ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ପଂଚଦଶସ୍ସର୍ଗଃ ।
ଅଥ ତସ୍ୟ ନିନାଦଂ ତଂ ସୁଗ୍ରୀଵସ୍ୟ ମହାତ୍ମନଃ ।
ଶୁଶ୍ରାଵାଂତଃ ପୁର ଗତୋ ଵାଲୀ ଭ୍ରାତୁରମର୍ଷଣଃ ॥ 1 ॥
ଶ୍ରୁତ୍ଵା ତୁ ତସ୍ୟ ନିନଦଂ ସର୍ଵଭୂତପ୍ରକଂପନମ୍ ।
ମଦଶ୍ଚୈକପଦେ ନଷ୍ଟଃ କ୍ରୋଧଶ୍ଚାପତିତୋ ମହାନ୍ ॥ 2 ॥
ସ ତୁ ରୋଷପରୀତାଂଗୋ ଵାଲୀ ସଂଧ୍ୟାକନକପ୍ରଭଃ ।
ଉପରକ୍ତ ଇଵାଦିତ୍ୟସ୍ସଦ୍ୟୋ ନିଷ୍ପ୍ରଭତାଂ ଗତଃ ॥ 3 ॥
ଵାଲୀ ଦଂଷ୍ଟ୍ରା କରାଲଃ ତୁ କ୍ରୋଧାଦ୍ ଦୀପ୍ତ ଅଗ୍ନି ଲୋଚନଃ ।
ଭାତି ଉତ୍ପତିତ ପଦ୍ମାଭଃ ସମୃଣାଲ ଇଵ ହ୍ରଦଃ ॥ 4 ॥
ଶବ୍ଦଂ ଦୁର୍ମର୍ଷଣଂ ଶ୍ରୁତ୍ଵା ନିଷ୍ପପାତ ତତୋ ହରିଃ ।
ଵେଗେନ ଚରଣନ୍ୟାସୈର୍ଦାରୟନ୍ନିଵ ମେଦିନୀମ୍ ॥ 5 ॥
ତଂ ତୁ ତାରା ପରିଷ୍ଵଜ୍ୟ ସ୍ନେହାଦ୍ଦର୍ଶିତସୌହୃଦାଃ ।
ଉଵାଚ ତ୍ରସ୍ତସଂଭ୍ରାଂତା ହିତୋଦର୍କମିଦଂ ଵଚଃ ॥ 6 ॥
ସାଧୁ କ୍ରୋଧମିମଂ ଵୀର ନଦୀଵେଗମିଵାଗତମ୍ ।
ଶୟନାଦୁତ୍ଥିତଃ କାଲ୍ୟଂ ତ୍ୟଜ ଭୁକ୍ତାମିଵ ସ୍ରଜମ୍ ॥ 7 ॥
କାଲ୍ୟମେତେନ ସଂଗ୍ରାମଂ କରିଷ୍ୟସି ଚ ଵାନର ।
ଵୀର ତେ ଶତ୍ରୁବାହୁଲ୍ୟଂ ଫଲ୍ଗୁତା ଵା ନ ଵିଦ୍ୟତେ ॥ 8 ॥
ସହସା ତଵ ନିଷ୍କ୍ରାମୋ ମମ ତାଵନ୍ନ ରୋଚତେ ।
ଶ୍ରୂୟତାଂ ଚାଭିଧାସ୍ୟାମି ୟନ୍ନିମିତ୍ତଂ ନିଵାର୍ୟସେ ॥ 9 ॥
ପୂର୍ଵମାପତିତଃ କ୍ରୋଧାତ୍ସ ତ୍ଵାମାହ୍ଵୟତେ ୟୁଧି ।
ନିଷ୍ପତ୍ୟ ଚ ନିରସ୍ତସ୍ତେ ହନ୍ୟମାନୋ ଦିଶୋ ଗତଃ ॥ 10 ॥
ତ୍ଵୟା ତସ୍ୟ ନିରସ୍ତସ୍ୟ ପୀଡିତସ୍ୟ ଵିଶେଷତଃ ।
ଇହୈତ୍ୟ ପୁନରାହ୍ଵାନଂ ଶଂକାଂ ଜନୟତୀଵ ମେ ॥ 11 ॥
ଦର୍ପଶ୍ଚ ଵ୍ୟଵସାୟଶ୍ଚ ୟାଦୃଶସ୍ତସ୍ୟ ନର୍ଦତଃ ।
ନିନାଦଶ୍ଚାପି ସଂରଂଭୋ ନୈତଦଲ୍ପଂ ହି କାରଣମ୍ ॥ 12 ॥
ନାସହାୟମହଂ ମନ୍ୟେ ସୁଗ୍ରୀଵଂ ତମିହାଗତମ୍ ।
ଅଵଷ୍ଟବ୍ଧସହାୟଶ୍ଚ ୟମାଶ୍ରିତ୍ୟୈଷ ଗର୍ଜତି ॥ 13 ॥
ପ୍ରକୃତ୍ୟା ନିପୁଣଶ୍ଚୈଵ ବୁଦ୍ଧିମାଂଶ୍ଚୈଵ ଵାନରଃ ।
ଅପରୀକ୍ଷିତଵୀର୍ୟେଣ ସୁଗ୍ରୀଵସ୍ସହନୈଷ୍ୟତି ॥ 14 ॥
ପୂର୍ଵମେଵ ମୟା ଵୀର ଶ୍ରୁତଂ କଥୟତୋ ଵଚଃ ।
ଅଂଗଦସ୍ୟ କୁମାରସ୍ୟ ଵକ୍ଷ୍ୟାମିତ୍ଵା ହିତଂ ଵଚଃ ॥ 15 ॥
ଅଂଗଦସ୍ତୁ କୁମାରୋଽୟଂ ଵନାଂତମୁପନିର୍ଗତଃ ।
ପ୍ରଵୃତ୍ତିସ୍ତେନ କଥିତା ଚାରୈ ରାପ୍ତୈର୍ନିଵେଦିତା ॥ 16 ॥
ଅୟୋଧ୍ୟାଧିପତେଃ ପୁତ୍ରୌ ଶୂରୌ ସମରଦୁର୍ଜୟୌ ।
ଇକ୍ଷ୍ଵାକୂଣାଂ କୁଲେ ଜାତୌ ପ୍ରଥିତୌ ରାମଲକ୍ଷ୍ମଣୌ ॥ 17 ॥
ସୁଗ୍ରୀଵପ୍ରିୟକାମାର୍ଥଂ ପ୍ରାପ୍ତୌ ତତ୍ର ଦୁରାସଦୌ ।
ତଵ ଭ୍ରାତୁର୍ହି ଵିଖ୍ୟାତସ୍ସହାୟୋ ରଣକର୍କଶଃ ।
ରାମଃ ପରବଲାମର୍ଦୀ ୟୁଗାଂତାଗ୍ନିରିଵୋତ୍ଥିତଃ ॥ 18 ॥
ନିଵାସଵୃକ୍ଷଃ ସାଧୂନାମାପନ୍ନାନାଂ ପରା ଗତିଃ ।
ଆର୍ତାନାଂ ସଂଶ୍ରୟଶ୍ଚୈଵ ୟଶସଶ୍ଚୈକଭାଜନମ୍ ॥ 19 ॥
ଜ୍ଞାନଵିଜ୍ଞାନସଂପନ୍ନୋ ନିଦେଶେ ନିରତଃ ପିତୁଃ ।
ଧାତୂନାମିଵ ଶୈଲେଂଦ୍ରୋ ଗୁଣାନାମାକରୋ ମହାନ୍ ॥ 20 ॥
ତତ୍କ୍ଷମଂ ନ ଵିରୋଧସ୍ତେ ସହ ତେନ ମହାତ୍ମନା ।
ଦୁର୍ଜୟେନାପ୍ରମେୟେନ ରାମେଣ ରଣକର୍ମସୁ ॥ 21 ॥
ଶୂର ଵକ୍ଷ୍ୟାମି ତେ କିଂଚିନ୍ନ ଚେଚ୍ଛାମ୍ୟଭ୍ୟସୂୟିତୁମ୍ ।
ଶ୍ରୂୟତାଂ କ୍ରିୟତାଂ ଚୈଵ ତଵ ଵକ୍ଷ୍ୟାମି ୟଦ୍ଧିତମ୍ ॥ 22 ॥
ୟୌଵରାଜ୍ୟେନ ସୁଗ୍ରୀଵଂ ତୂର୍ଣଂ ସାଧ୍ଵଭିଷେଚୟ ।
ଵିଗ୍ରହଂ ମା କୃଥା ଵୀର ଭ୍ରାତ୍ରା ରାଜନ୍ବଲୀୟସା ॥ 23 ॥
ଅହଂ ହି ତେ କ୍ଷମଂ ମନ୍ୟେ ତେନ ରାମେଣ ସୌହୃଦମ୍ ।
ସୁଗ୍ରୀଵେଣ ଚ ସଂପ୍ରୀତିଂ ଵୈରମୁତ୍ସୃଜ୍ୟ ଦୂରତଃ ॥ 24 ॥
ଲାଲନୀୟୋ ହି ତେ ଭ୍ରାତା ୟଵୀୟାନେଷ ଵାନରଃ ।
ତତ୍ର ଵା ସନ୍ନିହସ୍ଥୋ ଵା ସର୍ଵଥା ବଂଧୁରେଵ ତେ ॥ 25 ॥
ନ ହି ତେନ ସମଂ ବଂଧୁଂ ଭୁଵି ପଶ୍ୟାମି କଂଚନ ॥ 26 ॥
ଦାନମାନାଦିସତ୍କାରୈଃ କୁରୁଷ୍ଵ ପ୍ରତ୍ୟନଂତରମ୍ ।
ଵୈରମେତତ୍ସମୁତ୍ସୃଜ୍ୟ ତଵ ପାର୍ଶ୍ଵେ ସ ତିଷ୍ଠତୁ ॥ 27 ॥
ସୁଗ୍ରୀଵୋ ଵିପୁଲଗ୍ରୀଵସ୍ତଵବଂଧୁସ୍ସଦା ମତଃ ।
ଭ୍ରାତୃସ୍ସୌହୃଦମାଲଂବ ନାନ୍ୟା ଗତିରିହାସ୍ତି ତେ ॥ 28 ॥
ୟଦି ତେ ମତ୍ପ୍ରିୟଂ କାର୍ୟଂ ୟଦି ଚାଵୈଷି ମାଂ ହିତାମ୍ ।
ୟାଚ୍ୟମାନଃ ପ୍ରୟତ୍ନେନ ସାଧୁ ଵାକ୍ୟଂ କୁରୁଷ୍ଵ ମେ ॥ 29 ॥
ପ୍ରସୀଦ ପଥ୍ୟଂ ଶୃଣୁ ଜଲ୍ପିତଂ ହି ମେ ନ ରୋଷ ମେଵାନୁଵିଧାତୁମର୍ହସି ।
କ୍ଷମୋ ହି ତେ କୋସଲରାଜସୂନୁନା ନ ଵିଗ୍ରହଶ୍ଶକ୍ରସମାନତେଜସା ॥ 30 ॥
ତଦା ହି ତାରା ହିତମେଵ ଵାକ୍ୟଂ ତଂ ଵାଲିନଂ ପଥ୍ୟମିଦଂ ବଭାଷେ ।
ନ ରୋଚତେ ତଦ୍ଵଚନଂ ହି ତସ୍ୟ କାଲାଭିପନ୍ନସ୍ୟ ଵିନାଶକାଲେ ॥ 31 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ପଂଚଦଶସ୍ସର୍ଗଃ ॥
