ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തഷഷ്ടിതമസ്സര്ഗഃ ।
പൂർവജോഽപ്യുക്തമാത്രസ്തു ലക്ഷ്മണേന സുഭാഷിതമ് ।
സാരഗ്രാഹീ മഹാസാരം പ്രതിജഗ്രാഹ രാഘവഃ ॥ 1 ॥
സന്നിഗൃഹ്യ മഹാബാഹുഃ പ്രവൃത്തം കോപമാത്മനഃ ।
അവഷ്ടഭ്യ ധനുശ്ചിത്രം രാമോ ലക്ഷ്മണമബ്രവീത് ॥ 2 ॥
കിം കരിഷ്യാവഹേ വത്സ ക്വ വാ ഗച്ഛാവ ലക്ഷ്മണ ।
കേനോപായേന ഗച്ഛേയം സീതാമിതി വിചിംതയ ॥ 3 ॥
തം തഥാ പരിതാപാര്തം ലക്ഷ്മണോ രാമമബ്രവീത് ।
ഇദമേവ ജനസ്ഥാനം ത്വമന്വേഷിതുമര്ഹസി ॥ 4 ॥
രാക്ഷസൈര്ബഹുഭിഃ കീര്ണം നാനാദ്രുമലതായുതമ് ।
സംതീഹ ഗിരിദുര്ഗാണി നിര്ദരാഃ കംദരാണി ച ॥ 5 ॥
ഗുഹാശ്ച വിവിധാ ഘോരാ നാനാമൃഗഗണാകുലാഃ ।
ആവാസാഃ കിന്നരാണാം ച ഗംധർവഭവനാനി ച ॥ 6 ॥
താനി യുക്തോ മയാ സാര്ധം ത്വമന്വേഷിതുമര്ഹസി ।
ത്വദ്വിധാ ബുദ്ധിസംപന്നാ മഹാത്മാനോ നരര്ഷഭ ॥ 7 ॥
ആപത്സു ന പ്രകംപംതേ വായുവേഗൈരിവാചലാഃ ।
ഇത്യുക്തസ്തദ്വനം സർവം വിചചാര സലക്ഷ്മണഃ ॥ 8 ॥
ക്രുദ്ധോ രാമശ്ശരം ഘോരം സംധായ ധനുഷി ക്ഷുരമ് ।
തതഃ പർവതകൂടാഭം മഹാഭാഗം ദ്വിജോത്തമമ് ॥ 9 ॥
ദദര്ശ പതിതം ഭൂമൌ ക്ഷതജാര്ദ്രം ജടായുഷമ് ।
തം ദൃഷ്ട്വാ ഗിരിശൃംഗാഭം രാമോ ലക്ഷ്മണമബ്രവീത് ॥ 10 ॥
അനേന സീതാ വൈദേഹീ ഭക്ഷിതാ നാത്ര സംശയഃ ।
ഗൃധ്രരൂപമിദം രക്ഷോ വ്യക്തം ഭവതി കാനനേ ॥ 11 ॥
ഭക്ഷയിത്വാ വിശാലാക്ഷീമാസ്തേ സീതാം യഥാസുഖമ് ।
ഏനം വധിഷ്യേ ദീപ്താസ്യൈര്ഘോരൈര്ബാണൈരജിഹ്മഗൈഃ ॥ 12 ॥
ഇത്യുക്ത്വാഭ്യപതദ്ഗൃധ്രം സംധായ ധനുഷി ക്ഷുരമ് ।
ക്രുദ്ധോ രാമസ്സമുദ്രാംതാം കംപയന്നിവ മേദിനീമ് ॥ 13 ॥
തം ദീനം ദീനയാ വാചാ സഫേനം രുധിരം വമന് ।
അഭ്യഭാഷത പക്ഷീ തു രാമം ദശരഥാത്മജമ് ॥ 14 ॥
യാമോഷധിമിവായുഷ്മന്നന്വേഷസി മഹാവനേ ।
സാ ദേവീ മമ ച പ്രാണാ രാവണേനോഭയം ഹൃതമ് ॥ 15 ॥
ത്വയാ വിരഹിതാ ദേവീ ലക്ഷ്മണേന ച രാഘവ ।
ഹ്രിയമാണാ മയാ ദൃഷ്ടാ രാവണേന ബലീയസാ ॥ 16 ॥
സീതാമഭ്യവപന്നോഽഹം രാവണശ്ച രണേ മയാ ।
വിധ്വംസിതരഥശ്ചാത്ര പാതിതോ ധരണീതലേ ॥ 17 ॥
ഏതദസ്യ ധനുര്ഭഗ്നമേതദസ്യ ശരാവരമ് ।
അയമസ്യ രഥോ രാമ ഭഗ്നസാംഗ്രാമികോ മയാ ॥ 18 ॥
അയം തു സാരഥിസ്തസ്യ മത്പക്ഷനിഹതോ യുധി ।
പരിശ്രാംതസ്യ മേ പക്ഷൌ ഛിത്ത്വാ ഖഡ്ഗേന രാവണഃ ॥ 19 ॥
സീതാമാദായ വൈദേഹീമുത്പപാത വിഹായസമ് ।
രക്ഷസാ നിഹതം പൂർവം ന മാം ഹംതും ത്വമര്ഹസി ॥ 20 ॥
രാമസ്തസ്യ തു വിജ്ഞായ ബാഷ്പപൂര്ണമുഖസ്തദാ ।
ദ്വിഗുണീകൃതതാപാര്തസ്സീതാസക്താം പ്രിയാം കഥാമ് ॥ 21 ॥
ഗൃധ്രരാജം പരിഷ്വജ്യ പരിത്യജ്യ മഹദ്ധനുഃ ।
നിപപാതാവശോ ഭൂമൌ രുരോദ സഹലക്ഷ്മണഃ ॥ 22 ॥
ഏകമേകായനേ ദുര്ഗേ നിശ്ശ്വസംതം കഥംചന ।
സമീക്ഷ്യ ദുഃഖിതതരോ രാമസ്സൌമിത്രിമബ്രവീത് ॥ 23 ॥
രാജ്യം ഭ്രഷ്ടം വനേ വാസസ്സീതാ നഷ്ടാ ഹതോ ദ്വിജഃ ।
ഈദൃശീയം മമാലക്ഷ്മീര്നിര്ദഹേദപി പാവകമ് ॥ 24 ॥
സംപൂര്ണമപി ചേദദ്യ പ്രവിശേയം മഹോദധിമ് ।
സോഽപി നൂനം മമാലക്ഷ്മ്യാ വിശുഷ്യേത്സരിതാംപതിഃ ॥ 25 ॥
നാസ്ത്യഭാഗ്യതരോ ലോകേ മത്തോഽസ്മിന്സചരാചരേ ।
യേനേയം മഹതീ പ്രാപ്താ മയാ വ്യസനവാഗുരാ ॥ 26 ॥
അയം പിതൃവയസ്യോ മേ ഗൃധ്രരാജോ ജരാന്വിതഃ ।
ശേതേ വിനിഹതോ ഭൂമൌ മമ ഭാഗ്യവിപര്യയാത് ॥ 27 ॥
ഇത്യേവമുക്ത്വാ ബഹുശോ രാഘവസ്സഹലക്ഷ്മണഃ ।
ജടായുഷം ച പസ്പര്ശ പിതൃസ്നേഹം വിദര്ശയന് ॥ 28 ॥
നികൃത്തപക്ഷം രുധിരാവസിക്തം സ ഗൃധ്രരാജം പരിരഭ്യ രാമഃ ।
ക്വ മൈഥിലീ പ്രാണസമാ മമേതി വിമുച്യ വാചം നിപപാത ഭൂമൌ ॥ 29 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തഷഷ്ടിതമസ്സര്ഗഃ ॥
