ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² த்ரயோவிம்ஶஸ்ஸர்க:³ ।
ததஸ்ஸமுபஜிக்⁴ரந்தீ கபிராஜஸ்ய தன்முக²ம் ।
பதிம் லோகாச்ச்யுதம் தாரா ம்ருதம் வசனமப்³ரவீத் ॥ 1 ॥
ஶேஷே த்வம் விஷமே து³:க²மக்ருத்வா வசனம் மம ।
உபலோபசிதே வீர ஸுது³:கே² வஸுதா⁴தலே ॥ 2 ॥
மத்த: ப்ரியதரா நூனம் வானரேந்த்³ர மஹீ தவ ।
ஶேஷே ஹி தாம் பரிஷ்வஜ்ய மாம் ச ந ப்ரதிபா⁴ஷஸே ॥ 3 ॥
ஸுக்³ரீவஸ்ய வஶம் ப்ராப்தோ விதி⁴ரேஷப⁴வத்யஹோ ।
ஸுக்³ரீவ ஏவ விக்ராந்தோ வீர ஸாஹஸிகப்ரிய ॥ 4 ॥
ருக்ஷவானரமுக்²யாஸ்த்வாம் ப³லின: பர்யுபாஸதே ।
ஏஷாம் விலபிதம் க்ருச்ச்²ரமங்க³த³ஸ்ய ச ஶோசத: ॥ 5 ॥
மம சேமா கி³ர: ஶ்ருத்வா கிம் த்வம் ந ப்ரதிபு³த்⁴யஸே ।
இத³ம் தச்சூ²ரஶயனம் யத்ர ஶேஷே ஹதோ யுதி⁴ ।
ஶாயிதா நிஹதா யத்ர த்வயைவ ரிபவ: புரா ॥ 6 ॥
விஶுத்³த⁴ஸத்த்வாபி⁴ஜன ப்ரியயுத்³த⁴ மம ப்ரிய ।
மாமனாதா²ம் விஹாயைகாம் க³தஸ்த்வமஸி மானத³ ॥ 7 ॥
ஶூராய ந ப்ரதா³தவ்யா கன்யா க²லு விபஶ்சிதா ।
ஶூரபா⁴ர்யாம் ஹதாம் பஶ்ய ஸத்³யோ மாம் வித⁴வாம் க்ருதாம் ॥ 8 ॥
அவப⁴க்³னஶ்ச மே மானோ ப⁴க்³னா மே ஶாஶ்வதீ க³தி: ॥ 9 ॥
அகா³தே⁴ ச நிமக்³னாஸ்மி விபுலே ஶோகஸாக³ரே ।
அஶ்மஸாரமயம் நூனமித³ம் மே ஹ்ருத³யம் த்³ருட⁴ம் ॥ 1௦ ॥
ப⁴ர்தாரம் நிஹதம் த்³ருஷ்ட்வா யன்னாத்³ய ஶததா⁴ க்ருதம் ।
ஸுஹ்ருச்சைவ ஹி ப⁴ர்தா ச ப்ரக்ருத்யா மம ச ப்ரிய: ।
ஆஹவே ச பராக்ராந்தஶ்ஶூர: பஞ்சத்வமாக³த: ॥ 11 ॥
பதிஹீனா து யா நாரீ காமம் ப⁴வது புத்ரிணீ ।
த⁴னதா⁴ன்யைஸ்ஸுபூர்ணாபி வித⁴வேத்யுச்யதே பு³தை⁴: ॥ 12 ॥
ஸ்வகா³த்ரப்ரப⁴வே வீர ஶேஷே ருதி⁴ரமண்ட³லே ।
க்ரிமிராக³பரிஸ்தோமே த்வமாத்மஶயனே யதா² ॥ 13 ॥
ரேணுஶோணிதஸம்வீதம் கா³த்ரம் தவ ஸமந்தத: ।
பரிரப்³து⁴ம் ந ஶக்னோமி பு⁴ஜாப்⁴யாம் ப்லவக³ர்ஷப⁴ ॥ 14 ॥
க்ருதக்ருத்யோத்³ய ஸுக்³ரீவோ வைரேஸ்மின்னதிதா³ருணே ।
யஸ்ய ராமவிமுக்தேன ஹ்ருதமேகேஷுணா ப⁴யம் ॥ 15 ॥
ஶரேண ஹ்ருதி³ லக்³னேன கா³த்ரஸம்ஸ்பர்ஶனே தவ ।
வார்யாமி த்வாம் நிரீக்ஷந்தீ த்வயி பஞ்சத்வமாக³தே ॥ 16 ॥
உத்³வவர்ஹ ஶரம் நீலஸ்தஸ்ய கா³த்ரக³தம் ததா³ ।
கி³ரிக³ஹ்வரஸம்லீனம் தீ³ப்தமாஶீவிஷம் யதா² ॥ 17 ॥
தஸ்ய நிஷ்க்ருஷ்யமாணஸ்ய பா³ணஸ்ய ச ப³பௌ⁴ த்³யுதி: ।
அஸ்தமஸ்தகஸம்ருத்³தோ⁴ ரஶ்மிர்தி³னகராதி³வ ॥ 18 ॥
பேது: க்ஷதஜதா⁴ராஸ்து வ்ரணேப்⁴யஸ்தஸ்ய ஸர்வஶ: ।
தாம்ரகை³ரிகஸம்ப்ருக்தா தா⁴ரா இவ த⁴ராத⁴ராத் ॥ 19 ॥
அவகீர்ணம் விமார்ஜந்தீ ப⁴ர்தாரம் ரணரேணுனா ।
அஸ்ரைர்னயனஜைஶ்ஶூரம் ஸிஷேசாஸ்த்ரஸமாஹதம் ॥ 2௦ ॥
ருதி⁴ரோக்ஷிதஸர்வாங்க³ம் த்³ருஷ்ட்வா வினிஹதம் பதிம் ।
உவாச தாரா பிங்கா³க்ஷம் புத்ரமங்க³த³மங்க³னா ॥ 21 ॥
அவஸ்தா²ம் பஶ்சிமாம் பஶ்ய பிது: புத்ர ஸுதா³ருணாம் ।
ஸம்ப்ரஸக்தஸ்ய வைரஸ்ய க³தோந்த: பாபகர்மணா ॥ 22 ॥
பா³லஸூர்யோத³யதனும் ப்ரயாந்தம் யமஸத³னம் ।
அபி⁴வாத³ய ராஜானம் பிதரம் புத்ர மானத³ம் ॥ 23 ॥
ஏவமுக்தஸ்ஸமுத்தா²ய ஜக்³ராஹ சரணௌ பிது: ।
பு⁴ஜாப்⁴யாம் பீனவ்ருத்தாப்⁴யாமங்க³தோ³ஹமிதி ப்³ருவன் ॥ 24 ॥
அபி⁴வாத³யமானம் த்வாமங்க³த³ம் த்வம் யதா² புரா ।
தீ³ர்கா⁴யுர்ப⁴வ புத்ரேதி கிமர்த²ம் நாபி⁴பா⁴ஷஸே ॥ 25 ॥
அஹம் புத்ரஸஹாயா த்வாமுபாஸே க³தசேதஸம் ।
ஸிம்ஹேன நிஹதம் ஸத்³யோ கௌ³ஸ்ஸவத்ஸேவ கோ³வ்ருஷம் ॥ 26 ॥
இஷ்ட்வா ஸங்க்³ராமயஜ்ஞேன ராமப்ரஹரணாம்ப⁴ஸி ।
அஸ்மின்னவப்⁴ருதே² ஸ்னாத: கத²ம் பத்ன்யா மயா வினா ॥ 27 ॥
யா த³த்தா தே³வராஜேன தவ துஷ்டேன ஸம்யுகே³ ।
ஶாதகும்ப⁴மயீம் மாலாம் தாம் தே பஶ்யாமி நேஹ கிம் ॥ 28 ॥
ராஜ்யஶ்ரீர்ன ஜஹாதி த்வாம் க³தாஸுமபி மானத³ ।
ஸூர்யஸ்யாவர்தமானஸ்ய ஶைலராஜமிவ ப்ரபா⁴ ॥ 29 ॥
ந மே வச: பத்²யமித³ம் த்வயா க்ருதம் ந சாஸ்மி ஶக்தா ஹி நிவாரணே தவ ।
ஹதா ஸபுத்ராஸ்மி ஹதேன ஸம்யுகே³ ஸஹ த்வயா ஶ்ரீர்விஜஹாதி மாமிஹ ॥ 3௦ ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ த்ரயோவிம்ஶஸ்ஸர்க:³ ॥
