ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଷଟ୍ଷଷ୍ଟିତମସ୍ସର୍ଗଃ ।
ତଂ ତଥା ଶୋକସଂତପ୍ତଂ ଵିଲପଂତମନାଥଵତ୍ ।
ମୋହେନ ମହତାଵିଷ୍ଟଂ ପରିଦ୍ୟୂନମଚେତନମ୍ ॥ 1 ॥
ତତସ୍ସୌମିତ୍ରିରାଶ୍ଵାସ୍ୟ ମୁହୂର୍ତାଦିଵ ଲକ୍ଷ୍ମଣଃ ।
ରାମଂ ସଂବୋଧୟାମାସ ଚରଣୌ ଚାଭିପୀଡୟନ୍ ॥ 2 ॥
ମହତା ତପସା ରାମ ମହତା ଚାପି କର୍ମଣା ।
ରାଜ୍ଞା ଦଶରଥେନାସି ଲବ୍ଧୋଽମୃତମିଵାମରୈଃ ॥ 3 ॥
ତଵ ଚୈଵ ଗୁଣୈର୍ବଦ୍ଧସ୍ତ୍ଵଦ୍ଵିୟୋଗାନ୍ମହୀପତିଃ ।
ରାଜା ଦେଵତ୍ଵମାପନ୍ନୋ ଭରତସ୍ୟ ୟଥାଶ୍ରୁତମ୍ ॥ 4 ॥
ୟଦି ଦୁଃଖମିଦଂ ପ୍ରାପ୍ତଂ କାକୁତ୍ସ୍ଥ ନ ସହିଷ୍ୟସେ ।
ପ୍ରାକୃତଶ୍ଚାଲ୍ପସତ୍ତ୍ଵଶ୍ଚ ଇତରଃ କସ୍ସହିଷ୍ୟତି ॥ 5 ॥
ଦୁଃଖିତୋ ହି ଭଵାନ୍ଲୋକାଂସ୍ତେଜସା ୟଦି ଧକ୍ଷ୍ୟତେ ।
ଆର୍ତାଃ ପ୍ରଜା ନରଵ୍ୟାଘ୍ର କ୍ଵ ନୁ ୟାସ୍ୟଂତି ନିର୍ଵୃତିମ୍ ॥ 6 ॥
ଲୋକସ୍ଵଭାଵ ଏଵୈଷ ୟୟାତିର୍ନହୁଷାତ୍ମଜଃ ।
ଗତଶ୍ଶକ୍ରେଣ ସାଲୋକ୍ୟମନୟସ୍ତଂ ସମସ୍ପୃଶତ୍ ॥ 7 ॥
ମହର୍ଷିର୍ୟୋ ଵସିଷ୍ଠସ୍ତୁ ୟଃ ପିତୁର୍ନଃ ପୁରୋହିତଃ ।
ଅହ୍ନା ପୁତ୍ରଶତଂ ଜଜ୍ଞେ ତଥୈଵାସ୍ୟ ପୁନର୍ହତମ୍ ॥ 8 ॥
ୟା ଚେୟଂ ଜଗତାଂ ମାତା ଦେଵୀ ଲୋକନମସ୍କୃତା ।
ଅସ୍ୟାଶ୍ଚ ଚଲନଂ ଭୂମେର୍ଦୃଶ୍ୟତେ ସତ୍ୟସଂଶ୍ରଵ ॥ 9 ॥
ୟୌ ଧର୍ମୌ ଜଗତାଂ ନେତ୍ରୌ ୟତ୍ର ସର୍ଵଂ ପ୍ରତିଷ୍ଠିତମ୍ ।
ଆଦିତ୍ୟଚଂଦ୍ରୌ ଗ୍ରହଣମଭ୍ୟୁପେତୌ ମହାବଲୌ ॥ 10 ॥
ସୁମହାଂତ୍ୟପି ଭୂତାନି ଦେଵାଶ୍ଚ ପୁରୁଷର୍ଷଭ ।
ନ ଦୈଵସ୍ୟ ପ୍ରମୁଂଚଂତି ସର୍ଵଭୂତାନି ଦେହିନଃ ॥ 11 ॥
ଶକ୍ରାଦିଷ୍ଵପି ଦେଵେଷୁ ଵର୍ତମାନୌ ନୟାନୟୌ ।
ଶ୍ରୂୟେତେ ନରଶାର୍ଦୂଲ ନ ତ୍ଵଂ ଶୋଚିତୁମର୍ହସି ॥ 12 ॥
ନଷ୍ଟାୟାମପି ଵୈଦେହ୍ୟାଂ ହୃତାୟାମପି ଚାନଘ ଶୋଚିତୁଂ ନାର୍ହସେ ଵୀର ୟଥାନ୍ୟଃ ପ୍ରାକୃତସ୍ତଥା ॥ 13 ॥
ତ୍ଵଵ୍ଦିଧା ନ ହି ଶୋଚଂତି ସତତଂ ସତ୍ୟଦର୍ଶିନଃ ।
ସୁମହତ୍ସ୍ଵପି କୃଚ୍ଛ୍ରେଷୁ ରାମାନିର୍ଵିଣ୍ଣଦର୍ଶନାଃ ॥ 14 ॥
ତତ୍ତ୍ଵତୋ ହି ନରଶ୍ରେଷ୍ଠ ବୁଦ୍ଧ୍ୟା ସମନୁଚିଂତୟ ।
ବୁଧ୍ଦ୍ୟା ୟୁକ୍ତା ମହାପ୍ରାଜ୍ଞା ଵିଜାନଂତି ଶୁଭାଶୁଭେ ॥ 15 ॥
ଅଦୃଷ୍ଟଗୁଣଦୋଷାଣାମଧ୍ରୁଵାଣାଂ ତୁ କର୍ମଣାମ୍ ।
ନାଂତରେଣ କ୍ରିୟାଂ ତେଷାଂ ଫଲମିଷ୍ଟଂ ପ୍ରଵର୍ତତେ ॥ 16 ॥
ତ୍ଵମେଵ ହି ପୁରା ରାମ ମାମେଵଂ ବହୁଶୋଽନ୍ଵଶାଃ ।
ଅନୁଶିଷ୍ୟାଦ୍ଧି କୋ ନୁ ତ୍ଵାମପି ସାକ୍ଷାଦ୍ବୃହସ୍ପତିଃ ॥ 17 ॥
ବୁଦ୍ଧିଶ୍ଚ ତେ ମହାପ୍ରାଜ୍ଞ ଦେଵୈରପି ଦୁରନ୍ଵୟା ।
ଶୋକେନାଭିପ୍ରସୁପ୍ତଂ ତେ ଜ୍ଞାନଂ ସଂବୋଧୟାମ୍ୟହମ୍ ॥ 18 ॥
ଦିଵ୍ୟଂ ଚ ମାନୁଷଂ ଚ ତ୍ଵମାତ୍ମନଶ୍ଚ ପରାକ୍ରମମ୍ ।
ଇକ୍ଷ୍ଵାକୁଵୃଷଭାଵେକ୍ଷ୍ୟ ୟତସ୍ଵ ଦ୍ଵିଷତାଂ ଵଧେ ॥ 19 ॥
କିଂ ତେନ ସର୍ଵନାଶେନ କୃତେନ ପୁରୁଷର୍ଷଭ ।
ତମେଵ ତ୍ଵଂ ରିପୁଂ ପାପଂ ଵିଜ୍ଞାୟୋଦ୍ଧର୍ତୁମର୍ହସି ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଷଟ୍ଷଷ୍ଟିତମସ୍ସର୍ଗଃ ॥
