ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଦ୍ଵିସପ୍ତତିତମସ୍ସର୍ଗଃ ।
ଏଵମୁକ୍ତୌତୁ ତୌ ଵୀରୌ କବଂଧେନ ନରେଶ୍ଵରୌ ।
ଗିରିପ୍ରଦରମାସାଦ୍ୟ ପାଵକଂ ଵିସସର୍ଜତୁଃ ॥ 1 ॥
ଲକ୍ଷ୍ମଣସ୍ତୁ ମହୋଲ୍କାଭିର୍ଜ୍ଵଲିତାଭିସ୍ସମଂତତଃ ।
ଚିତାମାଦୀପୟାମାସ ସା ପ୍ରଜଜ୍ଵାଲ ସର୍ଵତଃ ॥ 2 ॥
ତଚ୍ଛରୀରଂ କବଂଧସ୍ୟ ଘୃତପିଂଡୋପମଂ ମହତ୍ ।
ମେଦସା ପଚ୍ୟମାନସ୍ୟ ମଂଦଂ ଦହତି ପାଵକଃ ॥ 3 ॥
ସ ଵିଧୂୟ ଚିତାମାଶୁ ଵିଧୂମୋଽଗ୍ନିରିଵୋତ୍ଥିତଃ ।
ଅରଜେ ଵାସସୀ ବିଭ୍ରନ୍ମାଲାଂ ଦିଵ୍ୟାଂ ମହାବଲଃ ॥ 4 ॥
ତତଶ୍ଚିତାୟା ଵେଗେନ ଭାସ୍ଵରୋ ଵିମଲାଂବରଃ ।
ଉତ୍ପପାତାଶୁ ସଂହୃଷ୍ଟସ୍ସର୍ଵପ୍ରତ୍ୟଂଗଭୂଷଣଃ ॥ 5 ॥
ଵିମାନେ ଭାସ୍ଵରେ ତିଷ୍ଠନ୍ହଂସୟୁକ୍ତେ ୟଶସ୍କରେ ।
ପ୍ରଭୟା ଚ ମହାତେଜା ଦିଶୋ ଦଶ ଵିରାଜୟନ୍ ॥ 6 ॥
ସୋଽଂତରିକ୍ଷଗତୋ ରାମଂ କବଂଧୋ ଵାକ୍ୟମବ୍ରଵୀତ୍ ।
ଶୃଣୁ ରାଘଵ ତତ୍ତ୍ଵେନ ୟଥା ସୀତାମଵାପ୍ସ୍ୟସି ॥ 7 ॥
ରାମ ଷଡ୍ୟୁକ୍ତୟୋ ଲୋକେ ୟାଭିସ୍ସର୍ଵଂ ଵିମୃଶ୍ୟତେ ।
ପରିମୃଷ୍ଟୋ ଦଶାଂତେନ ଦଶାଭାଗେନ ସେଵ୍ୟତେ ॥ 8 ॥
ଦଶାଭାଗଗତୋ ହୀନସ୍ତ୍ଵଂ ହି ରାମ ସଲକ୍ଷ୍ମଣଃ ।
ୟତ୍କୃତେ ଵ୍ୟସନଂ ପ୍ରାପ୍ତଂ ତ୍ଵୟା ଦାରପ୍ରଧର୍ଷଣମ୍ ॥ 9 ॥
ତଦଵଶ୍ୟଂ ତ୍ଵୟା କାର୍ୟସ୍ସସୁହୃତ୍ସୁହୃଦାଂ ଵର ।
ଅକୃତ୍ଵା ହି ନ ତେ ସିଦ୍ଧିମହଂ ପଶ୍ୟାମି ଚିଂତୟନ୍ ॥ 10 ॥
ଶ୍ରୂୟତାଂ ରାମ ଵକ୍ଷ୍ୟାମି ସୁଗ୍ରୀଵୋ ନାମ ଵାନରଃ ।
ଭ୍ରାତ୍ରା ନିରସ୍ତଃ କ୍ରୁଦ୍ଧେନ ଵାଲିନା ଶକ୍ରସୂନୁନା ॥ 11 ॥
ଋଶ୍ୟମୂକେ ଗିରିଵରେ ପଂପାପର୍ୟଂତଶୋଭିତେ ।
ନିଵସତ୍ୟାତ୍ମଵାନ୍ଵୀରଶ୍ଚତୁର୍ଭିସ୍ସହ ଵାନରୈଃ ॥ 12 ॥
ଵାନରେଂଦ୍ରୋ ମହାଵୀର୍ୟସ୍ତେଜୋଵାନମିତପ୍ରଭଃ ।
ସତ୍ୟସଂଧୋ ଵିନୀତଶ୍ଚ ଧୃତିମାନ୍ମତିମାନ୍ମହାନ୍ ॥ 13 ॥
ଦକ୍ଷଃ ପ୍ରଗଲ୍ଭୋ ଦ୍ୟୁତିମାନ୍ମହାବଲପରାକ୍ରମଃ ।
ଭ୍ରାତ୍ରା ଵିଵାସିତୋ ରାମ ରାଜ୍ୟହେତୋର୍ମହାବଲଃ ॥ 14 ॥
ସ ତେ ସହାୟୋ ମିତ୍ରଂ ଚ ସୀତାୟାଃ ପରିମାର୍ଗଣେ ।
ଭଵିଷ୍ୟତି ହିତେ ରାମ ମା ଚ ଶୋକେ ମନଃ କୃଥାଃ ॥ 15 ॥
ଭଵିତଵ୍ୟଂ ହି ୟଚ୍ଚାପି ନ ତଚ୍ଛକ୍ୟମିହାନ୍ୟଥା ।
କର୍ତୁମିକ୍ଷ୍ଵାକୁଶାର୍ଦୂଲ କାଲୋ ହି ଦୁରତିକ୍ରମଃ ॥ 16 ॥
ଗଚ୍ଛ ଶ୍ରୀଘ୍ରମିତୋ ରାମ ସୁଗ୍ରୀଵଂ ତଂ ମହାବଲମ୍ ।
ଵୟସ୍ୟଂ ତଂ କୁରୁ କ୍ଷିପ୍ରମିତୋ ଗତ୍ଵାଽଦ୍ୟ ରାଘଵ ॥ 17 ॥
ଅଦ୍ରୋହାୟ ସମାଗମ୍ୟ ଦୀପ୍ୟମାନେ ଵିଭାଵସୌ ।
ସ ଚ ତେ ନାଵମଂତଵ୍ୟସ୍ସୁଗ୍ରୀଵୋ ଵାନରାଧିପଃ ॥ 18 ॥
କୃତଜ୍ଞଃ କାମରୂପୀ ଚ ସହାୟାର୍ଥୀ ଚ ଵୀର୍ୟଵାନ୍ ।
ଶକ୍ତୌହ୍ୟଦ୍ୟ ୟୁଵାଂ କର୍ତୁଂ କାର୍ୟଂ ତସ୍ୟ ଚିକୀର୍ଷିତମ୍ ॥ 19 ॥
କୃତାର୍ଥୋ ଵାଽକୃତାର୍ଥୋ ଵା କୃତ୍ୟଂ ତଵ କରିଷ୍ୟତି ।
ସ ଋକ୍ଷରଜସଃ ପୁତ୍ରଃ ପଂପାମଟତି ଶଂକିତଃ ॥ 20 ॥
ଭାସ୍କରସ୍ୟୌରସଃ ପୁତ୍ରୋ ଵାଲିନା କୃତକିଲ୍ବିଷଃ ।
ସନ୍ନିଧାୟାୟୁଧଂ କ୍ଷିପ୍ରମୃଷ୍ୟମୂକାଲୟଂ କପିମ୍ ॥ 21 ॥
କୁରୁ ରାଘଵ ସତ୍ୟେନ ଵୟସ୍ୟଂ ଵନଚାରିଣମ୍ ।
ସ ହି ସ୍ଥାନାନି ସର୍ଵାଣି କାର୍ତ୍ସ୍ନ୍ୟେନ କପିକୁଂଜରଃ ॥ 22 ॥
ନରମାଂସାଶିନାଂ ଲୋକେ ନୈପୁଣ୍ୟାଦଧିଗଚ୍ଛତି ।
ନ ତସ୍ୟାଵିଦିତଂ ଲୋକେକିଂଚିଦସ୍ତି ହି ରାଘଵ ॥ 23 ॥
ୟାଵତ୍ସୂର୍ୟଃ ପ୍ରତପତି ସହସ୍ରାଂଶୁରରିଂଦମ ।
ସ ନଦୀର୍ଵିପୁଲାନ୍ଶୈଲାନ୍ ଗିରିଦୁର୍ଗାଣି କଂଦରାନ୍ ॥ 24 ॥
ଅନ୍ଵୀକ୍ଷ୍ୟ ଵାନରୈସ୍ସାର୍ଧଂ ପତ୍ନୀଂ ତେଽଧିଗମିଷ୍ୟତି ।
ଵାନରାଂଶ୍ଚ ମହାକାୟାନ୍ପ୍ରେଷୟିଷ୍ୟତି ରାଘଵ ॥ 25 ॥
ଦିଶୋ ଵିଚେତୁଂ ତାଂ ସୀତାଂ ତ୍ଵଦ୍ଵିୟୋଗେନ ଶୋଚତୀମ୍ ।
ସ ଜ୍ଞାସ୍ୟତି ଵରାରୋହାଂ ନିର୍ମଲାଂ ରାଵଣାଲୟେ ॥ 26 ॥
ସ ମେରୁଶୃଂଗାଗ୍ରଗତାମନିଂଦିତାଂ ପ୍ରଵିଶ୍ୟ ପାତାଲତଲେଽପି ଵା ଶ୍ରିତାମ୍ ।
ପ୍ଲଵଂଗମାନାଂ ପ୍ରଵରସ୍ତଵ ପ୍ରିୟାଂ ନିହତ୍ୟ ରକ୍ଷାଂସି ପୁନଃ ପ୍ରଦାସ୍ୟତି ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଦ୍ଵିସପ୍ତତିତମସ୍ସର୍ଗଃ ॥
