ஶ்ரீமத்³வால்மீகீய ராமாயணே அரண்யகாண்ட³ம் ।
அத² ஸப்தஷஷ்டிதமஸ்ஸர்க:³ ।
பூர்வஜோப்யுக்தமாத்ரஸ்து லக்ஷ்மணேன ஸுபா⁴ஷிதம் ।
ஸாரக்³ராஹீ மஹாஸாரம் ப்ரதிஜக்³ராஹ ராக⁴வ: ॥ 1 ॥
ஸன்னிக்³ருஹ்ய மஹாபா³ஹு: ப்ரவ்ருத்தம் கோபமாத்மன: ।
அவஷ்டப்⁴ய த⁴னுஶ்சித்ரம் ராமோ லக்ஷ்மணமப்³ரவீத் ॥ 2 ॥
கிம் கரிஷ்யாவஹே வத்ஸ க்வ வா க³ச்சா²வ லக்ஷ்மண ।
கேனோபாயேன க³ச்சே²யம் ஸீதாமிதி விசிந்தய ॥ 3 ॥
தம் ததா² பரிதாபார்தம் லக்ஷ்மணோ ராமமப்³ரவீத் ।
இத³மேவ ஜனஸ்தா²னம் த்வமன்வேஷிதுமர்ஹஸி ॥ 4 ॥
ராக்ஷஸைர்ப³ஹுபி⁴: கீர்ணம் நானாத்³ருமலதாயுதம் ।
ஸந்தீஹ கி³ரிது³ர்கா³ணி நிர்த³ரா: கந்த³ராணி ச ॥ 5 ॥
கு³ஹாஶ்ச விவிதா⁴ கோ⁴ரா நானாம்ருக³க³ணாகுலா: ।
ஆவாஸா: கின்னராணாம் ச க³ந்த⁴ர்வப⁴வனானி ச ॥ 6 ॥
தானி யுக்தோ மயா ஸார்த⁴ம் த்வமன்வேஷிதுமர்ஹஸி ।
த்வத்³விதா⁴ பு³த்³தி⁴ஸம்பன்னா மஹாத்மானோ நரர்ஷப⁴ ॥ 7 ॥
ஆபத்ஸு ந ப்ரகம்பந்தே வாயுவேகை³ரிவாசலா: ।
இத்யுக்தஸ்தத்³வனம் ஸர்வம் விசசார ஸலக்ஷ்மண: ॥ 8 ॥
க்ருத்³தோ⁴ ராமஶ்ஶரம் கோ⁴ரம் ஸந்தா⁴ய த⁴னுஷி க்ஷுரம் ।
தத: பர்வதகூடாப⁴ம் மஹாபா⁴க³ம் த்³விஜோத்தமம் ॥ 9 ॥
த³த³ர்ஶ பதிதம் பூ⁴மௌ க்ஷதஜார்த்³ரம் ஜடாயுஷம் ।
தம் த்³ருஷ்ட்வா கி³ரிஶ்ருங்கா³ப⁴ம் ராமோ லக்ஷ்மணமப்³ரவீத் ॥ 1௦ ॥
அனேன ஸீதா வைதே³ஹீ ப⁴க்ஷிதா நாத்ர ஸம்ஶய: ।
க்³ருத்⁴ரரூபமித³ம் ரக்ஷோ வ்யக்தம் ப⁴வதி கானநே ॥ 11 ॥
ப⁴க்ஷயித்வா விஶாலாக்ஷீமாஸ்தே ஸீதாம் யதா²ஸுக²ம் ।
ஏனம் வதி⁴ஷ்யே தீ³ப்தாஸ்யைர்கோ⁴ரைர்பா³ணைரஜிஹ்மகை³: ॥ 12 ॥
இத்யுக்த்வாப்⁴யபதத்³க்³ருத்⁴ரம் ஸந்தா⁴ய த⁴னுஷி க்ஷுரம் ।
க்ருத்³தோ⁴ ராமஸ்ஸமுத்³ராந்தாம் கம்பயன்னிவ மேதி³னீம் ॥ 13 ॥
தம் தீ³னம் தீ³னயா வாசா ஸபே²னம் ருதி⁴ரம் வமன் ।
அப்⁴யபா⁴ஷத பக்ஷீ து ராமம் த³ஶரதா²த்மஜம் ॥ 14 ॥
யாமோஷதி⁴மிவாயுஷ்மன்னந்வேஷஸி மஹாவனே ।
ஸா தே³வீ மம ச ப்ராணா ராவணேனோப⁴யம் ஹ்ருதம் ॥ 15 ॥
த்வயா விரஹிதா தே³வீ லக்ஷ்மணேன ச ராக⁴வ ।
ஹ்ரியமாணா மயா த்³ருஷ்டா ராவணேன ப³லீயஸா ॥ 16 ॥
ஸீதாமப்⁴யவபன்னோஹம் ராவணஶ்ச ரணே மயா ।
வித்⁴வம்ஸிதரத²ஶ்சாத்ர பாதிதோ த⁴ரணீதலே ॥ 17 ॥
ஏதத³ஸ்ய த⁴னுர்ப⁴க்³னமேதத³ஸ்ய ஶராவரம் ।
அயமஸ்ய ரதோ² ராம ப⁴க்³னஸாங்க்³ராமிகோ மயா ॥ 18 ॥
அயம் து ஸாரதி²ஸ்தஸ்ய மத்பக்ஷனிஹதோ யுதி⁴ ।
பரிஶ்ராந்தஸ்ய மே பக்ஷௌ சி²த்த்வா க²ட்³கே³ன ராவண: ॥ 19 ॥
ஸீதாமாதா³ய வைதே³ஹீமுத்பபாத விஹாயஸம் ।
ரக்ஷஸா நிஹதம் பூர்வம் ந மாம் ஹந்தும் த்வமர்ஹஸி ॥ 2௦ ॥
ராமஸ்தஸ்ய து விஜ்ஞாய பா³ஷ்பபூர்ணமுக²ஸ்ததா³ ।
த்³விகு³ணீக்ருததாபார்தஸ்ஸீதாஸக்தாம் ப்ரியாம் கதா²ம் ॥ 21 ॥
க்³ருத்⁴ரராஜம் பரிஷ்வஜ்ய பரித்யஜ்ய மஹத்³த⁴னு: ।
நிபபாதாவஶோ பூ⁴மௌ ருரோத³ ஸஹலக்ஷ்மண: ॥ 22 ॥
ஏகமேகாயனே து³ர்கே³ நிஶ்ஶ்வஸந்தம் கத²ஞ்சன ।
ஸமீக்ஷ்ய து³:கி²ததரோ ராமஸ்ஸௌமித்ரிமப்³ரவீத் ॥ 23 ॥
ராஜ்யம் ப்⁴ரஷ்டம் வனே வாஸஸ்ஸீதா நஷ்டா ஹதோ த்³விஜ: ।
ஈத்³ருஶீயம் மமாலக்ஷ்மீர்னிர்த³ஹேத³பி பாவகம் ॥ 24 ॥
ஸம்பூர்ணமபி சேத³த்³ய ப்ரவிஶேயம் மஹோத³தி⁴ம் ।
ஸோபி நூனம் மமாலக்ஷ்ம்யா விஶுஷ்யேத்ஸரிதாம்பதி: ॥ 25 ॥
நாஸ்த்யபா⁴க்³யதரோ லோகே மத்தோஸ்மின்ஸசராசரே ।
யேனேயம் மஹதீ ப்ராப்தா மயா வ்யஸனவாகு³ரா ॥ 26 ॥
அயம் பித்ருவயஸ்யோ மே க்³ருத்⁴ரராஜோ ஜரான்வித: ।
ஶேதே வினிஹதோ பூ⁴மௌ மம பா⁴க்³யவிபர்யயாத் ॥ 27 ॥
இத்யேவமுக்த்வா ப³ஹுஶோ ராக⁴வஸ்ஸஹலக்ஷ்மண: ।
ஜடாயுஷம் ச பஸ்பர்ஶ பித்ருஸ்னேஹம் வித³ர்ஶயன் ॥ 28 ॥
நிக்ருத்தபக்ஷம் ருதி⁴ராவஸிக்தம் ஸ க்³ருத்⁴ரராஜம் பரிரப்⁴ய ராம: ।
க்வ மைதி²லீ ப்ராணஸமா மமேதி விமுச்ய வாசம் நிபபாத பூ⁴மௌ ॥ 29 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அரண்யகாண்டே³ ஸப்தஷஷ்டிதமஸ்ஸர்க:³ ॥
