ශ්රීමද්වාල්මීකීය රාමායණේ අරණ්යකාංඩම් ।
අථ ත්රිෂෂ්ටිතමස්සර්ගඃ ।
ස රාජපුත්රඃ ප්රියයා විහීනඃ ශෝකේන මෝහේන ච පීඩ්යමානඃ ।
විෂාදයන්භ්රාතරමාර්තරූපෝ භූයෝ විෂාදං ප්රවිවේශ තීව්රම් ॥ 1 ॥
ස ලක්ෂ්මණං ශෝකවශාභිපන්නං ශෝකේ නිමග්නෝ විපුලේ තු රාමඃ ।
උවාච වාක්යං ව්යසනානුරූපමුෂ්ණං විනිශ්ශ්වස්ය රුදංත්සශෝකම් ॥ 2 ॥
න මද්විධෝ දුෂ්කෘතකර්මකාරී මන්යේ ද්විතීයෝऽස්ති වසුංධරායාම් ।
ශෝකේන ශෝකෝ හි පරංපරායා මා මේති භිංදන්හෘදයං මනශ්ච ॥ 3 ॥
පූර්වං මයා නූනමභීප්සිතානි පාපානි කර්මාණ්යසකෘත්කෘතානි ।
තත්රායමද්යාපතිතෝ විපාකෝ දුඃඛේන දුඃඛං යදහං විශාමි ॥ 4 ॥
රාජ්යප්රණාශස්ස්වජනෛර්වියෝගඃ පිතුර්විනාශෝ ජනනීවියෝගඃ ।
සර්වාණි මේ ලක්ෂ්මණ ශෝකවේගමාපූරයංති ප්රවිචිංතිතානි ॥ 5 ॥
සර්වං තු දුඃඛං මම ලක්ෂ්මණේදං ශාංතං ශරීරේ වනමේත්ය ශූන්යම් ।
සීතාවියෝගාත්පුනරප්යුදීර්ණං කාෂ්ඨෛරිවාග්නිස්සහසා ප්රදීප්තඃ ॥ 6 ॥
සා නූනමාර්යා මම රාක්ෂසේන බලාද්දෘතා ඛං සමුපේත්ය භීරුඃ ।
අපස්වරං සස්වරවිප්රලාපා භයේන වික්රංදිතවත්යභීක්ෂ්ණම් ॥ 7 ॥
තෞ ලෝහිතස්ය ප්රියදර්ශනස්ය සදෝචිතාවුත්තමචංදනස්ය ।
වෘත්තෞ ස්තනෞ ශෝණිතපංකදිග්ධෞ නූනං ප්රියායා මම නාභිභාතඃ ॥ 8 ॥
තච්ඡලක්ෂ්ණසුව්යක්තමෘදුප්රලාපං තස්යා මුඛං කුංචිතකේශභාරම් ।
රක්ෂෝවශං නූනමුපාගතායා න භ්රාජතේ රාහුමුඛේ යථේංදුඃ ॥ 9 ॥
තාං හාරපාශස්ය සදෝචිතායා ග්රීවාං ප්රියායා මම සුව්රතායාඃ ।
රක්ෂාංසි නූනං පරිපීතවංති විභිද්ය ශූන්යේ රුධිරාශනානි ॥ 10 ॥
මයා විහීනා විජනේ වනේ යා රක්ෂෝභිරාහෘත්ය විකෘෂ්යමාණා ।
නූනං නිනාදං කුරරීව දීනා සා මුක්තවත්යායතකාංතනේත්රා ॥ 11 ॥
අස්මින්මයාසාර්ධමුදාරශීලා ශිලාතලේ පූර්වමුපෝපවිෂ්ටා ।
කාංතස්මිතා ලක්ෂ්මණ ජාතහාසා ත්වාමාහ සීතා බහුවාක්යජාතම් ॥ 12 ॥
ගෝදාවරීයං සරිතාං වරිෂ්ඨා ප්රියා ප්රියායා මම නිත්යකාලම් ।
අප්යත්ර ගච්ඡේදිති චිංතයාමි නෛකාකිනී යාති හි සා කදාචිත් ॥ 13 ॥
පද්මානනා පද්මවිශාලනේත්රා පද්මානි වානේතුමභිප්රයාතා ।
තදප්යයුක්තං න හි සා කදාචින්මයා විනා ගච්ඡති පංකජානි ॥ 14 ॥
කාමං ත්විදං පුෂ්පිතවෘක්ෂෂංඩං නානාවිධෛඃ පක්ෂිගණෛරුපේතම් ।
වනං ප්රයාතා නු තදප්යයුක්ත මේකාකිනී සාතිබිභේති භීරුඃ ॥ 15 ॥
ආදිත්ය භෝ ලෝකකෘතාකෘතජ්ඤ ලෝකස්ය සත්යානෘතකර්මසාක්ෂින් ।
මම ප්රියා සා ක්ව ගතා හෘතා වා ශංසස්ව මේ ශෝකවශස්ය නිත්යම් ॥ 16 ॥
ලෝකේෂු සර්වේෂු ච නාස්ති කිංචිද්යත්තේ න නිත්යං විදිතං භවේත්තත් ।
ශංසස්ව වායෝ කුලශාලිනීං තාං හෘතා මෘතා වා පථි වර්තතේ වා ॥ 17 ॥
ඉතීව තං ශෝකවිධේයදේහං රාමං විසංජ්ඤං විලපංතමේවම් ।
උවාච සෞමිත්රිරදීනසත්ත්වෝ න්යායේ ස්ථිතඃ කාලයුතං ච වාක්යම් ॥ 18 ॥
ශෝකං විමුංචාර්ය ධෘතිං භජස්ව සෝත්සාහතා චාස්තු විමාර්ගණේऽස්යාඃ ।
උත්සාහවංතෝ හි නරා න ලෝකේ සීදංති කර්මස්වතිදුෂ්කරේෂු ॥ 19 ॥
ඉතීව සෞමිත්රිමුදග්රපෞරුෂං බ්රුවංතමාර්තෝ රඝුවංශවර්ධනඃ ।
න චිංතයාමාස ධෘතිං විමුක්තවාන්පුනශ්ච දුඃඛං මහදභ්යුපාගමත් ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ත්රිෂෂ්ටිතමස්සර්ගඃ ॥
