ශ්රීමද්වාල්මීකීය රාමායණේ අරණ්යකාංඩම් ।
අථ ද්විසප්තතිතමස්සර්ගඃ ।
ඒවමුක්තෞතු තෞ වීරෞ කබංධේන නරේශ්වරෞ ।
ගිරිප්රදරමාසාද්ය පාවකං විසසර්ජතුඃ ॥ 1 ॥
ලක්ෂ්මණස්තු මහෝල්කාභිර්ජ්වලිතාභිස්සමංතතඃ ।
චිතාමාදීපයාමාස සා ප්රජජ්වාල සර්වතඃ ॥ 2 ॥
තච්ඡරීරං කබංධස්ය ඝෘතපිංඩෝපමං මහත් ।
මේදසා පච්යමානස්ය මංදං දහති පාවකඃ ॥ 3 ॥
ස විධූය චිතාමාශු විධූමෝऽග්නිරිවෝත්ථිතඃ ।
අරජේ වාසසී බිභ්රන්මාලාං දිව්යාං මහාබලඃ ॥ 4 ॥
තතශ්චිතායා වේගේන භාස්වරෝ විමලාංබරඃ ।
උත්පපාතාශු සංහෘෂ්ටස්සර්වප්රත්යංගභූෂණඃ ॥ 5 ॥
විමානේ භාස්වරේ තිෂ්ඨන්හංසයුක්තේ යශස්කරේ ।
ප්රභයා ච මහාතේජා දිශෝ දශ විරාජයන් ॥ 6 ॥
සෝऽංතරික්ෂගතෝ රාමං කබංධෝ වාක්යමබ්රවීත් ।
ශෘණු රාඝව තත්ත්වේන යථා සීතාමවාප්ස්යසි ॥ 7 ॥
රාම ෂඩ්යුක්තයෝ ලෝකේ යාභිස්සර්වං විමෘශ්යතේ ।
පරිමෘෂ්ටෝ දශාංතේන දශාභාගේන සේව්යතේ ॥ 8 ॥
දශාභාගගතෝ හීනස්ත්වං හි රාම සලක්ෂ්මණඃ ।
යත්කෘතේ ව්යසනං ප්රාප්තං ත්වයා දාරප්රධර්ෂණම් ॥ 9 ॥
තදවශ්යං ත්වයා කාර්යස්සසුහෘත්සුහෘදාං වර ।
අකෘත්වා හි න තේ සිද්ධිමහං පශ්යාමි චිංතයන් ॥ 10 ॥
ශ්රූයතාං රාම වක්ෂ්යාමි සුග්රීවෝ නාම වානරඃ ।
භ්රාත්රා නිරස්තඃ ක්රුද්ධේන වාලිනා ශක්රසූනුනා ॥ 11 ॥
ඍශ්යමූකේ ගිරිවරේ පංපාපර්යංතශෝභිතේ ।
නිවසත්යාත්මවාන්වීරශ්චතුර්භිස්සහ වානරෛඃ ॥ 12 ॥
වානරේංද්රෝ මහාවීර්යස්තේජෝවානමිතප්රභඃ ।
සත්යසංධෝ විනීතශ්ච ධෘතිමාන්මතිමාන්මහාන් ॥ 13 ॥
දක්ෂඃ ප්රගල්භෝ ද්යුතිමාන්මහාබලපරාක්රමඃ ।
භ්රාත්රා විවාසිතෝ රාම රාජ්යහේතෝර්මහාබලඃ ॥ 14 ॥
ස තේ සහායෝ මිත්රං ච සීතායාඃ පරිමාර්ගණේ ।
භවිෂ්යති හිතේ රාම මා ච ශෝකේ මනඃ කෘථාඃ ॥ 15 ॥
භවිතව්යං හි යච්චාපි න තච්ඡක්යමිහාන්යථා ।
කර්තුමික්ෂ්වාකුශාර්දූල කාලෝ හි දුරතික්රමඃ ॥ 16 ॥
ගච්ඡ ශ්රීඝ්රමිතෝ රාම සුග්රීවං තං මහාබලම් ।
වයස්යං තං කුරු ක්ෂිප්රමිතෝ ගත්වාऽද්ය රාඝව ॥ 17 ॥
අද්රෝහාය සමාගම්ය දීප්යමානේ විභාවසෞ ।
ස ච තේ නාවමංතව්යස්සුග්රීවෝ වානරාධිපඃ ॥ 18 ॥
කෘතජ්ඤඃ කාමරූපී ච සහායාර්ථී ච වීර්යවාන් ।
ශක්තෞහ්යද්ය යුවාං කර්තුං කාර්යං තස්ය චිකීර්ෂිතම් ॥ 19 ॥
කෘතාර්ථෝ වාऽකෘතාර්ථෝ වා කෘත්යං තව කරිෂ්යති ।
ස ඍක්ෂරජසඃ පුත්රඃ පංපාමටති ශංකිතඃ ॥ 20 ॥
භාස්කරස්යෞරසඃ පුත්රෝ වාලිනා කෘතකිල්බිෂඃ ।
සන්නිධායායුධං ක්ෂිප්රමෘෂ්යමූකාලයං කපිම් ॥ 21 ॥
කුරු රාඝව සත්යේන වයස්යං වනචාරිණම් ।
ස හි ස්ථානානි සර්වාණි කාර්ත්ස්න්යේන කපිකුංජරඃ ॥ 22 ॥
නරමාංසාශිනාං ලෝකේ නෛපුණ්යාදධිගච්ඡති ।
න තස්යාවිදිතං ලෝකේකිංචිදස්ති හි රාඝව ॥ 23 ॥
යාවත්සූර්යඃ ප්රතපති සහස්රාංශුරරිංදම ।
ස නදීර්විපුලාන්ශෛලාන් ගිරිදුර්ගාණි කංදරාන් ॥ 24 ॥
අන්වීක්ෂ්ය වානරෛස්සාර්ධං පත්නීං තේऽධිගමිෂ්යති ।
වානරාංශ්ච මහාකායාන්ප්රේෂයිෂ්යති රාඝව ॥ 25 ॥
දිශෝ විචේතුං තාං සීතාං ත්වද්වියෝගේන ශෝචතීම් ।
ස ජ්ඤාස්යති වරාරෝහාං නිර්මලාං රාවණාලයේ ॥ 26 ॥
ස මේරුශෘංගාග්රගතාමනිංදිතාං ප්රවිශ්ය පාතාලතලේऽපි වා ශ්රිතාම් ।
ප්ලවංගමානාං ප්රවරස්තව ප්රියාං නිහත්ය රක්ෂාංසි පුනඃ ප්රදාස්යති ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්විසප්තතිතමස්සර්ගඃ ॥
