ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ସପ୍ତତ୍ରିଂଶସ୍ସର୍ଗଃ ।
ଏଵମୁକ୍ତସ୍ତୁ ସୁଗ୍ରୀଵୋ ଲକ୍ଷ୍ମଣେନ ମହାତ୍ମନା ।
ହନୂମଂତଂ ସ୍ଥିତଂ ପାର୍ଶ୍ଵେ ସଚିଵଂତ୍ଵିଦମବ୍ରଵୀତ୍ ॥ 1 ॥
ମହେଂଦ୍ରହିମଵଦ୍ଵିଂଧ୍ୟକୈଲାସଶିଖରେଷୁ ଚ ।
ମଂଦରେ ପାଂଡୁଶିଖରେ ପଂଚଶୈଲେଷୁ ୟେ ସ୍ଥିତାଃ ॥ 2 ॥
ତରୁଣାଦିତ୍ୟଵର୍ଣେଷୁ ଭ୍ରାଜମାନେଷୁ ସର୍ଵତଃ ।
ପର୍ଵତେଷୁ ସମୁଦ୍ରାଂତେ ପଶ୍ଚିମାୟାଂ ଚ ୟେ ଦିଶି ॥ 3 ॥
ଆଦିତ୍ୟଭଵନେ ଚୈଵ ଗିରୌ ସଂଧ୍ୟାଭ୍ରସନ୍ନିଭେ ।
ପଦ୍ମାତାଲଵନଂ ଭୀମଂ ସଂଶ୍ରିତା ହରିପୁଂଗଵାଃ ॥ 4 ॥
ଅଂଜନାଂବୁଦସଂକାଶାଃ କୁଂଜରପ୍ରତିମୌଜସଃ ।
ଅଂଜନେ ପର୍ଵତେ ଚୈଵ ୟେ ଵସଂତି ପ୍ଲଵଂଗମାଃ ॥ 5 ॥
ମନଶ୍ଶିଲା ଗୁହାଵାସା ଵାନରାଃ କନକପ୍ରଭାଃ ।
ମେରୁପାର୍ଶ୍ଵଗତାଶ୍ଚୈଵ ୟେ ଧୂମ୍ରଗିରିଂ ସଂଶ୍ରିତାଃ ॥ 6 ॥
ତରୁଣାଦିତ୍ୟଵର୍ଣାଶ୍ଚ ପର୍ଵତେ ୟେ ମହାରୁଣେ ।
ପିବଂତୋ ମଧୁମୈରେୟଂ ଭୀମଵେଗାଃ ପ୍ଲଵଂଗମାଃ ॥ 7 ॥
ଵନେଷୁ ଚ ସୁରମ୍ୟେଷୁ ସୁଗଂଧିଷୁ ମହତ୍ସୁ ଚ ।
ତାପସାନାଂ ଚ ରମ୍ୟେଷୁ ଵନାଂତେଷୁ ସମଂତତଃ ॥ 8 ॥
ତାଂସ୍ତାଂ ସ୍ତ୍ଵମାନୟ କ୍ଷିପ୍ରଂ ପୃଥିଵ୍ୟାଂ ସର୍ଵଵାନରାନ୍ ।
ସାମଦାନାଦିଭିଃ ସ୍ସର୍ଵୈରାଶୁ ପ୍ରେଷୟ ଵାନରାନ୍ ॥ 9 ॥
ପ୍ରେଷିତାଃ ପ୍ରଥମଂ ୟେ ଚ ମୟାଦୂତା ମହାଜଵାଃ ।
ତ୍ଵରଣାର୍ଥଂ ତୁ ଭୂୟସ୍ତ୍ଵଂ ହରୀନ୍ ସଂପ୍ରେଷୟାପରାନ୍ ॥ 10 ॥
ୟେ ପ୍ରସକ୍ତାଶ୍ଚ କାମେଷୁ ଦୀର୍ଘସୂତ୍ରାଶ୍ଚ ଵାନରାଃ ।
ଇହାଽନୟସ୍ଵ ତାନ୍ ସର୍ଵାନ୍ ଶୀଘ୍ରଂ ତୁ ମମ ଶାସନାତ୍ ॥ 11 ॥
ଅହୋଭିର୍ଦଶଭିର୍ୟେ ଚ ନାଗଚ୍ଛଂତି ମମାଜ୍ଞୟା ।
ହଂତଵ୍ୟାସ୍ତେ ଦୁରାତ୍ମାନୋ ରାଜଶାସନଦୂଷକାଃ ॥ 12 ॥
ଶତାନ୍ୟଥ ସହସ୍ରାଣାଂ କୋଟ୍ୟଶ୍ଚ ମମ ଶାସନାତ୍ ।
ପ୍ରୟାଂତୁ କପିସିଂହାନାଂ ଦିଶୋ ମମ ମତେ ସ୍ଥିତାଃ ॥ 13 ॥
ମେଘପର୍ଵତସଂକାଶାଶ୍ଛାଦୟଂତ ଇଵାଂବରମ୍ ।
ଘୋରରୂପାଃ କପିଶ୍ରେଷ୍ଠା ୟାଂତୁ ମଚ୍ଛାସନାଦିତଃ ॥ 14 ॥
ତେ ଗତିଜ୍ଞା ଗତିଂ ଜ୍ଞାତ୍ଵା ପୃଥିଵ୍ୟାଂ ସର୍ଵଵାନରାଃ ।
ଆନୟଂତୁ ହରୀନ୍ ସର୍ଵାଂସ୍ତ୍ଵରିତା ଶସନାନ୍ମମ ॥ 15 ॥
ତସ୍ୟ ଵାନର ରାଜସ୍ୟ ଶ୍ରୁତ୍ଵା ଵାୟୁସୁତୋ ଵଚଃ ।
ଦିକ୍ଷୁ ସର୍ଵାସୁ ଵିକ୍ରାଂତାନ୍ପ୍ରେଷୟାମାସ ଵାନରାନ୍ ॥ 16 ॥
ତେ ପଦଂ ଵିଷ୍ଣୁଵିକ୍ରାଂତଂ ପତତ୍ରିଜ୍ୟୋତିରଧ୍ଵଗାଃ ।
ପ୍ରୟାତାଃ ପ୍ରହିତା ରାଜ୍ଞା ହରୟସ୍ତତ୍କ୍ଷଣେନ ଵୈ ॥ 17 ॥
ତେ ସମୁଦ୍ରେଷୁ ଗିରିଷୁ ଵନେଷୁ ଚ ସରସ୍ସୁ ଚ ।
ଵାନରା ଵାନରାନ୍ସର୍ଵାନ୍ରାମହେତୋରଚୋଦୟନ୍ ॥ 18 ॥
ମୃତ୍ୟୁକାଲୋପମସ୍ୟାଽଜ୍ଞାଂ ରାଜରାଜସ୍ୟ ଵାନରାଃ ।
ସୁଗ୍ରୀଵସ୍ୟାୟୟୁ ଶ୍ଶ୍ରୁତ୍ଵା ସୁଗ୍ରୀଵଭୟଦର୍ଶିନଃ ॥ 19 ॥
ତତସ୍ତେଽଂଜନସଂକାଶା ଗିରେସ୍ତସ୍ମାନ୍ମହାଜଵାଃ ।
ତିସ୍ରଃ କୋଟ୍ୟଃ ପ୍ଲଵଂଗାନାଂ ନିର୍ୟୟୁର୍ୟତ୍ର ରାଘଵଃ ॥ 20 ॥
ଅସ୍ତଂ ଗଚ୍ଛତି ୟତ୍ରାର୍କସ୍ତସ୍ମିନ୍ଗିରିଵରେ ସ୍ଥିତାଃ ।
ସଂତପ୍ତ ହେମମହାଭାସସ୍ତସ୍ମାତ୍କୋଟ୍ୟୋ ଦଶ ଚ୍ୟୁତାଃ ॥ 21 ॥
କୈଲାସଶିଖରେଭ୍ୟଶ୍ଚ ସିଂହକେସରଵର୍ଚସାମ୍ ।
ତତଃ କୋଟିସହସ୍ରାଣି ଵାନରାଣାମୁପାଗମନ୍ ॥ 22 ॥
ଫଲମୂଲେନ ଜୀଵଂତୋ ହିମଵଂତମୁପାଶ୍ରିତାଃ ।
ତେଷାଂ କୋଟିସହସ୍ରାଣାଂ ସହସ୍ରଂ ସମଵର୍ତତ ॥ 23 ॥
ଅଂଗାରକସମାନାନାଂ ଭୀମାନାଂ ଭୀମକର୍ମଣାମ୍ ।
ଵିଂଧ୍ୟାଦ୍ଵାନରକୋଟୀନାଂ ସହସ୍ରାଣ୍ୟପତଂଦ୍ରୁତମ୍ ॥ 24 ॥
କ୍ଷୀରୋଦଵେଲାନିଲୟାସ୍ତମାଲଵନଵାସିନଃ ।
ନାରିକେଲାଶନାଶ୍ଚୈଵ ତେଷାଂ ସଂଖ୍ୟା ନ ଵିଦ୍ୟତେ ॥ 25 ॥
ଵନେଭ୍ୟୋ ଗହ୍ଵରେଭ୍ୟଶ୍ଚ ସରିଦ୍ଭ୍ୟଶ୍ଚ ମହାଜଵା ।
ଆଗଚ୍ଛଦ୍ଵାନରୀ ସେନା ପିବଂତୀଵ ଦିଵାକରମ୍ ॥ 26 ॥
ୟେ ତୁ ତ୍ଵରୟିତୁଂ ୟାତା ଵାନରାସ୍ସର୍ଵଵାନରାନ୍ ।
ତେ ଵୀରା ହିମଵଚ୍ଛୈଲଂ ଦଦୃଶୁସ୍ତଂ ମହାଦ୍ରୁମମ୍ ॥ 27 ॥
ତସ୍ମିନ୍ଗିରିଵରେ ରମ୍ୟେ ୟଜ୍ଞୋ ମାହେଶ୍ଵରଃ ପୁରା ।
ସର୍ଵଦେଵମନସ୍ତୋଷୋ ବଭୌ ଦିଵ୍ୟୋ ମନୋହରଃ ॥ 28 ॥
ଅନ୍ନନିଷ୍ୟଂଦଜାତାନି ମୂଲାନି ଚ ଫଲାନି ଚ ।
ଅମୃତାସ୍ଵାଦକଲ୍ପାନି ଦଦୃଶୁସ୍ତତ୍ର ଵାନରାଃ ॥ 29 ॥
ତଦନ୍ନସଂଭଵଂ ଦିଵ୍ୟଂ ଫଲମୂଲଂ ମନୋହରମ୍ ।
ୟଃ କଶ୍ଚିତ୍ସକୃଦଶ୍ନାତି ମାସଂ ଭଵତି ତର୍ପିତଃ ॥ 30 ॥
ତାନି ମୂଲାନି ଦିଵ୍ୟାନି ଫଲାନି ଚ ଫଲାଶନାଃ ।
ଔଷଧାନି ଚ ଦିଵ୍ୟାନି ଜଗୃହୁର୍ହରିୟୂଥପାଃ ॥ 31 ॥
ତସ୍ମାଚ୍ଚ ୟଜ୍ଞାୟତନାତ୍ପୁଷ୍ପାଣି ସୁରଭୀଣି ଚ ।
ଆନିନ୍ୟୁର୍ଵାନରା ଗତ୍ଵା ସୁଗ୍ରୀଵପ୍ରିୟକାରଣାତ୍ ॥ 32 ॥
ତେ ତୁ ସର୍ଵେ ହରିଵରାଃ ପୃଥିଵ୍ୟାଂ ସର୍ଵଵାନରାନ୍ ।
ସଂଚୋଦୟିତ୍ଵା ତ୍ଵରିତା ୟୂଥାନାଂ ଜଗ୍ମୁରଗ୍ରତଃ ॥ 33 ॥
ତେ ତୁ ତେନ ମୁହୂର୍ତେନ ୟୂଥପାଶ୍ଶୀଘ୍ରଗାମିନଃ ।
କିଷ୍କିଂଧାଂ ତ୍ଵରୟା ପ୍ରାପ୍ତା ସ୍ସୁଗ୍ରୀଵୋ ୟତ୍ର ଵାନରଃ ॥ 34 ॥
ତେ ଗୃହୀତ୍ଵୌଷଧୀସ୍ସର୍ଵାଃ ଫଲମୂଲଂ ଚ ଵାନରାଃ ।
ତଂ ପ୍ରତିଗ୍ରାହୟାମାସୁର୍ଵଚନଂ ଚେଦମବ୍ରୁଵନ୍ ॥ 35 ॥
ସର୍ଵେ ପରିଗତାଶ୍ଶୈଲାସ୍ସମୁଦ୍ରାଶ୍ଚ ଵନାନି ଚ ।
ପୃଥିଵ୍ୟାଂ ଵାନରାସ୍ସର୍ଵେ ଶାସନାଦୁପୟାଂତି ତେ ॥ 36 ॥
ଏଵଂ ଶ୍ରୁତ୍ଵା ତତୋ ହୃଷ୍ଟ ସ୍ସୁଗ୍ରୀଵଃ ପ୍ଲଵଗାଧିପଃ ।
ପ୍ରତିଜଗ୍ରାହ ତତ୍ପ୍ରତୀତସ୍ତେଷାଂ ସର୍ଵମୁପାୟନମ୍ ॥ 37 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ସପ୍ତତ୍ରିଂଶସ୍ସର୍ଗଃ ॥
