ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්වාවිංශස්සර්ගඃ ।
වීක්ෂමාණස්තු මංදාසුස්සර්වතෝ මංදමුච්ඡ්වසන් ।
ආදාවේව තු සුග්රීවං දදර්ශත්වාත්මජාග්රතඃ ॥ 1 ॥
තං ප්රාප්තවිජයං වාලී සුග්රීවං ප්ලවගේශ්වරඃ ।
ආභාෂ්ය ව්යක්තයා වාචා සස්නේහමිදමබ්රවීත් ॥ 2 ॥
සුග්රීව දෝෂේණ න මාං ගංතුමර්හසි කිල්බිෂාත් ।
කෘෂ්යමාණං භවිෂ්යේණ බුද්ධිමෝහේන මාං බලාත් ॥ 3 ॥
යුගපද්විහිතං තාත න මන්යේ සුඛමාවයෝඃ ।
සෞහාර්ද භ්රාතෘයුක්තං හි තදිදං තාත නාන්යථා ॥ 4 ॥
ප්රතිපද්ය ත්වමද්යෛව රාජ්යමේෂාං වනෞකසාම් ।
මාමප්යද්යෛව ගච්ඡංතං විද්ධි වෛවස්වතක්ෂයම් ॥ 5 ॥
ජීවිතං ච හි රාජ්යං ච ශ්රියං ච විපුලාමිමාම් ।
ප්රජහාම්යේෂ වෛ තූර්ණං මහච්චාගර්හිතං යශඃ ॥ 6 ॥
අස්යාං ත්වහමවස්ථායාං වීර වක්ෂ්යාමි යද්වචඃ ।
යද්යප්යසුකරං රාජන්කර්තුමේව තදර්හසි ॥ 7 ॥
සුඛාර්හං සුඛසංවෘද්ධං බාලමේනමබාලිශම් ।
බාෂ්පපූර්ණමුඛං පශ්ය භූමෞ පතිතමංගදම් ॥ 8 ॥
මම ප්රාණෛඃ ප්රියතරං පුත්රං පුත්රමිවෞරසම් ।
මයා හීනමහීනාර්ථං පර්වතඃ පරිපාලය ॥ 9 ॥
ත්වමේවාස්ය හි දාතා ච පරිත්රාතා ච සර්වශඃ ।
භයේෂ්වභයදශ්චෛව යථාऽහං ප්ලවගේශ්වර ॥ 10 ॥
ඒෂ තාරාත්මජ ශ්රීමාංස්ත්වයා තුල්යපරාක්රමඃ ।
රක්ෂසාං ච වධේ තේෂාමග්රතස්තේ භවිෂ්යති ॥ 11 ॥
අනුරූපාණි කර්මාණි වික්රම්ය බලවාන්රණේ ।
කරිෂ්යත්යේෂ තාරේයස්තරස්වී තරුණෝऽංගදඃ ॥ 12 ॥
සුෂේණදුහිතා චේයමර්ථසූක්ෂ්මවිමනිශ්චයේ ।
ඖත්පාතිකේ ච විවිධේ සර්වතඃ පරිනිෂ්ඨිතා ॥ 13 ॥
යදේෂා සාධ්විති බ්රූයාත්කාර්යං තන්මුක්තසංශයම් ।
න හි තාරාමතං කිංචිදන්යථා පරිවර්තතේ ॥ 14 ॥
රාඝවස්ය ච තේ කාර්යං කර්තව්යමවිශංකයා ।
ස්යාදධර්මෝ හ්යකරණේ ත්වාං ච හිංස්යාද්විමානිතඃ ॥ 15 ॥
ඉමාං ච මාලාමාධත්ස්ව දිව්යාං සුග්රීව කාංචනීම් ।
උදාරා ශ්රීස්ථිතා හ්යාස්යාං සංප්රජහ්යාන්මෘතේ මයි ॥ 16 ॥
ඉත්යේවමුක්තස්සුග්රීවෝ වාලිනා භ්රාතෘසෞහෘදාත් ।
හර්ෂං ත්යක්ත්වා පුනර්දීනෝ ග්රහග්රස්ත ඉවෝඩුරාට් ॥ 17 ॥
තද්වාලිවචනාච්ඡාංතඃ කුර්වන්යුක්තමතංද්රිතඃ ।
ජග්රාහ සෝऽභ්යනුජ්ඤාතෝ මාලාං තාං චෛව කාංචනීම් ॥ 18 ॥
තාං මාලාං කාංචනීං දත්ත්වා දෘෂ්ට්වාචෛවාත්මජං ස්ථිතම් ।
සංසිද්ධඃ ප්රේත්යභාවාය ස්නේහාදංගදමබ්රවීත් ॥ 19 ॥
දේශකාලෞ භජස්වාද්ය ක්ෂමමාණඃ ප්රියාප්රියේ ।
සුඛදුඃඛ සහඃ කාලේ සුග්රීවවශගෝ භව ॥ 20 ॥
යථා හි ත්වං මහාබාහෝ ලාලිතස්සතතං මයා ।
න තථා වර්තමානං ත්වාං සුග්රීවෝ බහුමංස්යතේ ॥ 21 ॥
මාऽස්යාමිත්රෛර්ගතං ගච්ඡේර්මා ශත්රුභිරරිංදම ।
භර්තුරර්ථපරෝ දාංතඃ සුග්රීවවශගෝ භව ॥ 22 ॥
න චාතිප්රණයඃ කාර්යඃ කර්තව්යෝऽප්රණයශ්ච තේ ।
උභයං හි මහාංදෝෂ ස්තස්මාදංතරදෘග්භව ॥ 23 ॥
ඉත්යුක්ත්වාऽථ විවෘත්තාක්ෂඃ ශරසංපීඩිතෝ භෘශම් ।
විවෘතෛර්දශනෛ ර්භීමෛර්බභූවෝත්ක්රාංතජීවිතඃ ॥ 24 ॥
තතෝ විචුක්රුශුස්තත්ර වානරා හරියූථපාඃ ।
පරිදේවයමානාස්තේ සර්වේ ප්ලවගපුංගවාඃ ॥ 25 ॥
කිෂ්කිංධා හ්යද්ය ශූන්යාऽසීත්ස්වර්ගතේ වානරාධිපේ ।
උද්යානානි ච ශූන්යානි පර්වතාඃ කානනානි ච ॥ 26 ॥
හතේ ප්ලවගශාර්දූලේ නිෂ්ප්රභා වානරාඃ කෘතාඃ ।
යස්ය වේගේන මහතා කානනානි වනානි ච ।
පුෂ්පෞඝේණානුබධ්යංතේ කරිෂ්යති තදද්ය කඃ ॥ 27 ॥
යේන දත්තං මහද්යුද්ධං ගංධර්වස්ය මහාත්මනඃ ॥ 28 ॥
ගෝලභස්ය මහාබාහෝර්දශවර්ෂාණි පංච ච ।
නෛව රාත්රෞ න දිවසේ තද්යුද්ධමුපශාම්යති ॥ 29 ॥
තතස්තු ෂෝඩශේ වර්ෂේ ගෝලභෝ විනිපාතිතඃ ।
හත්වා තං දුර්විනීතං තු වාලී දංෂ්ට්රාකරාලවාන් ॥ 30 ॥
සර්වාऽභයංකරෝऽස්මාකං කථමේෂ නිපාතිතඃ ।
හතේ තු වීරේ ප්ලවගාධිපේ තදා ප්ලවංගමාස්තත්ර න ශර්ම ලේභිරේ ।
වනේචරාඃ සිංහයුතේ මහාවනේ යථා හි ගාවෝ නිහතේ ගවාං පතෞ ॥ 31 ॥
තතස්තු තාරා ව්යසනාර්ණවාප්ලුතා මෘතස්ය භර්තුර්වදනං සමීක්ෂ්ය සා ।
ජගාම භූමිං පරිරභ්ය වාලිනං මහාද්රුමං ඡින්නමිවාශ්රිතා ලතා ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්වාවිංශස්සර්ගඃ ॥
