ශ්රීමද්වාල්මීකීය රාමායණේ අරණ්යකාංඩම් ।
අථ පංචසප්තතිතමස්සර්ගඃ ।
දිවං තු තස්යාං යාතායාං ශබර්යාං ස්වේන තේජසා ।
ලක්ෂ්මණේන සහ භ්රාත්රා චිංතයාමාස රාඝවඃ ॥ 1 ॥
ස චිංතයිත්වා ධර්මාත්මා ප්රභාවං තං මහාත්මනාම් ।
හිතකාරිණමේකාග්රං ලක්ෂ්මණං රාඝවෝऽබ්රවීත් ॥ 2 ॥
දෘෂ්ටෝऽයමාශ්රමස්සෞම්ය බහ්වාශ්චර්යෝ මහාත්මනාම් ।
විශ්වස්තමෘගශාර්දූලෝ නානාවිහගසේවිතඃ ॥ 3 ॥
සප්තානාං ච සමුද්රාණාමේෂු තීර්ථේෂු ලක්ෂ්මණ ।
උපස්පෘෂ්ටං ච විධිවත්පිතරශ්චාපි තර්පිතාඃ ॥ 4 ॥
ප්රණෂ්ටමශුභං තත්තත්කල්යාණං සමුපස්ථිතම් ।
තේන තත්ත්වේන හෘෂ්ටං මේ මනෝ ලක්ෂ්මණ සංප්රති ॥ 5 ॥
හෘදයේ හි නරව්යාඝ්ර ශුභමාවිර්භවිෂ්යති ।
තදාගච්ඡ ගමිෂ්යාමි පංපාං තාං ප්රියදර්ශනාම් ॥ 6 ॥
ඍෂ්යමූකෝ ගිරිර්යත්ර නාතිදූරේ ප්රකාශතේ ।
යස්මින්වසති ධර්මාත්මා සුග්රීවෝංऽශුමතස්සුතඃ ॥ 7 ॥
නිත්යං වාලිභයාත්ත්රස්තශ්චතුර්භිස්සහ වානරෛඃ ।
අභිත්වරේ ච තං ද්රෂ්ටුං සුග්රීවං වානරර්ෂභම් ॥ 8 ॥
තදධීනං හි මේ සෞම්ය සීතායාඃ පරිමාර්ගණම් ।
ඒවං බ්රුවාණං තං ධීරං රාමං සෞමිත්රිරබ්රවීත් ॥ 9 ॥
ගච්ඡාවස්ත්වරිතං තත්ර මමාපි ත්වරතේ මනඃ ।
ආශ්රමාත්තු තත ස්තස්මාන්නිෂ්ක්රම්ය ස විශාංපතිඃ ॥ 10 ॥
ආජගාම තතඃ පංපාං ලක්ෂ්මණේන සහ ප්රභුඃ ।
ස දදර්ශ තතඃ පුණ්යාමුදාරජනසේවිතාම් ॥ 11 ॥
නානාද්රුමලතාකීර්ණාං පංපාං පානීයවාහිනීම් ।
පද්මෛස්සෞගංධිකෛස්තාම්රාං ශුක්ලාං කුමුදමංඩලෛඃ ॥ 12 ॥
නීලාං කුවලයෝද්ඝාටෛර්බහුවර්ණාං කුථාමිව ।
ස තාමාසාද්ය වෛ රාමෝ දූරාදුදකවාහිනීම් ॥ 13 ॥
මතංගසරසං නාම හ්රදං සමවගාහත ।
අරවිංදෝත්පලවතීං පද්මසෞගංධිකායුතාම් ॥ 14 ॥
පුෂ්පිතාම්රවණෝපේතාං බර්හිණෝද්ඝුෂ්ටනාදිතාම් ।
තිලකෛර්බීජපූරෛශ්ච ධවෛශ්ශුක්ලද්රුමෛස්තථා ॥ 15 ॥
පුෂ්පිතෛඃ කරවීරෛශ්ච පුන්නාගෛශ්ච සුපුෂ්පිතෛඃ ।
මාලතීකුංදගුල්මෛශ්ච භාංඩීරෛර්නිචුලෛස්තථා ॥ 16 ॥
අශෝකෛස්සප්තපර්ණෛශ්ච කේතකෛරතිමුක්තකෛඃ ।
අන්යෛශ්ච විවිධෛර්වෘක්ෂෛඃ ප්රමදාමිව භූෂිතාම් ॥ 17 ॥
සමීක්ෂමාණෞ පුෂපාඪ්යං සර්වතෝ විපුලද්රුමම් ।
කෝයෂ්ටිකෛශ්චාර්ජුනකෛශ්ශතපත්රෛශ්ච කීරකෛඃ ॥ 18 ॥
ඒතෛශ්චාන්යෛශ්ච විහගෛර්නාදිතං තු වනං මහත් ।
තතෝ ජග්මතුරව්යග්රෞ රාඝවෞ සුසමාහිතෞ ॥ 19 ॥
තද්වනං චෛව සරසඃ පශ්යංතෛ ශකුනෛර්යුතම් ।
ස දදර්ශ තතඃ පංපාං ශීතවාරිනිධිං ශුභාම් ॥ 20 ॥
තිලකාශෝකපුන්නාගවකුලෝද්දාලකාශිනීම් ।
ස රාමෝ විවිධාන්වෘක්ෂාන්සරාංසි විවිධානි ච ॥ 21 ॥
පශ්යන්කාමාභිසංතප්තෝ ජගාම පරමං හ්රදම් ।
පුෂ්පිතෝපවනෝපේතාං සාලචංපකශෝභිතාම් ॥ 22 ॥
ෂට්පදෞඝසමාවිෂ්ටාං ශ්රීමතීමතුලප්රභාම් ।
ස්ඵටිකෝපමතෝයාඪ්යාං ශ්ලක්ෂ්ණවාලුකසංතතාම් ॥ 23 ॥
ස තාං දෘෂ්ට්වා පුනඃ පංපාං පද්මසෞගන්ඝිකෛර්යුතාම් ।
ඉත්යුවාච තදා වාක්යං ලක්ෂ්මණං සත්යවික්රමඃ ॥ 24 ॥
අස්යාස්තීරේ තු පූර්වෝක්තඃ පර්වතෝ ධාතුමංඩිතඃ ।
ඍෂ්යමූක ඉති ඛ්යාතඃ පුණ්යඃ පුෂ්පිතපාදපඃ ॥ 25 ॥
හරේඃ ඍක්ෂරජෝනාම්නඃ පුත්රස්තස්ය මහාත්මනඃ ।
අධ්යාස්තේ තං මහාවීර්යස්සුග්රීව ඉති විශ්රුතඃ ॥ 26 ॥
සුග්රීවමභිගච්ඡ ත්වං වානරේංද්රං නරර්ෂභ ।
ඉත්යුවාච පුනර්වාක්යං ලක්ෂ්මණං සත්යවික්රමම් ॥ 27 ॥
රාජ්යභ්රෂ්ටේන දීනේන තස්යාමාසක්තචේතසා ।
කථං මයා විනා ශක්යං සීතාං ලක්ෂ්මණ ජීවිතුම් ॥ 28 ॥
ඉත්යේවමුක්ත්වා මදනාභිපීඩිතඃ ස ලක්ෂ්මණං වාක්යමනන්යචේතසම් ।
විවේශ පංපාං නලිනීං මනෝරමාං රඝූත්තමශ්ශෝකවිෂාදයංත්රිතඃ ॥ 29 ॥
තතෝ මහද්වර්ත්ම සුදූරසංක්රමං ක්රමේණ ගත්වා ප්රවිලෝකයන්වනම් ।
දදර්ශ පංපාං ශුභදර්ශකානනාමනේකනානාවිධපක්ෂිජාලකාම් ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචසප්තතිතමස්සර්ගඃ ॥
