ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකෝනත්රිංශස්සර්ගඃ ।
සමීක්ෂ්ය විමලං ව්යෝම ගතවිද්යුද්වලාහකම් ।
සාරසාකුලසංඝුෂ්ටං රම්යජ්යෝත්ස්නානුලේපනම් ॥ 1 ॥
සමෘද්ධාර්ථං ච සුග්රීවං මංදධර්මාර්ථසංග්රහම් ।
අත්යර්ථමසතාං මාර්ගමේකාංතගතමානසම් ॥ 2 ॥
නිර්වෘත්තකාර්යං සිද්ධාර්ථං ප්රමදාභිරතං සදා ।
ප්රාප්තවංතමභිප්රේතාන්සර්වානේව මනෝරථාන් ॥ 3 ॥
ස්වාං ච පත්නීමභිප්රේතාං තාරාං චාපි සමීප්සිතාම් ।
විහරංතමහෝරාත්රං කෘතාර්ථං විගතජ්වරම් ॥ 4 ॥
ක්රීඩංතමිව දේවේශං නංදනේऽප්සරසාං ගණෛඃ ।
මංත්රිෂු න්යස්තකාර්යං ච මංත්රිණාමනවේක්ෂකම් ॥ 5 ॥
උත්සන්නරාජ්යසංදේශං කාමවෘත්තමවස්ථිතම් ।
නිශ්චිතාර්ථෝऽර්ථතත්ත්වජ්ඤඃ කාලධර්මවිශේෂවිත් ॥ 6 ॥
ප්රසාද්ය වාක්යෛර්මධුරෛර්හේතුමද්භිර්මනෝරමෛඃ ।
වාක්යවිද්වාක්ය තත්ත්වජ්ඤං හරීශං මාරුතාත්මජඃ ॥ 7 ॥
හිතං තත්ත්වං ච පථ්යං ච සාමධර්මාර්ථනීතිමත් ।
ප්රණයප්රීතිසංයුක්තං විශ්වාසකෘතනිශ්චයම් ।
හරීශ්වරමුපාගම්ය හනූමාන්වාක්යමබ්රවීත් ॥ 8 ॥
රාජ්යං ප්රාප්තං යශශ්චෛව කෞලී ශ්රීරභිවර්ධිතා ।
මිත්රාණාං සංග්රහශ්ශේෂස්තං භවාන්කර්තුමර්හති ॥ 9 ॥
යෝ හි මිත්රේෂු කාලජ්ඤස්සතතං සාධු වර්තතේ ॥ 10 ॥
තස්ය රාජ්යං ච කීර්තිශ්ච ප්රතාපශ්චාභි වර්ධතේ ।
යස්ය කෝශශ්ච දංඩශ්ච මිත්රාණ්යාත්මා ච භූමිප ॥ 11 ॥
සමවේතානි සර්වාණි ස රාජ්යං මහදශ්නුතේ ।
තද්භවාන්වෘත්තසංපන්නඃ ස්ථිතඃ පථි නිරත්යයේ ॥ 12 ॥
මිත්රාර්ථමභිනීතාර්ථං යථාවත්කර්තුමර්හති ।
සංත්යජ්ය සර්වකර්මාණි මිත්රාර්ථේ යෝऽනුවර්තතේ ॥ 13 ॥
සංභ්රමාද්ධි කෘතෝත්සාහස්සෝऽනර්ථෛර්නාවරුධ්යතේ ।
යස්තු කාලව්යතීතේෂු මිත්රකාර්යේෂු වර්තතේ ॥ 14 ॥
ස කෘත්වා මහතෝऽප්යර්ථාන්න මිත්රාර්ථේන යුජ්යතේ ।
යදිදං මිත්රකාර්යං වීර නෝමිත්රකාර්යමරිංදම ॥ 15 ॥
ක්රියතාං රාඝවස්යෛතද්වෛදේහ්යාඃ පරිමාර්ගණම් ।
තදිදං වීර කාර්යං තේ කාලාතීතමරිංදම ॥ 16 ॥
න ච කාලමතීතං තේ නිවේදයති කාලවිත් ।
ත්වරමාණෝऽපි සන්ප්රාජ්ඤස්තව රාජන්වශානුගඃ ॥ 17 ॥
කුලස්ය හේතුඃ ස්ඵීතස්ය දීර්ඝබංධුශ්ච රාඝවඃ ।
අප්රමේයප්රභාවශ්ච ස්වයං චාප්රතිමෝ ගුණෛඃ ॥ 18 ॥
තස්ය ත්වං කුරු වෛ කාර්යං පූර්වං තේන කෘතං තව ।
හරීශ්වර කපිශ්රේෂ්ඨානාජ්ඤාපයිතුමර්හසි ॥ 19 ॥
න හි තාවද්භවේත්කාලෝ ව්යතීතශ්චෝදනාදෘතේ ।
චෝදිතස්ය හි කාර්යස්ය භවේත්කාලව්යතික්රමඃ ॥ 20 ॥
අකර්තුරපි කාර්යස්ය භවාන්කර්තා හරීශ්වර කිං පුනඃ ප්රතිකර්තුස්තේ රාජ්යේන ච ධනේන ච ॥ 21 ॥
ශක්තිමානපිවික්රාංතෝ වානරර්ක්ෂගණේශ්වර ।
කර්තුං දාශරථේඃ ප්රීතිමාජ්ඤායාං කින්න සජ්ජසේ ॥ 22 ॥
කාමං ඛලු ශරෛශ්ශක්තස්සුරාසුරමහෝරගාන් ।
වශේ දාශරථිඃ කර්තුං ත්වත්ප්රතිජ්ඤාං හි කාංක්ෂතේ ॥ 23 ॥
ප්රාණත්යාගාවිශංකේන කෘතං තේන තවප්රියම් ।
තස්ය මාර්ගාම වෛදේහීං පෘථිව්යාමපි චාංබරේ ॥ 24 ॥
දේවදානව ගංධර්වා නසුරාස්සමරුද්ගණාඃ ।
න ච යක්ෂා භයං තස්ය කුර්යුඃ කිමුත රාක්ෂසාඃ ॥ 25 ॥
තදේවං ශක්තියුක්තස්ය පූර්වං ප්රියකෘතස්තව ।
රාමස්යාර්හසි පිංගේශ කර්තුං සර්වාත්මනා ප්රියම් ॥ 26 ॥
නාධස්තාදවනෞ නාප්සු ගතිර්නෝපරි චාංබරේ ।
කස්යචිත්සජ්ජතේऽස්මාකං කපීශ්වර තවාජ්ඤයා ॥ 27 ॥
තදාජ්ඤාපය කඃ කිං තේ කුතෝ වාපි ව්යවස්යතු ।
හරයෝऽහ්යප්රධෘෂ්යාස්තේ සංති කෝට්යග්රතෝऽනඝ ॥ 28 ॥
තස්ය තද්වචනං ශ්රුත්වා කාලේ සාධු නිවේදනම් ।
සුග්රීවස්සත්ත්වසංපන්නශ්චකාර මතිමුත්තමාම් ॥ 29 ॥
ස සංදිදේශාභිමතං නීලං නිත්යකෘතෝද්යමම් ।
දික්ෂු සර්වාසු සර්වේෂාං සෛන්යානාමුපසංග්රහේ ॥ 30 ॥
යථා සේනා සමග්රා මේ යූථපාලාශ්ච සර්වශඃ ।
සමාගච්ඡංත්යසංගේන සේනාග්රාණි තථා කුරු ॥ 31 ॥
යේ ත්වංතපාලාඃ ප්ලවගාශ්ශීඝ්රගා ව්යවසායිනඃ ।
සමානයංතු තේ සෛන්යං ත්වරිතාශ්ශාසනාන්මම ॥ 32 ॥
ස්වයං චානංතරං සෛන්යං භවානේවානුපශ්යතු ।
ත්රිපංචරාත්රාදූර්ධ්වං යඃ ප්රාප්නුයාන්නේහ වානරඃ ।
තස්ය ප්රාණාංතිකෝ දංඩෝ නාත්ර කාර්යා විචාරණා ॥ 33 ॥
හරීංශ්ච වෘද්ධානුපයාතු සාංගදෝ භවාන්මමාජ්ඤාමධිකෘත්ය නිශ්චිතාම් ।
ඉති ව්යවස්ථාං හරිපුංගවේශ්වරෝ විධාය වේශ්ම ප්රවිවේශ වීර්යවාන් ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකෝනත්රිංශස්සර්ගඃ ॥
