ശ്രീമദ്വാല്മീകീയ രാമായണേ അരണ്യകാംഡമ് ।
അഥ ദ്വിസപ്തതിതമസ്സര്ഗഃ ।
ഏവമുക്തൌതു തൌ വീരൌ കബംധേന നരേശ്വരൌ ।
ഗിരിപ്രദരമാസാദ്യ പാവകം വിസസര്ജതുഃ ॥ 1 ॥
ലക്ഷ്മണസ്തു മഹോല്കാഭിര്ജ്വലിതാഭിസ്സമംതതഃ ।
ചിതാമാദീപയാമാസ സാ പ്രജജ്വാല സർവതഃ ॥ 2 ॥
തച്ഛരീരം കബംധസ്യ ഘൃതപിംഡോപമം മഹത് ।
മേദസാ പച്യമാനസ്യ മംദം ദഹതി പാവകഃ ॥ 3 ॥
സ വിധൂയ ചിതാമാശു വിധൂമോഽഗ്നിരിവോത്ഥിതഃ ।
അരജേ വാസസീ ബിഭ്രന്മാലാം ദിവ്യാം മഹാബലഃ ॥ 4 ॥
തതശ്ചിതായാ വേഗേന ഭാസ്വരോ വിമലാംബരഃ ।
ഉത്പപാതാശു സംഹൃഷ്ടസ്സർവപ്രത്യംഗഭൂഷണഃ ॥ 5 ॥
വിമാനേ ഭാസ്വരേ തിഷ്ഠന്ഹംസയുക്തേ യശസ്കരേ ।
പ്രഭയാ ച മഹാതേജാ ദിശോ ദശ വിരാജയന് ॥ 6 ॥
സോഽംതരിക്ഷഗതോ രാമം കബംധോ വാക്യമബ്രവീത് ।
ശൃണു രാഘവ തത്ത്വേന യഥാ സീതാമവാപ്സ്യസി ॥ 7 ॥
രാമ ഷഡ്യുക്തയോ ലോകേ യാഭിസ്സർവം വിമൃശ്യതേ ।
പരിമൃഷ്ടോ ദശാംതേന ദശാഭാഗേന സേവ്യതേ ॥ 8 ॥
ദശാഭാഗഗതോ ഹീനസ്ത്വം ഹി രാമ സലക്ഷ്മണഃ ।
യത്കൃതേ വ്യസനം പ്രാപ്തം ത്വയാ ദാരപ്രധര്ഷണമ് ॥ 9 ॥
തദവശ്യം ത്വയാ കാര്യസ്സസുഹൃത്സുഹൃദാം വര ।
അകൃത്വാ ഹി ന തേ സിദ്ധിമഹം പശ്യാമി ചിംതയന് ॥ 10 ॥
ശ്രൂയതാം രാമ വക്ഷ്യാമി സുഗ്രീവോ നാമ വാനരഃ ।
ഭ്രാത്രാ നിരസ്തഃ ക്രുദ്ധേന വാലിനാ ശക്രസൂനുനാ ॥ 11 ॥
ഋശ്യമൂകേ ഗിരിവരേ പംപാപര്യംതശോഭിതേ ।
നിവസത്യാത്മവാന്വീരശ്ചതുര്ഭിസ്സഹ വാനരൈഃ ॥ 12 ॥
വാനരേംദ്രോ മഹാവീര്യസ്തേജോവാനമിതപ്രഭഃ ।
സത്യസംധോ വിനീതശ്ച ധൃതിമാന്മതിമാന്മഹാന് ॥ 13 ॥
ദക്ഷഃ പ്രഗല്ഭോ ദ്യുതിമാന്മഹാബലപരാക്രമഃ ।
ഭ്രാത്രാ വിവാസിതോ രാമ രാജ്യഹേതോര്മഹാബലഃ ॥ 14 ॥
സ തേ സഹായോ മിത്രം ച സീതായാഃ പരിമാര്ഗണേ ।
ഭവിഷ്യതി ഹിതേ രാമ മാ ച ശോകേ മനഃ കൃഥാഃ ॥ 15 ॥
ഭവിതവ്യം ഹി യച്ചാപി ന തച്ഛക്യമിഹാന്യഥാ ।
കര്തുമിക്ഷ്വാകുശാര്ദൂല കാലോ ഹി ദുരതിക്രമഃ ॥ 16 ॥
ഗച്ഛ ശ്രീഘ്രമിതോ രാമ സുഗ്രീവം തം മഹാബലമ് ।
വയസ്യം തം കുരു ക്ഷിപ്രമിതോ ഗത്വാഽദ്യ രാഘവ ॥ 17 ॥
അദ്രോഹായ സമാഗമ്യ ദീപ്യമാനേ വിഭാവസൌ ।
സ ച തേ നാവമംതവ്യസ്സുഗ്രീവോ വാനരാധിപഃ ॥ 18 ॥
കൃതജ്ഞഃ കാമരൂപീ ച സഹായാര്ഥീ ച വീര്യവാന് ।
ശക്തൌഹ്യദ്യ യുവാം കര്തും കാര്യം തസ്യ ചികീര്ഷിതമ് ॥ 19 ॥
കൃതാര്ഥോ വാഽകൃതാര്ഥോ വാ കൃത്യം തവ കരിഷ്യതി ।
സ ഋക്ഷരജസഃ പുത്രഃ പംപാമടതി ശംകിതഃ ॥ 20 ॥
ഭാസ്കരസ്യൌരസഃ പുത്രോ വാലിനാ കൃതകില്ബിഷഃ ।
സന്നിധായായുധം ക്ഷിപ്രമൃഷ്യമൂകാലയം കപിമ് ॥ 21 ॥
കുരു രാഘവ സത്യേന വയസ്യം വനചാരിണമ് ।
സ ഹി സ്ഥാനാനി സർവാണി കാര്ത്സ്ന്യേന കപികുംജരഃ ॥ 22 ॥
നരമാംസാശിനാം ലോകേ നൈപുണ്യാദധിഗച്ഛതി ।
ന തസ്യാവിദിതം ലോകേകിംചിദസ്തി ഹി രാഘവ ॥ 23 ॥
യാവത്സൂര്യഃ പ്രതപതി സഹസ്രാംശുരരിംദമ ।
സ നദീർവിപുലാന്ശൈലാന് ഗിരിദുര്ഗാണി കംദരാന് ॥ 24 ॥
അന്വീക്ഷ്യ വാനരൈസ്സാര്ധം പത്നീം തേഽധിഗമിഷ്യതി ।
വാനരാംശ്ച മഹാകായാന്പ്രേഷയിഷ്യതി രാഘവ ॥ 25 ॥
ദിശോ വിചേതും താം സീതാം ത്വദ്വിയോഗേന ശോചതീമ് ।
സ ജ്ഞാസ്യതി വരാരോഹാം നിര്മലാം രാവണാലയേ ॥ 26 ॥
സ മേരുശൃംഗാഗ്രഗതാമനിംദിതാം പ്രവിശ്യ പാതാലതലേഽപി വാ ശ്രിതാമ് ।
പ്ലവംഗമാനാം പ്രവരസ്തവ പ്രിയാം നിഹത്യ രക്ഷാംസി പുനഃ പ്രദാസ്യതി ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ദ്വിസപ്തതിതമസ്സര്ഗഃ ॥
