śrīmadvālmīkīya rāmāyaṇē kiṣkindhākāṇḍam ।
atha pañchachatvāriṃśassargaḥ ।
sarvāṃśchāhūya sugrīvaḥ plavagān plavagarṣabhaḥ ।
samastānabravīdbhūyō rāmakāryarthasiddhayē ॥ 1 ॥
ēvamētadvichētavyaṃ yanmayā parikīrtitam ।
tadugraśāsanaṃ bharturvijñāya haripuṅgavāḥ ॥ 2 ॥
śalabhā iva sañChādya mēdinīṃ sampratasthirē ।
rāmaḥ prasravaṇē tasminyavasatsahalakṣmaṇaḥ ॥ 3 ॥
pratīkṣamāṇastaṃ māsaṃ yassītādhigamē kṛtaḥ ।
uttarāṃ tu diśaṃ ramyāṃ girirājasamāvṛtām ॥ 4 ॥
pratasthē sahasā vīrō hariśśatavalistadā ।
pūrvāṃ diśaṃ pratiyayau vinatō hariyūthapaḥ ॥ 5 ॥
tārāṅgadādisahitaḥ plavaṅgō mārutātmajaḥ ।
agatyācharitāmāśāṃ dakṣiṇāṃ hariyūthapaḥ ॥ 6 ॥
paśchimāṃ tu bhṛśaṃ ghōrāṃ suṣēṇaḥ plavagēśvaraḥ ।
pratasthē hariśārdūlō diśaṃ varuṇapālitām ॥ 7 ॥
tatassarvā diśō rājā chōdayitvā yathātatham ।
kapisēnāpatīnmukhyānmumōda sukhitassukham ॥ 8 ॥
ēvaṃ sambōdhitāssarvē rājñā vānarayūthapāḥ ।
svāṃ svāṃ diśamabhiprattya tvaritā sampratasthirē ॥ 9 ॥
nadantaśchōnnadantaścha garjantaścha plavaṅgamāḥ ।
kṣvēlantō dhāvamānāścha vinadantō mahābalāḥ ॥ 10 ॥
ēvaṃ sambōditāssarvē rājñā vānarayūthapāḥ ।
ānayiṣyāmahē sītāṃ haniṣyāmaścha rāvaṇam ॥ 11 ॥
ahamēkō haniṣyāmi rāvaṇaṃ prāptamāhavē ।
tataśchōnmathya sahasā hariṣyē janakātmajām ॥ 12 ॥
vēpamānāṃ śramēṇādya bhavadbhiḥ sthīyatāmiti ।
ēka ēvāhariṣyāmi pātālādapi jānakīm ॥ 13 ॥
vadhiṣyāmyahaṃ vṛkṣān dārayiṣyāmyahaṃ girīn ।
dharaṇīṃ dārayiṣyāmi kṣōbhayiṣyāmi sāgarān ॥ 14 ॥
ahaṃ yōjanasaṅkhyāyāḥ plavitā nātra saṃśayaḥ ।
śataṃ yōjanasaṅkhyāyāśśataṃ samadhikaṃ hyaham ॥ 15 ॥
bhūtalē sāgarē vā'pi śailēṣu cha vanēṣu cha ।
pātālasyāpi vā madhyē na mamāchChidyatē gatiḥ ॥ 16 ॥
ityēkaikaṃ tadā tatra vānarā baladarpitāḥ ।
ūchuścha vachanaṃ tatra harirājasya sannidhau ॥ 17 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē pañchachatvāriṃśassargaḥ ॥
