শ্রীমদ্বাল্মীকীয় রামাযণে অরণ্যকাংডম্ ।
অথ সপ্তষষ্টিতমস্সর্গঃ ।
পূর্বজোঽপ্য়ুক্তমাত্রস্তু লক্ষ্মণেন সুভাষিতম্ ।
সারগ্রাহী মহাসারং প্রতিজগ্রাহ রাঘবঃ ॥ 1 ॥
সন্নিগৃহ্য় মহাবাহুঃ প্রবৃত্তং কোপমাত্মনঃ ।
অবষ্টভ্য় ধনুশ্চিত্রং রামো লক্ষ্মণমব্রবীত্ ॥ 2 ॥
কিং করিষ্য়াবহে বত্স ক্ব বা গচ্ছাব লক্ষ্মণ ।
কেনোপায়েন গচ্ছেয়ং সীতামিতি বিচিংতয় ॥ 3 ॥
তং তথা পরিতাপার্তং লক্ষ্মণো রামমব্রবীত্ ।
ইদমেব জনস্থানং ত্বমন্বেষিতুমর্হসি ॥ 4 ॥
রাক্ষসৈর্বহুভিঃ কীর্ণং নানাদ্রুমলতায়ুতম্ ।
সংতীহ গিরিদুর্গাণি নির্দরাঃ কংদরাণি চ ॥ 5 ॥
গুহাশ্চ বিবিধা ঘোরা নানামৃগগণাকুলাঃ ।
আবাসাঃ কিন্নরাণাং চ গংধর্বভবনানি চ ॥ 6 ॥
তানি যুক্তো ময়া সার্ধং ত্বমন্বেষিতুমর্হসি ।
ত্বদ্বিধা বুদ্ধিসংপন্না মহাত্মানো নরর্ষভ ॥ 7 ॥
আপত্সু ন প্রকংপংতে বায়ুবেগৈরিবাচলাঃ ।
ইত্য়ুক্তস্তদ্বনং সর্বং বিচচার সলক্ষ্মণঃ ॥ 8 ॥
ক্রুদ্ধো রামশ্শরং ঘোরং সংধায় ধনুষি ক্ষুরম্ ।
ততঃ পর্বতকূটাভং মহাভাগং দ্বিজোত্তমম্ ॥ 9 ॥
দদর্শ পতিতং ভূমৌ ক্ষতজার্দ্রং জটায়ুষম্ ।
তং দৃষ্ট্বা গিরিশৃংগাভং রামো লক্ষ্মণমব্রবীত্ ॥ 10 ॥
অনেন সীতা বৈদেহী ভক্ষিতা নাত্র সংশয়ঃ ।
গৃধ্ররূপমিদং রক্ষো ব্যক্তং ভবতি কাননে ॥ 11 ॥
ভক্ষয়িত্বা বিশালাক্ষীমাস্তে সীতাং যথাসুখম্ ।
এনং বধিষ্য়ে দীপ্তাস্য়ৈর্ঘোরৈর্বাণৈরজিহ্মগৈঃ ॥ 12 ॥
ইত্য়ুক্ত্বাভ্যপতদ্গৃধ্রং সংধায় ধনুষি ক্ষুরম্ ।
ক্রুদ্ধো রামস্সমুদ্রাংতাং কংপযন্নিব মেদিনীম্ ॥ 13 ॥
তং দীনং দীনয়া বাচা সফেনং রুধিরং বমন্ ।
অভ্যভাষত পক্ষী তু রামং দশরথাত্মজম্ ॥ 14 ॥
যামোষধিমিবায়ুষ্মন্নন্বেষসি মহাবনে ।
সা দেবী মম চ প্রাণা রাবণেনোভয়ং হৃতম্ ॥ 15 ॥
ত্বয়া বিরহিতা দেবী লক্ষ্মণেন চ রাঘব ।
হ্রিযমাণা ময়া দৃষ্টা রাবণেন বলীযসা ॥ 16 ॥
সীতামভ্যবপন্নোঽহং রাবণশ্চ রণে ময়া ।
বিধ্বংসিতরথশ্চাত্র পাতিতো ধরণীতলে ॥ 17 ॥
এতদস্য় ধনুর্ভগ্নমেতদস্য় শরাবরম্ ।
অযমস্য় রথো রাম ভগ্নসাংগ্রামিকো ময়া ॥ 18 ॥
অয়ং তু সারথিস্তস্য় মত্পক্ষনিহতো যুধি ।
পরিশ্রাংতস্য় মে পক্ষৌ ছিত্ত্বা খড্গেন রাবণঃ ॥ 19 ॥
সীতামাদায় বৈদেহীমুত্পপাত বিহাযসম্ ।
রক্ষসা নিহতং পূর্বং ন মাং হংতুং ত্বমর্হসি ॥ 20 ॥
রামস্তস্য় তু বিজ্ঞায় বাষ্পপূর্ণমুখস্তদা ।
দ্বিগুণীকৃততাপার্তস্সীতাসক্তাং প্রিয়াং কথাম্ ॥ 21 ॥
গৃধ্ররাজং পরিষ্বজ্য় পরিত্যজ্য় মহদ্ধনুঃ ।
নিপপাতাবশো ভূমৌ রুরোদ সহলক্ষ্মণঃ ॥ 22 ॥
একমেকাযনে দুর্গে নিশ্শ্বসংতং কথংচন ।
সমীক্ষ্য় দুঃখিততরো রামস্সৌমিত্রিমব্রবীত্ ॥ 23 ॥
রাজ্য়ং ভ্রষ্টং বনে বাসস্সীতা নষ্টা হতো দ্বিজঃ ।
ঈদৃশীয়ং মমালক্ষ্মীর্নির্দহেদপি পাবকম্ ॥ 24 ॥
সংপূর্ণমপি চেদদ্য় প্রবিশেয়ং মহোদধিম্ ।
সোঽপি নূনং মমালক্ষ্ম্য়া বিশুষ্য়েত্সরিতাংপতিঃ ॥ 25 ॥
নাস্ত্যভাগ্যতরো লোকে মত্তোঽস্মিন্সচরাচরে ।
যেনেয়ং মহতী প্রাপ্তা ময়া ব্যসনবাগুরা ॥ 26 ॥
অয়ং পিতৃবযস্য়ো মে গৃধ্ররাজো জরান্বিতঃ ।
শেতে বিনিহতো ভূমৌ মম ভাগ্যবিপর্যয়াত্ ॥ 27 ॥
ইত্য়েবমুক্ত্বা বহুশো রাঘবস্সহলক্ষ্মণঃ ।
জটায়ুষং চ পস্পর্শ পিতৃস্নেহং বিদর্শযন্ ॥ 28 ॥
নিকৃত্তপক্ষং রুধিরাবসিক্তং স গৃধ্ররাজং পরিরভ্য় রামঃ ।
ক্ব মৈথিলী প্রাণসমা মমেতি বিমুচ্য় বাচং নিপপাত ভূমৌ ॥ 29 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে সপ্তষষ্টিতমস্সর্গঃ ॥
