śrīmadvālmīkīya rāmāyaṇē araṇyakāṇḍam ।
atha pañchasaptatitamassargaḥ ।
divaṃ tu tasyāṃ yātāyāṃ śabaryāṃ svēna tējasā ।
lakṣmaṇēna saha bhrātrā chintayāmāsa rāghavaḥ ॥ 1 ॥
sa chintayitvā dharmātmā prabhāvaṃ taṃ mahātmanām ।
hitakāriṇamēkāgraṃ lakṣmaṇaṃ rāghavō'bravīt ॥ 2 ॥
dṛṣṭō'yamāśramassaumya bahvāścharyō mahātmanām ।
viśvastamṛgaśārdūlō nānāvihagasēvitaḥ ॥ 3 ॥
saptānāṃ cha samudrāṇāmēṣu tīrthēṣu lakṣmaṇa ।
upaspṛṣṭaṃ cha vidhivatpitaraśchāpi tarpitāḥ ॥ 4 ॥
praṇaṣṭamaśubhaṃ tattatkalyāṇaṃ samupasthitam ।
tēna tattvēna hṛṣṭaṃ mē manō lakṣmaṇa samprati ॥ 5 ॥
hṛdayē hi naravyāghra śubhamāvirbhaviṣyati ।
tadāgachCha gamiṣyāmi pampāṃ tāṃ priyadarśanām ॥ 6 ॥
ṛṣyamūkō giriryatra nātidūrē prakāśatē ।
yasminvasati dharmātmā sugrīvōṃ'śumatassutaḥ ॥ 7 ॥
nityaṃ vālibhayāttrastaśchaturbhissaha vānaraiḥ ।
abhitvarē cha taṃ draṣṭuṃ sugrīvaṃ vānararṣabham ॥ 8 ॥
tadadhīnaṃ hi mē saumya sītāyāḥ parimārgaṇam ।
ēvaṃ bruvāṇaṃ taṃ dhīraṃ rāmaṃ saumitrirabravīt ॥ 9 ॥
gachChāvastvaritaṃ tatra mamāpi tvaratē manaḥ ।
āśramāttu tata stasmānniṣkramya sa viśāmpatiḥ ॥ 10 ॥
ājagāma tataḥ pampāṃ lakṣmaṇēna saha prabhuḥ ।
sa dadarśa tataḥ puṇyāmudārajanasēvitām ॥ 11 ॥
nānādrumalatākīrṇāṃ pampāṃ pānīyavāhinīm ।
padmaissaugandhikaistāmrāṃ śuklāṃ kumudamaṇḍalaiḥ ॥ 12 ॥
nīlāṃ kuvalayōdghāṭairbahuvarṇāṃ kuthāmiva ।
sa tāmāsādya vai rāmō dūrādudakavāhinīm ॥ 13 ॥
mataṅgasarasaṃ nāma hradaṃ samavagāhata ।
aravindōtpalavatīṃ padmasaugandhikāyutām ॥ 14 ॥
puṣpitāmravaṇōpētāṃ barhiṇōdghuṣṭanāditām ।
tilakairbījapūraiścha dhavaiśśukladrumaistathā ॥ 15 ॥
puṣpitaiḥ karavīraiścha punnāgaiścha supuṣpitaiḥ ।
mālatīkundagulmaiścha bhāṇḍīrairnichulaistathā ॥ 16 ॥
aśōkaissaptaparṇaiścha kētakairatimuktakaiḥ ।
anyaiścha vividhairvṛkṣaiḥ pramadāmiva bhūṣitām ॥ 17 ॥
samīkṣamāṇau puṣapāḍhyaṃ sarvatō vipuladrumam ।
kōyaṣṭikaiśchārjunakaiśśatapatraiścha kīrakaiḥ ॥ 18 ॥
ētaiśchānyaiścha vihagairnāditaṃ tu vanaṃ mahat ।
tatō jagmaturavyagrau rāghavau susamāhitau ॥ 19 ॥
tadvanaṃ chaiva sarasaḥ paśyantai śakunairyutam ।
sa dadarśa tataḥ pampāṃ śītavārinidhiṃ śubhām ॥ 20 ॥
tilakāśōkapunnāgavakulōddālakāśinīm ।
sa rāmō vividhānvṛkṣānsarāṃsi vividhāni cha ॥ 21 ॥
paśyankāmābhisantaptō jagāma paramaṃ hradam ।
puṣpitōpavanōpētāṃ sālachampakaśōbhitām ॥ 22 ॥
ṣaṭpadaughasamāviṣṭāṃ śrīmatīmatulaprabhām ।
sphaṭikōpamatōyāḍhyāṃ ślakṣṇavālukasantatām ॥ 23 ॥
sa tāṃ dṛṣṭvā punaḥ pampāṃ padmasauganghikairyutām ।
ityuvācha tadā vākyaṃ lakṣmaṇaṃ satyavikramaḥ ॥ 24 ॥
asyāstīrē tu pūrvōktaḥ parvatō dhātumaṇḍitaḥ ।
ṛṣyamūka iti khyātaḥ puṇyaḥ puṣpitapādapaḥ ॥ 25 ॥
harēḥ ṛkṣarajōnāmnaḥ putrastasya mahātmanaḥ ।
adhyāstē taṃ mahāvīryassugrīva iti viśrutaḥ ॥ 26 ॥
sugrīvamabhigachCha tvaṃ vānarēndraṃ nararṣabha ।
ityuvācha punarvākyaṃ lakṣmaṇaṃ satyavikramam ॥ 27 ॥
rājyabhraṣṭēna dīnēna tasyāmāsaktachētasā ।
kathaṃ mayā vinā śakyaṃ sītāṃ lakṣmaṇa jīvitum ॥ 28 ॥
ityēvamuktvā madanābhipīḍitaḥ sa lakṣmaṇaṃ vākyamananyachētasam ।
vivēśa pampāṃ nalinīṃ manōramāṃ raghūttamaśśōkaviṣādayantritaḥ ॥ 29 ॥
tatō mahadvartma sudūrasaṅkramaṃ kramēṇa gatvā pravilōkayanvanam ।
dadarśa pampāṃ śubhadarśakānanāmanēkanānāvidhapakṣijālakām ॥ 30 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē pañchasaptatitamassargaḥ ॥
