ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තත්රිංශස්සර්ගඃ ।
ඒවමුක්තස්තු සුග්රීවෝ ලක්ෂ්මණේන මහාත්මනා ।
හනූමංතං ස්ථිතං පාර්ශ්වේ සචිවංත්විදමබ්රවීත් ॥ 1 ॥
මහේංද්රහිමවද්විංධ්යකෛලාසශිඛරේෂු ච ।
මංදරේ පාංඩුශිඛරේ පංචශෛලේෂු යේ ස්ථිතාඃ ॥ 2 ॥
තරුණාදිත්යවර්ණේෂු භ්රාජමානේෂු සර්වතඃ ।
පර්වතේෂු සමුද්රාංතේ පශ්චිමායාං ච යේ දිශි ॥ 3 ॥
ආදිත්යභවනේ චෛව ගිරෞ සංධ්යාභ්රසන්නිභේ ।
පද්මාතාලවනං භීමං සංශ්රිතා හරිපුංගවාඃ ॥ 4 ॥
අංජනාංබුදසංකාශාඃ කුංජරප්රතිමෞජසඃ ।
අංජනේ පර්වතේ චෛව යේ වසංති ප්ලවංගමාඃ ॥ 5 ॥
මනශ්ශිලා ගුහාවාසා වානරාඃ කනකප්රභාඃ ।
මේරුපාර්ශ්වගතාශ්චෛව යේ ධූම්රගිරිං සංශ්රිතාඃ ॥ 6 ॥
තරුණාදිත්යවර්ණාශ්ච පර්වතේ යේ මහාරුණේ ।
පිබංතෝ මධුමෛරේයං භීමවේගාඃ ප්ලවංගමාඃ ॥ 7 ॥
වනේෂු ච සුරම්යේෂු සුගංධිෂු මහත්සු ච ।
තාපසානාං ච රම්යේෂු වනාංතේෂු සමංතතඃ ॥ 8 ॥
තාංස්තාං ස්ත්වමානය ක්ෂිප්රං පෘථිව්යාං සර්වවානරාන් ।
සාමදානාදිභිඃ ස්සර්වෛරාශු ප්රේෂය වානරාන් ॥ 9 ॥
ප්රේෂිතාඃ ප්රථමං යේ ච මයාදූතා මහාජවාඃ ।
ත්වරණාර්ථං තු භූයස්ත්වං හරීන් සංප්රේෂයාපරාන් ॥ 10 ॥
යේ ප්රසක්තාශ්ච කාමේෂු දීර්ඝසූත්රාශ්ච වානරාඃ ।
ඉහාऽනයස්ව තාන් සර්වාන් ශීඝ්රං තු මම ශාසනාත් ॥ 11 ॥
අහෝභිර්දශභිර්යේ ච නාගච්ඡංති මමාජ්ඤයා ।
හංතව්යාස්තේ දුරාත්මානෝ රාජශාසනදූෂකාඃ ॥ 12 ॥
ශතාන්යථ සහස්රාණාං කෝට්යශ්ච මම ශාසනාත් ।
ප්රයාංතු කපිසිංහානාං දිශෝ මම මතේ ස්ථිතාඃ ॥ 13 ॥
මේඝපර්වතසංකාශාශ්ඡාදයංත ඉවාංබරම් ।
ඝෝරරූපාඃ කපිශ්රේෂ්ඨා යාංතු මච්ඡාසනාදිතඃ ॥ 14 ॥
තේ ගතිජ්ඤා ගතිං ජ්ඤාත්වා පෘථිව්යාං සර්වවානරාඃ ।
ආනයංතු හරීන් සර්වාංස්ත්වරිතා ශසනාන්මම ॥ 15 ॥
තස්ය වානර රාජස්ය ශ්රුත්වා වායුසුතෝ වචඃ ।
දික්ෂු සර්වාසු වික්රාංතාන්ප්රේෂයාමාස වානරාන් ॥ 16 ॥
තේ පදං විෂ්ණුවික්රාංතං පතත්රිජ්යෝතිරධ්වගාඃ ।
ප්රයාතාඃ ප්රහිතා රාජ්ඤා හරයස්තත්ක්ෂණේන වෛ ॥ 17 ॥
තේ සමුද්රේෂු ගිරිෂු වනේෂු ච සරස්සු ච ।
වානරා වානරාන්සර්වාන්රාමහේතෝරචෝදයන් ॥ 18 ॥
මෘත්යුකාලෝපමස්යාऽජ්ඤාං රාජරාජස්ය වානරාඃ ।
සුග්රීවස්යායයු ශ්ශ්රුත්වා සුග්රීවභයදර්ශිනඃ ॥ 19 ॥
තතස්තේऽංජනසංකාශා ගිරේස්තස්මාන්මහාජවාඃ ।
තිස්රඃ කෝට්යඃ ප්ලවංගානාං නිර්යයුර්යත්ර රාඝවඃ ॥ 20 ॥
අස්තං ගච්ඡති යත්රාර්කස්තස්මින්ගිරිවරේ ස්ථිතාඃ ।
සංතප්ත හේමමහාභාසස්තස්මාත්කෝට්යෝ දශ ච්යුතාඃ ॥ 21 ॥
කෛලාසශිඛරේභ්යශ්ච සිංහකේසරවර්චසාම් ।
තතඃ කෝටිසහස්රාණි වානරාණාමුපාගමන් ॥ 22 ॥
ඵලමූලේන ජීවංතෝ හිමවංතමුපාශ්රිතාඃ ।
තේෂාං කෝටිසහස්රාණාං සහස්රං සමවර්තත ॥ 23 ॥
අංගාරකසමානානාං භීමානාං භීමකර්මණාම් ।
විංධ්යාද්වානරකෝටීනාං සහස්රාණ්යපතංද්රුතම් ॥ 24 ॥
ක්ෂීරෝදවේලානිලයාස්තමාලවනවාසිනඃ ।
නාරිකේලාශනාශ්චෛව තේෂාං සංඛ්යා න විද්යතේ ॥ 25 ॥
වනේභ්යෝ ගහ්වරේභ්යශ්ච සරිද්භ්යශ්ච මහාජවා ।
ආගච්ඡද්වානරී සේනා පිබංතීව දිවාකරම් ॥ 26 ॥
යේ තු ත්වරයිතුං යාතා වානරාස්සර්වවානරාන් ।
තේ වීරා හිමවච්ඡෛලං දදෘශුස්තං මහාද්රුමම් ॥ 27 ॥
තස්මින්ගිරිවරේ රම්යේ යජ්ඤෝ මාහේශ්වරඃ පුරා ।
සර්වදේවමනස්තෝෂෝ බභෞ දිව්යෝ මනෝහරඃ ॥ 28 ॥
අන්නනිෂ්යංදජාතානි මූලානි ච ඵලානි ච ।
අමෘතාස්වාදකල්පානි දදෘශුස්තත්ර වානරාඃ ॥ 29 ॥
තදන්නසංභවං දිව්යං ඵලමූලං මනෝහරම් ।
යඃ කශ්චිත්සකෘදශ්නාති මාසං භවති තර්පිතඃ ॥ 30 ॥
තානි මූලානි දිව්යානි ඵලානි ච ඵලාශනාඃ ।
ඖෂධානි ච දිව්යානි ජගෘහුර්හරියූථපාඃ ॥ 31 ॥
තස්මාච්ච යජ්ඤායතනාත්පුෂ්පාණි සුරභීණි ච ।
ආනින්යුර්වානරා ගත්වා සුග්රීවප්රියකාරණාත් ॥ 32 ॥
තේ තු සර්වේ හරිවරාඃ පෘථිව්යාං සර්වවානරාන් ।
සංචෝදයිත්වා ත්වරිතා යූථානාං ජග්මුරග්රතඃ ॥ 33 ॥
තේ තු තේන මුහූර්තේන යූථපාශ්ශීඝ්රගාමිනඃ ।
කිෂ්කිංධාං ත්වරයා ප්රාප්තා ස්සුග්රීවෝ යත්ර වානරඃ ॥ 34 ॥
තේ ගෘහීත්වෞෂධීස්සර්වාඃ ඵලමූලං ච වානරාඃ ।
තං ප්රතිග්රාහයාමාසුර්වචනං චේදමබ්රුවන් ॥ 35 ॥
සර්වේ පරිගතාශ්ශෛලාස්සමුද්රාශ්ච වනානි ච ।
පෘථිව්යාං වානරාස්සර්වේ ශාසනාදුපයාංති තේ ॥ 36 ॥
ඒවං ශ්රුත්වා තතෝ හෘෂ්ට ස්සුග්රීවඃ ප්ලවගාධිපඃ ।
ප්රතිජග්රාහ තත්ප්රතීතස්තේෂාං සර්වමුපායනම් ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තත්රිංශස්සර්ගඃ ॥
