নৈকাকিনী যাতি হি সা কদাচিত্ ॥ 13 ॥
পদ্মাননা পদ্মবিশালনেত্রা পদ্মানি বানেতুমভিপ্রয়াতা ।
তদপ্যয়ুক্তং ন হি সা কদাচিন্ময়া বিনা গচ্ছতি পংকজানি ॥ 14 ॥
কামং ত্বিদং পুষ্পিতবৃক্ষষংডং নানাবিধৈঃ পক্ষিগণৈরুপেতম্ ।
বনং প্রয়াতা নু তদপ্যয়ুক্ত মেকাকিনী সাতিবিভেতি ভীরুঃ ॥ 15 ॥
আদিত্য় ভো লোককৃতাকৃতজ্ঞ লোকস্য় সত্য়ানৃতকর্মসাক্ষিন্ ।
মম প্রিয়া সা ক্ব গতা হৃতা বা শংসস্ব মে শোকবশস্য় নিত্যম্ ॥ 16 ॥
লোকেষু সর্বেষু চ নাস্তি কিংচিদ্যত্তে ন নিত্য়ং বিদিতং ভবেত্তত্ ।
শংসস্ব বায়ো কুলশালিনীং তাং হৃতা মৃতা বা পথি বর্ততে বা ॥ 17 ॥
ইতীব তং শোকবিধেযদেহং রামং বিসংজ্ঞং বিলপংতমেবম্ ।
উবাচ সৌমিত্রিরদীনসত্ত্বো ন্য়ায়ে স্থিতঃ কালয়ুতং চ বাক্যম্ ॥ 18 ॥
শোকং বিমুংচার্য় ধৃতিং ভজস্ব সোত্সাহতা চাস্তু বিমার্গণেঽস্য়াঃ ।
উত্সাহবংতো হি নরা ন লোকে সীদংতি কর্মস্বতিদুষ্করেষু ॥ 19 ॥
ইতীব সৌমিত্রিমুদগ্রপৌরুষং ব্রুবংতমার্তো রঘুবংশবর্ধনঃ ।
ন চিংতয়ামাস ধৃতিং বিমুক্তবান্পুনশ্চ দুঃখং মহদভ্য়ুপাগমত্ ॥ 20 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ত্রিষষ্টিতমস্সর্গঃ ॥
