ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචදශස්සර්ගඃ ।
අථ තස්ය නිනාදං තං සුග්රීවස්ය මහාත්මනඃ ।
ශුශ්රාවාංතඃ පුර ගතෝ වාලී භ්රාතුරමර්ෂණඃ ॥ 1 ॥
ශ්රුත්වා තු තස්ය නිනදං සර්වභූතප්රකංපනම් ।
මදශ්චෛකපදේ නෂ්ටඃ ක්රෝධශ්චාපතිතෝ මහාන් ॥ 2 ॥
ස තු රෝෂපරීතාංගෝ වාලී සංධ්යාකනකප්රභඃ ।
උපරක්ත ඉවාදිත්යස්සද්යෝ නිෂ්ප්රභතාං ගතඃ ॥ 3 ॥
වාලී දංෂ්ට්රා කරාලඃ තු ක්රෝධාද් දීප්ත අග්නි ලෝචනඃ ।
භාති උත්පතිත පද්මාභඃ සමෘණාල ඉව හ්රදඃ ॥ 4 ॥
ශබ්දං දුර්මර්ෂණං ශ්රුත්වා නිෂ්පපාත තතෝ හරිඃ ।
වේගේන චරණන්යාසෛර්දාරයන්නිව මේදිනීම් ॥ 5 ॥
තං තු තාරා පරිෂ්වජ්ය ස්නේහාද්දර්ශිතසෞහෘදාඃ ।
උවාච ත්රස්තසංභ්රාංතා හිතෝදර්කමිදං වචඃ ॥ 6 ॥
සාධු ක්රෝධමිමං වීර නදීවේගමිවාගතම් ।
ශයනාදුත්ථිතඃ කාල්යං ත්යජ භුක්තාමිව ස්රජම් ॥ 7 ॥
කාල්යමේතේන සංග්රාමං කරිෂ්යසි ච වානර ।
වීර තේ ශත්රුබාහුල්යං ඵල්ගුතා වා න විද්යතේ ॥ 8 ॥
සහසා තව නිෂ්ක්රාමෝ මම තාවන්න රෝචතේ ।
ශ්රූයතාං චාභිධාස්යාමි යන්නිමිත්තං නිවාර්යසේ ॥ 9 ॥
පූර්වමාපතිතඃ ක්රෝධාත්ස ත්වාමාහ්වයතේ යුධි ।
නිෂ්පත්ය ච නිරස්තස්තේ හන්යමානෝ දිශෝ ගතඃ ॥ 10 ॥
ත්වයා තස්ය නිරස්තස්ය පීඩිතස්ය විශේෂතඃ ।
ඉහෛත්ය පුනරාහ්වානං ශංකාං ජනයතීව මේ ॥ 11 ॥
දර්පශ්ච ව්යවසායශ්ච යාදෘශස්තස්ය නර්දතඃ ।
නිනාදශ්චාපි සංරංභෝ නෛතදල්පං හි කාරණම් ॥ 12 ॥
නාසහායමහං මන්යේ සුග්රීවං තමිහාගතම් ।
අවෂ්ටබ්ධසහායශ්ච යමාශ්රිත්යෛෂ ගර්ජති ॥ 13 ॥
ප්රකෘත්යා නිපුණශ්චෛව බුද්ධිමාංශ්චෛව වානරඃ ।
අපරීක්ෂිතවීර්යේණ සුග්රීවස්සහනෛෂ්යති ॥ 14 ॥
පූර්වමේව මයා වීර ශ්රුතං කථයතෝ වචඃ ।
අංගදස්ය කුමාරස්ය වක්ෂ්යාමිත්වා හිතං වචඃ ॥ 15 ॥
අංගදස්තු කුමාරෝऽයං වනාංතමුපනිර්ගතඃ ।
ප්රවෘත්තිස්තේන කථිතා චාරෛ රාප්තෛර්නිවේදිතා ॥ 16 ॥
අයෝධ්යාධිපතේඃ පුත්රෞ ශූරෞ සමරදුර්ජයෞ ।
ඉක්ෂ්වාකූණාං කුලේ ජාතෞ ප්රථිතෞ රාමලක්ෂ්මණෞ ॥ 17 ॥
සුග්රීවප්රියකාමාර්ථං ප්රාප්තෞ තත්ර දුරාසදෞ ।
තව භ්රාතුර්හි විඛ්යාතස්සහායෝ රණකර්කශඃ ।
රාමඃ පරබලාමර්දී යුගාංතාග්නිරිවෝත්ථිතඃ ॥ 18 ॥
නිවාසවෘක්ෂඃ සාධූනාමාපන්නානාං පරා ගතිඃ ।
ආර්තානාං සංශ්රයශ්චෛව යශසශ්චෛකභාජනම් ॥ 19 ॥
ජ්ඤානවිජ්ඤානසංපන්නෝ නිදේශේ නිරතඃ පිතුඃ ।
ධාතූනාමිව ශෛලේංද්රෝ ගුණානාමාකරෝ මහාන් ॥ 20 ॥
තත්ක්ෂමං න විරෝධස්තේ සහ තේන මහාත්මනා ।
දුර්ජයේනාප්රමේයේන රාමේණ රණකර්මසු ॥ 21 ॥
ශූර වක්ෂ්යාමි තේ කිංචින්න චේච්ඡාම්යභ්යසූයිතුම් ।
ශ්රූයතාං ක්රියතාං චෛව තව වක්ෂ්යාමි යද්ධිතම් ॥ 22 ॥
යෞවරාජ්යේන සුග්රීවං තූර්ණං සාධ්වභිෂේචය ।
විග්රහං මා කෘථා වීර භ්රාත්රා රාජන්බලීයසා ॥ 23 ॥
අහං හි තේ ක්ෂමං මන්යේ තේන රාමේණ සෞහෘදම් ।
සුග්රීවේණ ච සංප්රීතිං වෛරමුත්සෘජ්ය දූරතඃ ॥ 24 ॥
ලාලනීයෝ හි තේ භ්රාතා යවීයානේෂ වානරඃ ।
තත්ර වා සන්නිහස්ථෝ වා සර්වථා බංධුරේව තේ ॥ 25 ॥
න හි තේන සමං බංධුං භුවි පශ්යාමි කංචන ॥ 26 ॥
දානමානාදිසත්කාරෛඃ කුරුෂ්ව ප්රත්යනංතරම් ।
වෛරමේතත්සමුත්සෘජ්ය තව පාර්ශ්වේ ස තිෂ්ඨතු ॥ 27 ॥
සුග්රීවෝ විපුලග්රීවස්තවබංධුස්සදා මතඃ ।
භ්රාතෘස්සෞහෘදමාලංබ නාන්යා ගතිරිහාස්ති තේ ॥ 28 ॥
යදි තේ මත්ප්රියං කාර්යං යදි චාවෛෂි මාං හිතාම් ।
යාච්යමානඃ ප්රයත්නේන සාධු වාක්යං කුරුෂ්ව මේ ॥ 29 ॥
ප්රසීද පථ්යං ශෘණු ජල්පිතං හි මේ න රෝෂ මේවානුවිධාතුමර්හසි ।
ක්ෂමෝ හි තේ කෝසලරාජසූනුනා න විග්රහශ්ශක්රසමානතේජසා ॥ 30 ॥
තදා හි තාරා හිතමේව වාක්යං තං වාලිනං පථ්යමිදං බභාෂේ ।
න රෝචතේ තද්වචනං හි තස්ය කාලාභිපන්නස්ය විනාශකාලේ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචදශස්සර්ගඃ ॥
