śrīmadvālmīkīya rāmāyaṇē kiṣkindhākāṇḍam ।
atha saptatriṃśassargaḥ ।
ēvamuktastu sugrīvō lakṣmaṇēna mahātmanā ।
hanūmantaṃ sthitaṃ pārśvē sachivantvidamabravīt ॥ 1 ॥
mahēndrahimavadvindhyakailāsaśikharēṣu cha ।
mandarē pāṇḍuśikharē pañchaśailēṣu yē sthitāḥ ॥ 2 ॥
taruṇādityavarṇēṣu bhrājamānēṣu sarvataḥ ।
parvatēṣu samudrāntē paśchimāyāṃ cha yē diśi ॥ 3 ॥
ādityabhavanē chaiva girau sandhyābhrasannibhē ।
padmātālavanaṃ bhīmaṃ saṃśritā haripuṅgavāḥ ॥ 4 ॥
añjanāmbudasaṅkāśāḥ kuñjarapratimaujasaḥ ।
añjanē parvatē chaiva yē vasanti plavaṅgamāḥ ॥ 5 ॥
manaśśilā guhāvāsā vānarāḥ kanakaprabhāḥ ।
mērupārśvagatāśchaiva yē dhūmragiriṃ saṃśritāḥ ॥ 6 ॥
taruṇādityavarṇāścha parvatē yē mahāruṇē ।
pibantō madhumairēyaṃ bhīmavēgāḥ plavaṅgamāḥ ॥ 7 ॥
vanēṣu cha suramyēṣu sugandhiṣu mahatsu cha ।
tāpasānāṃ cha ramyēṣu vanāntēṣu samantataḥ ॥ 8 ॥
tāṃstāṃ stvamānaya kṣipraṃ pṛthivyāṃ sarvavānarān ।
sāmadānādibhiḥ ssarvairāśu prēṣaya vānarān ॥ 9 ॥
prēṣitāḥ prathamaṃ yē cha mayādūtā mahājavāḥ ।
tvaraṇārthaṃ tu bhūyastvaṃ harīn samprēṣayāparān ॥ 10 ॥
yē prasaktāścha kāmēṣu dīrghasūtrāścha vānarāḥ ।
ihā'nayasva tān sarvān śīghraṃ tu mama śāsanāt ॥ 11 ॥
ahōbhirdaśabhiryē cha nāgachChanti mamājñayā ।
hantavyāstē durātmānō rājaśāsanadūṣakāḥ ॥ 12 ॥
śatānyatha sahasrāṇāṃ kōṭyaścha mama śāsanāt ।
prayāntu kapisiṃhānāṃ diśō mama matē sthitāḥ ॥ 13 ॥
mēghaparvatasaṅkāśāśChādayanta ivāmbaram ।
ghōrarūpāḥ kapiśrēṣṭhā yāntu machChāsanāditaḥ ॥ 14 ॥
tē gatijñā gatiṃ jñātvā pṛthivyāṃ sarvavānarāḥ ।
ānayantu harīn sarvāṃstvaritā śasanānmama ॥ 15 ॥
tasya vānara rājasya śrutvā vāyusutō vachaḥ ।
dikṣu sarvāsu vikrāntānprēṣayāmāsa vānarān ॥ 16 ॥
tē padaṃ viṣṇuvikrāntaṃ patatrijyōtiradhvagāḥ ।
prayātāḥ prahitā rājñā harayastatkṣaṇēna vai ॥ 17 ॥
tē samudrēṣu giriṣu vanēṣu cha sarassu cha ।
vānarā vānarānsarvānrāmahētōrachōdayan ॥ 18 ॥
mṛtyukālōpamasyā'jñāṃ rājarājasya vānarāḥ ।
sugrīvasyāyayu śśrutvā sugrīvabhayadarśinaḥ ॥ 19 ॥
tatastē'ñjanasaṅkāśā girēstasmānmahājavāḥ ।
tisraḥ kōṭyaḥ plavaṅgānāṃ niryayuryatra rāghavaḥ ॥ 20 ॥
astaṃ gachChati yatrārkastasmingirivarē sthitāḥ ।
santapta hēmamahābhāsastasmātkōṭyō daśa chyutāḥ ॥ 21 ॥
kailāsaśikharēbhyaścha siṃhakēsaravarchasām ।
tataḥ kōṭisahasrāṇi vānarāṇāmupāgaman ॥ 22 ॥
phalamūlēna jīvantō himavantamupāśritāḥ ।
tēṣāṃ kōṭisahasrāṇāṃ sahasraṃ samavartata ॥ 23 ॥
aṅgārakasamānānāṃ bhīmānāṃ bhīmakarmaṇām ।
vindhyādvānarakōṭīnāṃ sahasrāṇyapatandrutam ॥ 24 ॥
kṣīrōdavēlānilayāstamālavanavāsinaḥ ।
nārikēlāśanāśchaiva tēṣāṃ saṅkhyā na vidyatē ॥ 25 ॥
vanēbhyō gahvarēbhyaścha saridbhyaścha mahājavā ।
āgachChadvānarī sēnā pibantīva divākaram ॥ 26 ॥
yē tu tvarayituṃ yātā vānarāssarvavānarān ।
tē vīrā himavachChailaṃ dadṛśustaṃ mahādrumam ॥ 27 ॥
tasmingirivarē ramyē yajñō māhēśvaraḥ purā ।
sarvadēvamanastōṣō babhau divyō manōharaḥ ॥ 28 ॥
annaniṣyandajātāni mūlāni cha phalāni cha ।
amṛtāsvādakalpāni dadṛśustatra vānarāḥ ॥ 29 ॥
tadannasambhavaṃ divyaṃ phalamūlaṃ manōharam ।
yaḥ kaśchitsakṛdaśnāti māsaṃ bhavati tarpitaḥ ॥ 30 ॥
tāni mūlāni divyāni phalāni cha phalāśanāḥ ।
auṣadhāni cha divyāni jagṛhurhariyūthapāḥ ॥ 31 ॥
tasmāchcha yajñāyatanātpuṣpāṇi surabhīṇi cha ।
āninyurvānarā gatvā sugrīvapriyakāraṇāt ॥ 32 ॥
tē tu sarvē harivarāḥ pṛthivyāṃ sarvavānarān ।
sañchōdayitvā tvaritā yūthānāṃ jagmuragrataḥ ॥ 33 ॥
tē tu tēna muhūrtēna yūthapāśśīghragāminaḥ ।
kiṣkindhāṃ tvarayā prāptā ssugrīvō yatra vānaraḥ ॥ 34 ॥
tē gṛhītvauṣadhīssarvāḥ phalamūlaṃ cha vānarāḥ ।
taṃ pratigrāhayāmāsurvachanaṃ chēdamabruvan ॥ 35 ॥
sarvē parigatāśśailāssamudrāścha vanāni cha ।
pṛthivyāṃ vānarāssarvē śāsanādupayānti tē ॥ 36 ॥
ēvaṃ śrutvā tatō hṛṣṭa ssugrīvaḥ plavagādhipaḥ ।
pratijagrāha tatpratītastēṣāṃ sarvamupāyanam ॥ 37 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē saptatriṃśassargaḥ ॥
