ශ්රීමද්වාල්මීකීය රාමායණේ අරණ්යකාංඩම් ।
අථ ෂට්ෂෂ්ටිතමස්සර්ගඃ ।
තං තථා ශෝකසංතප්තං විලපංතමනාථවත් ।
මෝහේන මහතාවිෂ්ටං පරිද්යූනමචේතනම් ॥ 1 ॥
තතස්සෞමිත්රිරාශ්වාස්ය මුහූර්තාදිව ලක්ෂ්මණඃ ।
රාමං සංබෝධයාමාස චරණෞ චාභිපීඩයන් ॥ 2 ॥
මහතා තපසා රාම මහතා චාපි කර්මණා ।
රාජ්ඤා දශරථේනාසි ලබ්ධෝऽමෘතමිවාමරෛඃ ॥ 3 ॥
තව චෛව ගුණෛර්බද්ධස්ත්වද්වියෝගාන්මහීපතිඃ ।
රාජා දේවත්වමාපන්නෝ භරතස්ය යථාශ්රුතම් ॥ 4 ॥
යදි දුඃඛමිදං ප්රාප්තං කාකුත්ස්ථ න සහිෂ්යසේ ।
ප්රාකෘතශ්චාල්පසත්ත්වශ්ච ඉතරඃ කස්සහිෂ්යති ॥ 5 ॥
දුඃඛිතෝ හි භවාන්ලෝකාංස්තේජසා යදි ධක්ෂ්යතේ ।
ආර්තාඃ ප්රජා නරව්යාඝ්ර ක්ව නු යාස්යංති නිර්වෘතිම් ॥ 6 ॥
ලෝකස්වභාව ඒවෛෂ යයාතිර්නහුෂාත්මජඃ ।
ගතශ්ශක්රේණ සාලෝක්යමනයස්තං සමස්පෘශත් ॥ 7 ॥
මහර්ෂිර්යෝ වසිෂ්ඨස්තු යඃ පිතුර්නඃ පුරෝහිතඃ ।
අහ්නා පුත්රශතං ජජ්ඤේ තථෛවාස්ය පුනර්හතම් ॥ 8 ॥
යා චේයං ජගතාං මාතා දේවී ලෝකනමස්කෘතා ।
අස්යාශ්ච චලනං භූමේර්දෘශ්යතේ සත්යසංශ්රව ॥ 9 ॥
යෞ ධර්මෞ ජගතාං නේත්රෞ යත්ර සර්වං ප්රතිෂ්ඨිතම් ।
ආදිත්යචංද්රෞ ග්රහණමභ්යුපේතෞ මහාබලෞ ॥ 10 ॥
සුමහාංත්යපි භූතානි දේවාශ්ච පුරුෂර්ෂභ ।
න දෛවස්ය ප්රමුංචංති සර්වභූතානි දේහිනඃ ॥ 11 ॥
ශක්රාදිෂ්වපි දේවේෂු වර්තමානෞ නයානයෞ ।
ශ්රූයේතේ නරශාර්දූල න ත්වං ශෝචිතුමර්හසි ॥ 12 ॥
නෂ්ටායාමපි වෛදේහ්යාං හෘතායාමපි චානඝ ශෝචිතුං නාර්හසේ වීර යථාන්යඃ ප්රාකෘතස්තථා ॥ 13 ॥
ත්වව්දිධා න හි ශෝචංති සතතං සත්යදර්ශිනඃ ।
සුමහත්ස්වපි කෘච්ඡ්රේෂු රාමානිර්විණ්ණදර්ශනාඃ ॥ 14 ॥
තත්ත්වතෝ හි නරශ්රේෂ්ඨ බුද්ධ්යා සමනුචිංතය ।
බුධ්ද්යා යුක්තා මහාප්රාජ්ඤා විජානංති ශුභාශුභේ ॥ 15 ॥
අදෘෂ්ටගුණදෝෂාණාමධ්රුවාණාං තු කර්මණාම් ।
නාංතරේණ ක්රියාං තේෂාං ඵලමිෂ්ටං ප්රවර්තතේ ॥ 16 ॥
ත්වමේව හි පුරා රාම මාමේවං බහුශෝऽන්වශාඃ ।
අනුශිෂ්යාද්ධි කෝ නු ත්වාමපි සාක්ෂාද්බෘහස්පතිඃ ॥ 17 ॥
බුද්ධිශ්ච තේ මහාප්රාජ්ඤ දේවෛරපි දුරන්වයා ।
ශෝකේනාභිප්රසුප්තං තේ ජ්ඤානං සංබෝධයාම්යහම් ॥ 18 ॥
දිව්යං ච මානුෂං ච ත්වමාත්මනශ්ච පරාක්රමම් ।
ඉක්ෂ්වාකුවෘෂභාවේක්ෂ්ය යතස්ව ද්විෂතාං වධේ ॥ 19 ॥
කිං තේන සර්වනාශේන කෘතේන පුරුෂර්ෂභ ।
තමේව ත්වං රිපුං පාපං විජ්ඤායෝද්ධර්තුමර්හසි ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂට්ෂෂ්ටිතමස්සර්ගඃ ॥
