ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ପଂଚସପ୍ତତିତମସ୍ସର୍ଗଃ ।
ଦିଵଂ ତୁ ତସ୍ୟାଂ ୟାତାୟାଂ ଶବର୍ୟାଂ ସ୍ଵେନ ତେଜସା ।
ଲକ୍ଷ୍ମଣେନ ସହ ଭ୍ରାତ୍ରା ଚିଂତୟାମାସ ରାଘଵଃ ॥ 1 ॥
ସ ଚିଂତୟିତ୍ଵା ଧର୍ମାତ୍ମା ପ୍ରଭାଵଂ ତଂ ମହାତ୍ମନାମ୍ ।
ହିତକାରିଣମେକାଗ୍ରଂ ଲକ୍ଷ୍ମଣଂ ରାଘଵୋଽବ୍ରଵୀତ୍ ॥ 2 ॥
ଦୃଷ୍ଟୋଽୟମାଶ୍ରମସ୍ସୌମ୍ୟ ବହ୍ଵାଶ୍ଚର୍ୟୋ ମହାତ୍ମନାମ୍ ।
ଵିଶ୍ଵସ୍ତମୃଗଶାର୍ଦୂଲୋ ନାନାଵିହଗସେଵିତଃ ॥ 3 ॥
ସପ୍ତାନାଂ ଚ ସମୁଦ୍ରାଣାମେଷୁ ତୀର୍ଥେଷୁ ଲକ୍ଷ୍ମଣ ।
ଉପସ୍ପୃଷ୍ଟଂ ଚ ଵିଧିଵତ୍ପିତରଶ୍ଚାପି ତର୍ପିତାଃ ॥ 4 ॥
ପ୍ରଣଷ୍ଟମଶୁଭଂ ତତ୍ତତ୍କଲ୍ୟାଣଂ ସମୁପସ୍ଥିତମ୍ ।
ତେନ ତତ୍ତ୍ଵେନ ହୃଷ୍ଟଂ ମେ ମନୋ ଲକ୍ଷ୍ମଣ ସଂପ୍ରତି ॥ 5 ॥
ହୃଦୟେ ହି ନରଵ୍ୟାଘ୍ର ଶୁଭମାଵିର୍ଭଵିଷ୍ୟତି ।
ତଦାଗଚ୍ଛ ଗମିଷ୍ୟାମି ପଂପାଂ ତାଂ ପ୍ରିୟଦର୍ଶନାମ୍ ॥ 6 ॥
ଋଷ୍ୟମୂକୋ ଗିରିର୍ୟତ୍ର ନାତିଦୂରେ ପ୍ରକାଶତେ ।
ୟସ୍ମିନ୍ଵସତି ଧର୍ମାତ୍ମା ସୁଗ୍ରୀଵୋଂଽଶୁମତସ୍ସୁତଃ ॥ 7 ॥
ନିତ୍ୟଂ ଵାଲିଭୟାତ୍ତ୍ରସ୍ତଶ୍ଚତୁର୍ଭିସ୍ସହ ଵାନରୈଃ ।
ଅଭିତ୍ଵରେ ଚ ତଂ ଦ୍ରଷ୍ଟୁଂ ସୁଗ୍ରୀଵଂ ଵାନରର୍ଷଭମ୍ ॥ 8 ॥
ତଦଧୀନଂ ହି ମେ ସୌମ୍ୟ ସୀତାୟାଃ ପରିମାର୍ଗଣମ୍ ।
ଏଵଂ ବ୍ରୁଵାଣଂ ତଂ ଧୀରଂ ରାମଂ ସୌମିତ୍ରିରବ୍ରଵୀତ୍ ॥ 9 ॥
ଗଚ୍ଛାଵସ୍ତ୍ଵରିତଂ ତତ୍ର ମମାପି ତ୍ଵରତେ ମନଃ ।
ଆଶ୍ରମାତ୍ତୁ ତତ ସ୍ତସ୍ମାନ୍ନିଷ୍କ୍ରମ୍ୟ ସ ଵିଶାଂପତିଃ ॥ 10 ॥
ଆଜଗାମ ତତଃ ପଂପାଂ ଲକ୍ଷ୍ମଣେନ ସହ ପ୍ରଭୁଃ ।
ସ ଦଦର୍ଶ ତତଃ ପୁଣ୍ୟାମୁଦାରଜନସେଵିତାମ୍ ॥ 11 ॥
ନାନାଦ୍ରୁମଲତାକୀର୍ଣାଂ ପଂପାଂ ପାନୀୟଵାହିନୀମ୍ ।
ପଦ୍ମୈସ୍ସୌଗଂଧିକୈସ୍ତାମ୍ରାଂ ଶୁକ୍ଲାଂ କୁମୁଦମଂଡଲୈଃ ॥ 12 ॥
ନୀଲାଂ କୁଵଲୟୋଦ୍ଘାଟୈର୍ବହୁଵର୍ଣାଂ କୁଥାମିଵ ।
ସ ତାମାସାଦ୍ୟ ଵୈ ରାମୋ ଦୂରାଦୁଦକଵାହିନୀମ୍ ॥ 13 ॥
ମତଂଗସରସଂ ନାମ ହ୍ରଦଂ ସମଵଗାହତ ।
ଅରଵିଂଦୋତ୍ପଲଵତୀଂ ପଦ୍ମସୌଗଂଧିକାୟୁତାମ୍ ॥ 14 ॥
ପୁଷ୍ପିତାମ୍ରଵଣୋପେତାଂ ବର୍ହିଣୋଦ୍ଘୁଷ୍ଟନାଦିତାମ୍ ।
ତିଲକୈର୍ବୀଜପୂରୈଶ୍ଚ ଧଵୈଶ୍ଶୁକ୍ଲଦ୍ରୁମୈସ୍ତଥା ॥ 15 ॥
ପୁଷ୍ପିତୈଃ କରଵୀରୈଶ୍ଚ ପୁନ୍ନାଗୈଶ୍ଚ ସୁପୁଷ୍ପିତୈଃ ।
ମାଲତୀକୁଂଦଗୁଲ୍ମୈଶ୍ଚ ଭାଂଡୀରୈର୍ନିଚୁଲୈସ୍ତଥା ॥ 16 ॥
ଅଶୋକୈସ୍ସପ୍ତପର୍ଣୈଶ୍ଚ କେତକୈରତିମୁକ୍ତକୈଃ ।
ଅନ୍ୟୈଶ୍ଚ ଵିଵିଧୈର୍ଵୃକ୍ଷୈଃ ପ୍ରମଦାମିଵ ଭୂଷିତାମ୍ ॥ 17 ॥
ସମୀକ୍ଷମାଣୌ ପୁଷପାଢ୍ୟଂ ସର୍ଵତୋ ଵିପୁଲଦ୍ରୁମମ୍ ।
କୋୟଷ୍ଟିକୈଶ୍ଚାର୍ଜୁନକୈଶ୍ଶତପତ୍ରୈଶ୍ଚ କୀରକୈଃ ॥ 18 ॥
ଏତୈଶ୍ଚାନ୍ୟୈଶ୍ଚ ଵିହଗୈର୍ନାଦିତଂ ତୁ ଵନଂ ମହତ୍ ।
ତତୋ ଜଗ୍ମତୁରଵ୍ୟଗ୍ରୌ ରାଘଵୌ ସୁସମାହିତୌ ॥ 19 ॥
ତଦ୍ଵନଂ ଚୈଵ ସରସଃ ପଶ୍ୟଂତୈ ଶକୁନୈର୍ୟୁତମ୍ ।
ସ ଦଦର୍ଶ ତତଃ ପଂପାଂ ଶୀତଵାରିନିଧିଂ ଶୁଭାମ୍ ॥ 20 ॥
ତିଲକାଶୋକପୁନ୍ନାଗଵକୁଲୋଦ୍ଦାଲକାଶିନୀମ୍ ।
ସ ରାମୋ ଵିଵିଧାନ୍ଵୃକ୍ଷାନ୍ସରାଂସି ଵିଵିଧାନି ଚ ॥ 21 ॥
ପଶ୍ୟନ୍କାମାଭିସଂତପ୍ତୋ ଜଗାମ ପରମଂ ହ୍ରଦମ୍ ।
ପୁଷ୍ପିତୋପଵନୋପେତାଂ ସାଲଚଂପକଶୋଭିତାମ୍ ॥ 22 ॥
ଷଟ୍ପଦୌଘସମାଵିଷ୍ଟାଂ ଶ୍ରୀମତୀମତୁଲପ୍ରଭାମ୍ ।
ସ୍ଫଟିକୋପମତୋୟାଢ୍ୟାଂ ଶ୍ଲକ୍ଷ୍ଣଵାଲୁକସଂତତାମ୍ ॥ 23 ॥
ସ ତାଂ ଦୃଷ୍ଟ୍ଵା ପୁନଃ ପଂପାଂ ପଦ୍ମସୌଗନ୍ଘିକୈର୍ୟୁତାମ୍ ।
ଇତ୍ୟୁଵାଚ ତଦା ଵାକ୍ୟଂ ଲକ୍ଷ୍ମଣଂ ସତ୍ୟଵିକ୍ରମଃ ॥ 24 ॥
ଅସ୍ୟାସ୍ତୀରେ ତୁ ପୂର୍ଵୋକ୍ତଃ ପର୍ଵତୋ ଧାତୁମଂଡିତଃ ।
ଋଷ୍ୟମୂକ ଇତି ଖ୍ୟାତଃ ପୁଣ୍ୟଃ ପୁଷ୍ପିତପାଦପଃ ॥ 25 ॥
ହରେଃ ଋକ୍ଷରଜୋନାମ୍ନଃ ପୁତ୍ରସ୍ତସ୍ୟ ମହାତ୍ମନଃ ।
ଅଧ୍ୟାସ୍ତେ ତଂ ମହାଵୀର୍ୟସ୍ସୁଗ୍ରୀଵ ଇତି ଵିଶ୍ରୁତଃ ॥ 26 ॥
ସୁଗ୍ରୀଵମଭିଗଚ୍ଛ ତ୍ଵଂ ଵାନରେଂଦ୍ରଂ ନରର୍ଷଭ ।
ଇତ୍ୟୁଵାଚ ପୁନର୍ଵାକ୍ୟଂ ଲକ୍ଷ୍ମଣଂ ସତ୍ୟଵିକ୍ରମମ୍ ॥ 27 ॥
ରାଜ୍ୟଭ୍ରଷ୍ଟେନ ଦୀନେନ ତସ୍ୟାମାସକ୍ତଚେତସା ।
କଥଂ ମୟା ଵିନା ଶକ୍ୟଂ ସୀତାଂ ଲକ୍ଷ୍ମଣ ଜୀଵିତୁମ୍ ॥ 28 ॥
ଇତ୍ୟେଵମୁକ୍ତ୍ଵା ମଦନାଭିପୀଡିତଃ ସ ଲକ୍ଷ୍ମଣଂ ଵାକ୍ୟମନନ୍ୟଚେତସମ୍ ।
ଵିଵେଶ ପଂପାଂ ନଲିନୀଂ ମନୋରମାଂ ରଘୂତ୍ତମଶ୍ଶୋକଵିଷାଦୟଂତ୍ରିତଃ ॥ 29 ॥
ତତୋ ମହଦ୍ଵର୍ତ୍ମ ସୁଦୂରସଂକ୍ରମଂ କ୍ରମେଣ ଗତ୍ଵା ପ୍ରଵିଲୋକୟନ୍ଵନମ୍ ।
ଦଦର୍ଶ ପଂପାଂ ଶୁଭଦର୍ଶକାନନାମନେକନାନାଵିଧପକ୍ଷିଜାଲକାମ୍ ॥ 30 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ପଂଚସପ୍ତତିତମସ୍ସର୍ଗଃ ॥
