ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତଷଷ୍ଟିତମସ୍ସର୍ଗଃ ।
ପୂର୍ଵଜୋଽପ୍ୟୁକ୍ତମାତ୍ରସ୍ତୁ ଲକ୍ଷ୍ମଣେନ ସୁଭାଷିତମ୍ ।
ସାରଗ୍ରାହୀ ମହାସାରଂ ପ୍ରତିଜଗ୍ରାହ ରାଘଵଃ ॥ 1 ॥
ସନ୍ନିଗୃହ୍ୟ ମହାବାହୁଃ ପ୍ରଵୃତ୍ତଂ କୋପମାତ୍ମନଃ ।
ଅଵଷ୍ଟଭ୍ୟ ଧନୁଶ୍ଚିତ୍ରଂ ରାମୋ ଲକ୍ଷ୍ମଣମବ୍ରଵୀତ୍ ॥ 2 ॥
କିଂ କରିଷ୍ୟାଵହେ ଵତ୍ସ କ୍ଵ ଵା ଗଚ୍ଛାଵ ଲକ୍ଷ୍ମଣ ।
କେନୋପାୟେନ ଗଚ୍ଛେୟଂ ସୀତାମିତି ଵିଚିଂତୟ ॥ 3 ॥
ତଂ ତଥା ପରିତାପାର୍ତଂ ଲକ୍ଷ୍ମଣୋ ରାମମବ୍ରଵୀତ୍ ।
ଇଦମେଵ ଜନସ୍ଥାନଂ ତ୍ଵମନ୍ଵେଷିତୁମର୍ହସି ॥ 4 ॥
ରାକ୍ଷସୈର୍ବହୁଭିଃ କୀର୍ଣଂ ନାନାଦ୍ରୁମଲତାୟୁତମ୍ ।
ସଂତୀହ ଗିରିଦୁର୍ଗାଣି ନିର୍ଦରାଃ କଂଦରାଣି ଚ ॥ 5 ॥
ଗୁହାଶ୍ଚ ଵିଵିଧା ଘୋରା ନାନାମୃଗଗଣାକୁଲାଃ ।
ଆଵାସାଃ କିନ୍ନରାଣାଂ ଚ ଗଂଧର୍ଵଭଵନାନି ଚ ॥ 6 ॥
ତାନି ୟୁକ୍ତୋ ମୟା ସାର୍ଧଂ ତ୍ଵମନ୍ଵେଷିତୁମର୍ହସି ।
ତ୍ଵଦ୍ଵିଧା ବୁଦ୍ଧିସଂପନ୍ନା ମହାତ୍ମାନୋ ନରର୍ଷଭ ॥ 7 ॥
ଆପତ୍ସୁ ନ ପ୍ରକଂପଂତେ ଵାୟୁଵେଗୈରିଵାଚଲାଃ ।
ଇତ୍ୟୁକ୍ତସ୍ତଦ୍ଵନଂ ସର୍ଵଂ ଵିଚଚାର ସଲକ୍ଷ୍ମଣଃ ॥ 8 ॥
କ୍ରୁଦ୍ଧୋ ରାମଶ୍ଶରଂ ଘୋରଂ ସଂଧାୟ ଧନୁଷି କ୍ଷୁରମ୍ ।
ତତଃ ପର୍ଵତକୂଟାଭଂ ମହାଭାଗଂ ଦ୍ଵିଜୋତ୍ତମମ୍ ॥ 9 ॥
ଦଦର୍ଶ ପତିତଂ ଭୂମୌ କ୍ଷତଜାର୍ଦ୍ରଂ ଜଟାୟୁଷମ୍ ।
ତଂ ଦୃଷ୍ଟ୍ଵା ଗିରିଶୃଂଗାଭଂ ରାମୋ ଲକ୍ଷ୍ମଣମବ୍ରଵୀତ୍ ॥ 10 ॥
ଅନେନ ସୀତା ଵୈଦେହୀ ଭକ୍ଷିତା ନାତ୍ର ସଂଶୟଃ ।
ଗୃଧ୍ରରୂପମିଦଂ ରକ୍ଷୋ ଵ୍ୟକ୍ତଂ ଭଵତି କାନନେ ॥ 11 ॥
ଭକ୍ଷୟିତ୍ଵା ଵିଶାଲାକ୍ଷୀମାସ୍ତେ ସୀତାଂ ୟଥାସୁଖମ୍ ।
ଏନଂ ଵଧିଷ୍ୟେ ଦୀପ୍ତାସ୍ୟୈର୍ଘୋରୈର୍ବାଣୈରଜିହ୍ମଗୈଃ ॥ 12 ॥
ଇତ୍ୟୁକ୍ତ୍ଵାଭ୍ୟପତଦ୍ଗୃଧ୍ରଂ ସଂଧାୟ ଧନୁଷି କ୍ଷୁରମ୍ ।
କ୍ରୁଦ୍ଧୋ ରାମସ୍ସମୁଦ୍ରାଂତାଂ କଂପୟନ୍ନିଵ ମେଦିନୀମ୍ ॥ 13 ॥
ତଂ ଦୀନଂ ଦୀନୟା ଵାଚା ସଫେନଂ ରୁଧିରଂ ଵମନ୍ ।
ଅଭ୍ୟଭାଷତ ପକ୍ଷୀ ତୁ ରାମଂ ଦଶରଥାତ୍ମଜମ୍ ॥ 14 ॥
ୟାମୋଷଧିମିଵାୟୁଷ୍ମନ୍ନନ୍ଵେଷସି ମହାଵନେ ।
ସା ଦେଵୀ ମମ ଚ ପ୍ରାଣା ରାଵଣେନୋଭୟଂ ହୃତମ୍ ॥ 15 ॥
ତ୍ଵୟା ଵିରହିତା ଦେଵୀ ଲକ୍ଷ୍ମଣେନ ଚ ରାଘଵ ।
ହ୍ରିୟମାଣା ମୟା ଦୃଷ୍ଟା ରାଵଣେନ ବଲୀୟସା ॥ 16 ॥
ସୀତାମଭ୍ୟଵପନ୍ନୋଽହଂ ରାଵଣଶ୍ଚ ରଣେ ମୟା ।
ଵିଧ୍ଵଂସିତରଥଶ୍ଚାତ୍ର ପାତିତୋ ଧରଣୀତଲେ ॥ 17 ॥
ଏତଦସ୍ୟ ଧନୁର୍ଭଗ୍ନମେତଦସ୍ୟ ଶରାଵରମ୍ ।
ଅୟମସ୍ୟ ରଥୋ ରାମ ଭଗ୍ନସାଂଗ୍ରାମିକୋ ମୟା ॥ 18 ॥
ଅୟଂ ତୁ ସାରଥିସ୍ତସ୍ୟ ମତ୍ପକ୍ଷନିହତୋ ୟୁଧି ।
ପରିଶ୍ରାଂତସ୍ୟ ମେ ପକ୍ଷୌ ଛିତ୍ତ୍ଵା ଖଡ୍ଗେନ ରାଵଣଃ ॥ 19 ॥
ସୀତାମାଦାୟ ଵୈଦେହୀମୁତ୍ପପାତ ଵିହାୟସମ୍ ।
ରକ୍ଷସା ନିହତଂ ପୂର୍ଵଂ ନ ମାଂ ହଂତୁଂ ତ୍ଵମର୍ହସି ॥ 20 ॥
ରାମସ୍ତସ୍ୟ ତୁ ଵିଜ୍ଞାୟ ବାଷ୍ପପୂର୍ଣମୁଖସ୍ତଦା ।
ଦ୍ଵିଗୁଣୀକୃତତାପାର୍ତସ୍ସୀତାସକ୍ତାଂ ପ୍ରିୟାଂ କଥାମ୍ ॥ 21 ॥
ଗୃଧ୍ରରାଜଂ ପରିଷ୍ଵଜ୍ୟ ପରିତ୍ୟଜ୍ୟ ମହଦ୍ଧନୁଃ ।
ନିପପାତାଵଶୋ ଭୂମୌ ରୁରୋଦ ସହଲକ୍ଷ୍ମଣଃ ॥ 22 ॥
ଏକମେକାୟନେ ଦୁର୍ଗେ ନିଶ୍ଶ୍ଵସଂତଂ କଥଂଚନ ।
ସମୀକ୍ଷ୍ୟ ଦୁଃଖିତତରୋ ରାମସ୍ସୌମିତ୍ରିମବ୍ରଵୀତ୍ ॥ 23 ॥
ରାଜ୍ୟଂ ଭ୍ରଷ୍ଟଂ ଵନେ ଵାସସ୍ସୀତା ନଷ୍ଟା ହତୋ ଦ୍ଵିଜଃ ।
ଈଦୃଶୀୟଂ ମମାଲକ୍ଷ୍ମୀର୍ନିର୍ଦହେଦପି ପାଵକମ୍ ॥ 24 ॥
ସଂପୂର୍ଣମପି ଚେଦଦ୍ୟ ପ୍ରଵିଶେୟଂ ମହୋଦଧିମ୍ ।
ସୋଽପି ନୂନଂ ମମାଲକ୍ଷ୍ମ୍ୟା ଵିଶୁଷ୍ୟେତ୍ସରିତାଂପତିଃ ॥ 25 ॥
ନାସ୍ତ୍ୟଭାଗ୍ୟତରୋ ଲୋକେ ମତ୍ତୋଽସ୍ମିନ୍ସଚରାଚରେ ।
ୟେନେୟଂ ମହତୀ ପ୍ରାପ୍ତା ମୟା ଵ୍ୟସନଵାଗୁରା ॥ 26 ॥
ଅୟଂ ପିତୃଵୟସ୍ୟୋ ମେ ଗୃଧ୍ରରାଜୋ ଜରାନ୍ଵିତଃ ।
ଶେତେ ଵିନିହତୋ ଭୂମୌ ମମ ଭାଗ୍ୟଵିପର୍ୟୟାତ୍ ॥ 27 ॥
ଇତ୍ୟେଵମୁକ୍ତ୍ଵା ବହୁଶୋ ରାଘଵସ୍ସହଲକ୍ଷ୍ମଣଃ ।
ଜଟାୟୁଷଂ ଚ ପସ୍ପର୍ଶ ପିତୃସ୍ନେହଂ ଵିଦର୍ଶୟନ୍ ॥ 28 ॥
ନିକୃତ୍ତପକ୍ଷଂ ରୁଧିରାଵସିକ୍ତଂ ସ ଗୃଧ୍ରରାଜଂ ପରିରଭ୍ୟ ରାମଃ ।
କ୍ଵ ମୈଥିଲୀ ପ୍ରାଣସମା ମମେତି ଵିମୁଚ୍ୟ ଵାଚଂ ନିପପାତ ଭୂମୌ ॥ 29 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତଷଷ୍ଟିତମସ୍ସର୍ଗଃ ॥
