శ్రీమద్వాల్మీకీయ రామాయణే కిష్కింధాకాండమ్ ।
అథ సప్తత్రింశస్సర్గః ।
ఏవముక్తస్తు సుగ్రీవో లక్ష్మణేన మహాత్మనా ।
హనూమంతం స్థితం పార్శ్వే సచివంత్విదమబ్రవీత్ ॥ 1 ॥
మహేంద్రహిమవద్వింధ్యకైలాసశిఖరేషు చ ।
మందరే పాండుశిఖరే పంచశైలేషు యే స్థితాః ॥ 2 ॥
తరుణాదిత్యవర్ణేషు భ్రాజమానేషు సర్వతః ।
పర్వతేషు సముద్రాంతే పశ్చిమాయాం చ యే దిశి ॥ 3 ॥
ఆదిత్యభవనే చైవ గిరౌ సంధ్యాభ్రసన్నిభే ।
పద్మాతాలవనం భీమం సంశ్రితా హరిపుంగవాః ॥ 4 ॥
అంజనాంబుదసంకాశాః కుంజరప్రతిమౌజసః ।
అంజనే పర్వతే చైవ యే వసంతి ప్లవంగమాః ॥ 5 ॥
మనశ్శిలా గుహావాసా వానరాః కనకప్రభాః ।
మేరుపార్శ్వగతాశ్చైవ యే ధూమ్రగిరిం సంశ్రితాః ॥ 6 ॥
తరుణాదిత్యవర్ణాశ్చ పర్వతే యే మహారుణే ।
పిబంతో మధుమైరేయం భీమవేగాః ప్లవంగమాః ॥ 7 ॥
వనేషు చ సురమ్యేషు సుగంధిషు మహత్సు చ ।
తాపసానాం చ రమ్యేషు వనాంతేషు సమంతతః ॥ 8 ॥
తాంస్తాం స్త్వమానయ క్షిప్రం పృథివ్యాం సర్వవానరాన్ ।
సామదానాదిభిః స్సర్వైరాశు ప్రేషయ వానరాన్ ॥ 9 ॥
ప్రేషితాః ప్రథమం యే చ మయాదూతా మహాజవాః ।
త్వరణార్థం తు భూయస్త్వం హరీన్ సంప్రేషయాపరాన్ ॥ 10 ॥
యే ప్రసక్తాశ్చ కామేషు దీర్ఘసూత్రాశ్చ వానరాః ।
ఇహాఽనయస్వ తాన్ సర్వాన్ శీఘ్రం తు మమ శాసనాత్ ॥ 11 ॥
అహోభిర్దశభిర్యే చ నాగచ్ఛంతి మమాజ్ఞయా ।
హంతవ్యాస్తే దురాత్మానో రాజశాసనదూషకాః ॥ 12 ॥
శతాన్యథ సహస్రాణాం కోట్యశ్చ మమ శాసనాత్ ।
ప్రయాంతు కపిసింహానాం దిశో మమ మతే స్థితాః ॥ 13 ॥
మేఘపర్వతసంకాశాశ్ఛాదయంత ఇవాంబరమ్ ।
ఘోరరూపాః కపిశ్రేష్ఠా యాంతు మచ్ఛాసనాదితః ॥ 14 ॥
తే గతిజ్ఞా గతిం జ్ఞాత్వా పృథివ్యాం సర్వవానరాః ।
ఆనయంతు హరీన్ సర్వాంస్త్వరితా శసనాన్మమ ॥ 15 ॥
తస్య వానర రాజస్య శ్రుత్వా వాయుసుతో వచః ।
దిక్షు సర్వాసు విక్రాంతాన్ప్రేషయామాస వానరాన్ ॥ 16 ॥
తే పదం విష్ణువిక్రాంతం పతత్రిజ్యోతిరధ్వగాః ।
ప్రయాతాః ప్రహితా రాజ్ఞా హరయస్తత్క్షణేన వై ॥ 17 ॥
తే సముద్రేషు గిరిషు వనేషు చ సరస్సు చ ।
వానరా వానరాన్సర్వాన్రామహేతోరచోదయన్ ॥ 18 ॥
మృత్యుకాలోపమస్యాఽజ్ఞాం రాజరాజస్య వానరాః ।
సుగ్రీవస్యాయయు శ్శ్రుత్వా సుగ్రీవభయదర్శినః ॥ 19 ॥
తతస్తేఽంజనసంకాశా గిరేస్తస్మాన్మహాజవాః ।
తిస్రః కోట్యః ప్లవంగానాం నిర్యయుర్యత్ర రాఘవః ॥ 20 ॥
అస్తం గచ్ఛతి యత్రార్కస్తస్మిన్గిరివరే స్థితాః ।
సంతప్త హేమమహాభాసస్తస్మాత్కోట్యో దశ చ్యుతాః ॥ 21 ॥
కైలాసశిఖరేభ్యశ్చ సింహకేసరవర్చసామ్ ।
తతః కోటిసహస్రాణి వానరాణాముపాగమన్ ॥ 22 ॥
ఫలమూలేన జీవంతో హిమవంతముపాశ్రితాః ।
తేషాం కోటిసహస్రాణాం సహస్రం సమవర్తత ॥ 23 ॥
అంగారకసమానానాం భీమానాం భీమకర్మణామ్ ।
వింధ్యాద్వానరకోటీనాం సహస్రాణ్యపతంద్రుతమ్ ॥ 24 ॥
క్షీరోదవేలానిలయాస్తమాలవనవాసినః ।
నారికేలాశనాశ్చైవ తేషాం సంఖ్యా న విద్యతే ॥ 25 ॥
వనేభ్యో గహ్వరేభ్యశ్చ సరిద్భ్యశ్చ మహాజవా ।
ఆగచ్ఛద్వానరీ సేనా పిబంతీవ దివాకరమ్ ॥ 26 ॥
యే తు త్వరయితుం యాతా వానరాస్సర్వవానరాన్ ।
తే వీరా హిమవచ్ఛైలం దదృశుస్తం మహాద్రుమమ్ ॥ 27 ॥
తస్మిన్గిరివరే రమ్యే యజ్ఞో మాహేశ్వరః పురా ।
సర్వదేవమనస్తోషో బభౌ దివ్యో మనోహరః ॥ 28 ॥
అన్ననిష్యందజాతాని మూలాని చ ఫలాని చ ।
అమృతాస్వాదకల్పాని దదృశుస్తత్ర వానరాః ॥ 29 ॥
తదన్నసంభవం దివ్యం ఫలమూలం మనోహరమ్ ।
యః కశ్చిత్సకృదశ్నాతి మాసం భవతి తర్పితః ॥ 30 ॥
తాని మూలాని దివ్యాని ఫలాని చ ఫలాశనాః ।
ఔషధాని చ దివ్యాని జగృహుర్హరియూథపాః ॥ 31 ॥
తస్మాచ్చ యజ్ఞాయతనాత్పుష్పాణి సురభీణి చ ।
ఆనిన్యుర్వానరా గత్వా సుగ్రీవప్రియకారణాత్ ॥ 32 ॥
తే తు సర్వే హరివరాః పృథివ్యాం సర్వవానరాన్ ।
సంచోదయిత్వా త్వరితా యూథానాం జగ్మురగ్రతః ॥ 33 ॥
తే తు తేన ముహూర్తేన యూథపాశ్శీఘ్రగామినః ।
కిష్కింధాం త్వరయా ప్రాప్తా స్సుగ్రీవో యత్ర వానరః ॥ 34 ॥
తే గృహీత్వౌషధీస్సర్వాః ఫలమూలం చ వానరాః ।
తం ప్రతిగ్రాహయామాసుర్వచనం చేదమబ్రువన్ ॥ 35 ॥
సర్వే పరిగతాశ్శైలాస్సముద్రాశ్చ వనాని చ ।
పృథివ్యాం వానరాస్సర్వే శాసనాదుపయాంతి తే ॥ 36 ॥
ఏవం శ్రుత్వా తతో హృష్ట స్సుగ్రీవః ప్లవగాధిపః ।
ప్రతిజగ్రాహ తత్ప్రతీతస్తేషాం సర్వముపాయనమ్ ॥ 37 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే సప్తత్రింశస్సర్గః ॥
