ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ත්රයෝවිංශස්සර්ගඃ ।
තතස්සමුපජිඝ්රංතී කපිරාජස්ය තන්මුඛම් ।
පතිං ලෝකාච්ච්යුතං තාරා මෘතං වචනමබ්රවීත් ॥ 1 ॥
ශේෂේ ත්වං විෂමේ දුඃඛමකෘත්වා වචනං මම ।
උපලෝපචිතේ වීර සුදුඃඛේ වසුධාතලේ ॥ 2 ॥
මත්තඃ ප්රියතරා නූනං වානරේංද්ර මහී තව ।
ශේෂේ හි තාං පරිෂ්වජ්ය මාං ච න ප්රතිභාෂසේ ॥ 3 ॥
සුග්රීවස්ය වශං ප්රාප්තෝ විධිරේෂභවත්යහෝ ।
සුග්රීව ඒව වික්රාංතෝ වීර සාහසිකප්රිය ॥ 4 ॥
ඍක්ෂවානරමුඛ්යාස්ත්වාං බලිනඃ පර්යුපාසතේ ।
ඒෂාං විලපිතං කෘච්ඡ්රමංගදස්ය ච ශෝචතඃ ॥ 5 ॥
මම චේමා ගිරඃ ශ්රුත්වා කිං ත්වං න ප්රතිබුධ්යසේ ।
ඉදං තච්ඡූරශයනං යත්ර ශේෂේ හතෝ යුධි ।
ශායිතා නිහතා යත්ර ත්වයෛව රිපවඃ පුරා ॥ 6 ॥
විශුද්ධසත්ත්වාභිජන ප්රියයුද්ධ මම ප්රිය ।
මාමනාථාං විහායෛකාං ගතස්ත්වමසි මානද ॥ 7 ॥
ශූරාය න ප්රදාතව්යා කන්යා ඛලු විපශ්චිතා ।
ශූරභාර්යාං හතාං පශ්ය සද්යෝ මාං විධවාං කෘතාම් ॥ 8 ॥
අවභග්නශ්ච මේ මානෝ භග්නා මේ ශාශ්වතී ගතිඃ ॥ 9 ॥
අගාධේ ච නිමග්නාऽස්මි විපුලේ ශෝකසාගරේ ।
අශ්මසාරමයං නූනමිදං මේ හෘදයං දෘඪම් ॥ 10 ॥
භර්තාරං නිහතං දෘෂ්ට්වා යන්නාද්ය ශතධා කෘතම් ।
සුහෘච්චෛව හි භර්තා ච ප්රකෘත්යා මම ච ප්රියඃ ।
ආහවේ ච පරාක්රාංතශ්ශූරඃ පංචත්වමාගතඃ ॥ 11 ॥
පතිහීනා තු යා නාරී කාමං භවතු පුත්රිණී ।
ධනධාන්යෛස්සුපූර්ණාऽපි විධවේත්යුච්යතේ බුධෛඃ ॥ 12 ॥
ස්වගාත්රප්රභවේ වීර ශේෂේ රුධිරමංඩලේ ।
ක්රිමිරාගපරිස්තෝමේ ත්වමාත්මශයනේ යථා ॥ 13 ॥
රේණුශෝණිතසංවීතං ගාත්රං තව සමංතතඃ ।
පරිරබ්ධුං න ශක්නෝමි භුජාභ්යාං ප්ලවගර්ෂභ ॥ 14 ॥
කෘතකෘත්යෝऽද්ය සුග්රීවෝ වෛරේऽස්මින්නතිදාරුණේ ।
යස්ය රාමවිමුක්තේන හෘතමේකේෂුණා භයම් ॥ 15 ॥
ශරේණ හෘදි ලග්නේන ගාත්රසංස්පර්ශනේ තව ।
වාර්යාමි ත්වාං නිරීක්ෂංතී ත්වයි පංචත්වමාගතේ ॥ 16 ॥
උද්වවර්හ ශරං නීලස්තස්ය ගාත්රගතං තදා ।
ගිරිගහ්වරසංලීනං දීප්තමාශීවිෂං යථා ॥ 17 ॥
තස්ය නිෂ්කෘෂ්යමාණස්ය බාණස්ය ච බභෞ ද්යුතිඃ ।
අස්තමස්තකසංරුද්ධෝ රශ්මිර්දිනකරාදිව ॥ 18 ॥
පේතුඃ ක්ෂතජධාරාස්තු ව්රණේභ්යස්තස්ය සර්වශඃ ।
තාම්රගෛරිකසංපෘක්තා ධාරා ඉව ධරාධරාත් ॥ 19 ॥
අවකීර්ණං විමාර්ජංතී භර්තාරං රණරේණුනා ।
අස්රෛර්නයනජෛශ්ශූරං සිෂේචාස්ත්රසමාහතම් ॥ 20 ॥
රුධිරෝක්ෂිතසර්වාංගං දෘෂ්ට්වා විනිහතං පතිම් ।
උවාච තාරා පිංගාක්ෂං පුත්රමංගදමංගනා ॥ 21 ॥
අවස්ථාං පශ්චිමාං පශ්ය පිතුඃ පුත්ර සුදාරුණාම් ।
සංප්රසක්තස්ය වෛරස්ය ගතෝऽංතඃ පාපකර්මණා ॥ 22 ॥
බාලසූර්යෝදයතනුං ප්රයාංතං යමසදනම් ।
අභිවාදය රාජානං පිතරං පුත්ර මානදම් ॥ 23 ॥
ඒවමුක්තස්සමුත්ථාය ජග්රාහ චරණෞ පිතුඃ ।
භුජාභ්යාං පීනවෘත්තාභ්යාමංගදෝऽහමිති බ්රුවන් ॥ 24 ॥
අභිවාදයමානං ත්වාමංගදං ත්වං යථා පුරා ।
දීර්ඝායුර්භව පුත්රේති කිමර්ථං නාභිභාෂසේ ॥ 25 ॥
අහං පුත්රසහායා ත්වාමුපාසේ ගතචේතසම් ।
සිංහේන නිහතං සද්යෝ ගෞස්සවත්සේව ගෝවෘෂම් ॥ 26 ॥
ඉෂ්ට්වා සංග්රාමයජ්ඤේන රාමප්රහරණාංභසි ।
අස්මින්නවභෘථේ ස්නාතඃ කථං පත්න්යා මයා විනා ॥ 27 ॥
යා දත්තා දේවරාජේන තව තුෂ්ටේන සංයුගේ ।
ශාතකුංභමයීං මාලාං තාං තේ පශ්යාමි නේහ කිම් ॥ 28 ॥
රාජ්යශ්රීර්න ජහාති ත්වාං ගතාසුමපි මානද ।
සූර්යස්යාවර්තමානස්ය ශෛලරාජමිව ප්රභා ॥ 29 ॥
න මේ වචඃ පථ්යමිදං ත්වයා කෘතං න චාස්මි ශක්තා හි නිවාරණේ තව ।
හතා සපුත්රාऽස්මි හතේන සංයුගේ සහ ත්වයා ශ්රීර්විජහාති මාමිහ ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ත්රයෝවිංශස්සර්ගඃ ॥
