શ્રીમદ્વાલ્મીકીય રામાયણે કિષ્કિંધાકાંડમ્ ।
અથ સપ્તત્રિંશસ્સર્ગઃ ।
એવમુક્તસ્તુ સુગ્રીવો લક્ષ્મણેન મહાત્મના ।
હનૂમંતં સ્થિતં પાર્શ્વે સચિવંત્વિદમબ્રવીત્ ॥ 1 ॥
મહેંદ્રહિમવદ્વિંધ્યકૈલાસશિખરેષુ ચ ।
મંદરે પાંડુશિખરે પંચશૈલેષુ યે સ્થિતાઃ ॥ 2 ॥
તરુણાદિત્યવર્ણેષુ ભ્રાજમાનેષુ સર્વતઃ ।
પર્વતેષુ સમુદ્રાંતે પશ્ચિમાયાં ચ યે દિશિ ॥ 3 ॥
આદિત્યભવને ચૈવ ગિરૌ સંધ્યાભ્રસન્નિભે ।
પદ્માતાલવનં ભીમં સંશ્રિતા હરિપુંગવાઃ ॥ 4 ॥
અંજનાંબુદસંકાશાઃ કુંજરપ્રતિમૌજસઃ ।
અંજને પર્વતે ચૈવ યે વસંતિ પ્લવંગમાઃ ॥ 5 ॥
મનશ્શિલા ગુહાવાસા વાનરાઃ કનકપ્રભાઃ ।
મેરુપાર્શ્વગતાશ્ચૈવ યે ધૂમ્રગિરિં સંશ્રિતાઃ ॥ 6 ॥
તરુણાદિત્યવર્ણાશ્ચ પર્વતે યે મહારુણે ।
પિબંતો મધુમૈરેયં ભીમવેગાઃ પ્લવંગમાઃ ॥ 7 ॥
વનેષુ ચ સુરમ્યેષુ સુગંધિષુ મહત્સુ ચ ।
તાપસાનાં ચ રમ્યેષુ વનાંતેષુ સમંતતઃ ॥ 8 ॥
તાંસ્તાં સ્ત્વમાનય ક્ષિપ્રં પૃથિવ્યાં સર્વવાનરાન્ ।
સામદાનાદિભિઃ સ્સર્વૈરાશુ પ્રેષય વાનરાન્ ॥ 9 ॥
પ્રેષિતાઃ પ્રથમં યે ચ મયાદૂતા મહાજવાઃ ।
ત્વરણાર્થં તુ ભૂયસ્ત્વં હરીન્ સંપ્રેષયાપરાન્ ॥ 10 ॥
યે પ્રસક્તાશ્ચ કામેષુ દીર્ઘસૂત્રાશ્ચ વાનરાઃ ।
ઇહાઽનયસ્વ તાન્ સર્વાન્ શીઘ્રં તુ મમ શાસનાત્ ॥ 11 ॥
અહોભિર્દશભિર્યે ચ નાગચ્છંતિ મમાજ્ઞયા ।
હંતવ્યાસ્તે દુરાત્માનો રાજશાસનદૂષકાઃ ॥ 12 ॥
શતાન્યથ સહસ્રાણાં કોટ્યશ્ચ મમ શાસનાત્ ।
પ્રયાંતુ કપિસિંહાનાં દિશો મમ મતે સ્થિતાઃ ॥ 13 ॥
મેઘપર્વતસંકાશાશ્છાદયંત ઇવાંબરમ્ ।
ઘોરરૂપાઃ કપિશ્રેષ્ઠા યાંતુ મચ્છાસનાદિતઃ ॥ 14 ॥
તે ગતિજ્ઞા ગતિં જ્ઞાત્વા પૃથિવ્યાં સર્વવાનરાઃ ।
આનયંતુ હરીન્ સર્વાંસ્ત્વરિતા શસનાન્મમ ॥ 15 ॥
તસ્ય વાનર રાજસ્ય શ્રુત્વા વાયુસુતો વચઃ ।
દિક્ષુ સર્વાસુ વિક્રાંતાન્પ્રેષયામાસ વાનરાન્ ॥ 16 ॥
તે પદં વિષ્ણુવિક્રાંતં પતત્રિજ્યોતિરધ્વગાઃ ।
પ્રયાતાઃ પ્રહિતા રાજ્ઞા હરયસ્તત્ક્ષણેન વૈ ॥ 17 ॥
તે સમુદ્રેષુ ગિરિષુ વનેષુ ચ સરસ્સુ ચ ।
વાનરા વાનરાન્સર્વાન્રામહેતોરચોદયન્ ॥ 18 ॥
મૃત્યુકાલોપમસ્યાઽજ્ઞાં રાજરાજસ્ય વાનરાઃ ।
સુગ્રીવસ્યાયયુ શ્શ્રુત્વા સુગ્રીવભયદર્શિનઃ ॥ 19 ॥
તતસ્તેઽંજનસંકાશા ગિરેસ્તસ્માન્મહાજવાઃ ।
તિસ્રઃ કોટ્યઃ પ્લવંગાનાં નિર્યયુર્યત્ર રાઘવઃ ॥ 20 ॥
અસ્તં ગચ્છતિ યત્રાર્કસ્તસ્મિન્ગિરિવરે સ્થિતાઃ ।
સંતપ્ત હેમમહાભાસસ્તસ્માત્કોટ્યો દશ ચ્યુતાઃ ॥ 21 ॥
કૈલાસશિખરેભ્યશ્ચ સિંહકેસરવર્ચસામ્ ।
તતઃ કોટિસહસ્રાણિ વાનરાણામુપાગમન્ ॥ 22 ॥
ફલમૂલેન જીવંતો હિમવંતમુપાશ્રિતાઃ ।
તેષાં કોટિસહસ્રાણાં સહસ્રં સમવર્તત ॥ 23 ॥
અંગારકસમાનાનાં ભીમાનાં ભીમકર્મણામ્ ।
વિંધ્યાદ્વાનરકોટીનાં સહસ્રાણ્યપતંદ્રુતમ્ ॥ 24 ॥
ક્ષીરોદવેલાનિલયાસ્તમાલવનવાસિનઃ ।
નારિકેલાશનાશ્ચૈવ તેષાં સંખ્યા ન વિદ્યતે ॥ 25 ॥
વનેભ્યો ગહ્વરેભ્યશ્ચ સરિદ્ભ્યશ્ચ મહાજવા ।
આગચ્છદ્વાનરી સેના પિબંતીવ દિવાકરમ્ ॥ 26 ॥
યે તુ ત્વરયિતું યાતા વાનરાસ્સર્વવાનરાન્ ।
તે વીરા હિમવચ્છૈલં દદૃશુસ્તં મહાદ્રુમમ્ ॥ 27 ॥
તસ્મિન્ગિરિવરે રમ્યે યજ્ઞો માહેશ્વરઃ પુરા ।
સર્વદેવમનસ્તોષો બભૌ દિવ્યો મનોહરઃ ॥ 28 ॥
અન્નનિષ્યંદજાતાનિ મૂલાનિ ચ ફલાનિ ચ ।
અમૃતાસ્વાદકલ્પાનિ દદૃશુસ્તત્ર વાનરાઃ ॥ 29 ॥
તદન્નસંભવં દિવ્યં ફલમૂલં મનોહરમ્ ।
યઃ કશ્ચિત્સકૃદશ્નાતિ માસં ભવતિ તર્પિતઃ ॥ 30 ॥
તાનિ મૂલાનિ દિવ્યાનિ ફલાનિ ચ ફલાશનાઃ ।
ઔષધાનિ ચ દિવ્યાનિ જગૃહુર્હરિયૂથપાઃ ॥ 31 ॥
તસ્માચ્ચ યજ્ઞાયતનાત્પુષ્પાણિ સુરભીણિ ચ ।
આનિન્યુર્વાનરા ગત્વા સુગ્રીવપ્રિયકારણાત્ ॥ 32 ॥
તે તુ સર્વે હરિવરાઃ પૃથિવ્યાં સર્વવાનરાન્ ।
સંચોદયિત્વા ત્વરિતા યૂથાનાં જગ્મુરગ્રતઃ ॥ 33 ॥
તે તુ તેન મુહૂર્તેન યૂથપાશ્શીઘ્રગામિનઃ ।
કિષ્કિંધાં ત્વરયા પ્રાપ્તા સ્સુગ્રીવો યત્ર વાનરઃ ॥ 34 ॥
તે ગૃહીત્વૌષધીસ્સર્વાઃ ફલમૂલં ચ વાનરાઃ ।
તં પ્રતિગ્રાહયામાસુર્વચનં ચેદમબ્રુવન્ ॥ 35 ॥
સર્વે પરિગતાશ્શૈલાસ્સમુદ્રાશ્ચ વનાનિ ચ ।
પૃથિવ્યાં વાનરાસ્સર્વે શાસનાદુપયાંતિ તે ॥ 36 ॥
એવં શ્રુત્વા તતો હૃષ્ટ સ્સુગ્રીવઃ પ્લવગાધિપઃ ।
પ્રતિજગ્રાહ તત્પ્રતીતસ્તેષાં સર્વમુપાયનમ્ ॥ 37 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે સપ્તત્રિંશસ્સર્ગઃ ॥
