ශ්රීමද්වාල්මීකීය රාමායණේ අරණ්යකාංඩම් ।
අථ සප්තෂෂ්ටිතමස්සර්ගඃ ।
පූර්වජෝऽප්යුක්තමාත්රස්තු ලක්ෂ්මණේන සුභාෂිතම් ।
සාරග්රාහී මහාසාරං ප්රතිජග්රාහ රාඝවඃ ॥ 1 ॥
සන්නිගෘහ්ය මහාබාහුඃ ප්රවෘත්තං කෝපමාත්මනඃ ।
අවෂ්ටභ්ය ධනුශ්චිත්රං රාමෝ ලක්ෂ්මණමබ්රවීත් ॥ 2 ॥
කිං කරිෂ්යාවහේ වත්ස ක්ව වා ගච්ඡාව ලක්ෂ්මණ ।
කේනෝපායේන ගච්ඡේයං සීතාමිති විචිංතය ॥ 3 ॥
තං තථා පරිතාපාර්තං ලක්ෂ්මණෝ රාමමබ්රවීත් ।
ඉදමේව ජනස්ථානං ත්වමන්වේෂිතුමර්හසි ॥ 4 ॥
රාක්ෂසෛර්බහුභිඃ කීර්ණං නානාද්රුමලතායුතම් ।
සංතීහ ගිරිදුර්ගාණි නිර්දරාඃ කංදරාණි ච ॥ 5 ॥
ගුහාශ්ච විවිධා ඝෝරා නානාමෘගගණාකුලාඃ ।
ආවාසාඃ කින්නරාණාං ච ගංධර්වභවනානි ච ॥ 6 ॥
තානි යුක්තෝ මයා සාර්ධං ත්වමන්වේෂිතුමර්හසි ।
ත්වද්විධා බුද්ධිසංපන්නා මහාත්මානෝ නරර්ෂභ ॥ 7 ॥
ආපත්සු න ප්රකංපංතේ වායුවේගෛරිවාචලාඃ ।
ඉත්යුක්තස්තද්වනං සර්වං විචචාර සලක්ෂ්මණඃ ॥ 8 ॥
ක්රුද්ධෝ රාමශ්ශරං ඝෝරං සංධාය ධනුෂි ක්ෂුරම් ।
තතඃ පර්වතකූටාභං මහාභාගං ද්විජෝත්තමම් ॥ 9 ॥
දදර්ශ පතිතං භූමෞ ක්ෂතජාර්ද්රං ජටායුෂම් ।
තං දෘෂ්ට්වා ගිරිශෘංගාභං රාමෝ ලක්ෂ්මණමබ්රවීත් ॥ 10 ॥
අනේන සීතා වෛදේහී භක්ෂිතා නාත්ර සංශයඃ ।
ගෘධ්රරූපමිදං රක්ෂෝ ව්යක්තං භවති කානනේ ॥ 11 ॥
භක්ෂයිත්වා විශාලාක්ෂීමාස්තේ සීතාං යථාසුඛම් ।
ඒනං වධිෂ්යේ දීප්තාස්යෛර්ඝෝරෛර්බාණෛරජිහ්මගෛඃ ॥ 12 ॥
ඉත්යුක්ත්වාභ්යපතද්ගෘධ්රං සංධාය ධනුෂි ක්ෂුරම් ।
ක්රුද්ධෝ රාමස්සමුද්රාංතාං කංපයන්නිව මේදිනීම් ॥ 13 ॥
තං දීනං දීනයා වාචා සඵේනං රුධිරං වමන් ।
අභ්යභාෂත පක්ෂී තු රාමං දශරථාත්මජම් ॥ 14 ॥
යාමෝෂධිමිවායුෂ්මන්නන්වේෂසි මහාවනේ ।
සා දේවී මම ච ප්රාණා රාවණේනෝභයං හෘතම් ॥ 15 ॥
ත්වයා විරහිතා දේවී ලක්ෂ්මණේන ච රාඝව ।
හ්රියමාණා මයා දෘෂ්ටා රාවණේන බලීයසා ॥ 16 ॥
සීතාමභ්යවපන්නෝऽහං රාවණශ්ච රණේ මයා ।
විධ්වංසිතරථශ්චාත්ර පාතිතෝ ධරණීතලේ ॥ 17 ॥
ඒතදස්ය ධනුර්භග්නමේතදස්ය ශරාවරම් ।
අයමස්ය රථෝ රාම භග්නසාංග්රාමිකෝ මයා ॥ 18 ॥
අයං තු සාරථිස්තස්ය මත්පක්ෂනිහතෝ යුධි ।
පරිශ්රාංතස්ය මේ පක්ෂෞ ඡිත්ත්වා ඛඩ්ගේන රාවණඃ ॥ 19 ॥
සීතාමාදාය වෛදේහීමුත්පපාත විහායසම් ।
රක්ෂසා නිහතං පූර්වං න මාං හංතුං ත්වමර්හසි ॥ 20 ॥
රාමස්තස්ය තු විජ්ඤාය බාෂ්පපූර්ණමුඛස්තදා ।
ද්විගුණීකෘතතාපාර්තස්සීතාසක්තාං ප්රියාං කථාම් ॥ 21 ॥
ගෘධ්රරාජං පරිෂ්වජ්ය පරිත්යජ්ය මහද්ධනුඃ ।
නිපපාතාවශෝ භූමෞ රුරෝද සහලක්ෂ්මණඃ ॥ 22 ॥
ඒකමේකායනේ දුර්ගේ නිශ්ශ්වසංතං කථංචන ।
සමීක්ෂ්ය දුඃඛිතතරෝ රාමස්සෞමිත්රිමබ්රවීත් ॥ 23 ॥
රාජ්යං භ්රෂ්ටං වනේ වාසස්සීතා නෂ්ටා හතෝ ද්විජඃ ।
ඊදෘශීයං මමාලක්ෂ්මීර්නිර්දහේදපි පාවකම් ॥ 24 ॥
සංපූර්ණමපි චේදද්ය ප්රවිශේයං මහෝදධිම් ।
සෝऽපි නූනං මමාලක්ෂ්ම්යා විශුෂ්යේත්සරිතාංපතිඃ ॥ 25 ॥
නාස්ත්යභාග්යතරෝ ලෝකේ මත්තෝऽස්මින්සචරාචරේ ।
යේනේයං මහතී ප්රාප්තා මයා ව්යසනවාගුරා ॥ 26 ॥
අයං පිතෘවයස්යෝ මේ ගෘධ්රරාජෝ ජරාන්විතඃ ।
ශේතේ විනිහතෝ භූමෞ මම භාග්යවිපර්යයාත් ॥ 27 ॥
ඉත්යේවමුක්ත්වා බහුශෝ රාඝවස්සහලක්ෂ්මණඃ ।
ජටායුෂං ච පස්පර්ශ පිතෘස්නේහං විදර්ශයන් ॥ 28 ॥
නිකෘත්තපක්ෂං රුධිරාවසික්තං ස ගෘධ්රරාජං පරිරභ්ය රාමඃ ।
ක්ව මෛථිලී ප්රාණසමා මමේති විමුච්ය වාචං නිපපාත භූමෞ ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තෂෂ්ටිතමස්සර්ගඃ ॥
