ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ପଂଚଚତ୍ଵାରିଂଶସ୍ସର୍ଗଃ ।
ସର୍ଵାଂଶ୍ଚାହୂୟ ସୁଗ୍ରୀଵଃ ପ୍ଲଵଗାନ୍ ପ୍ଲଵଗର୍ଷଭଃ ।
ସମସ୍ତାନବ୍ରଵୀଦ୍ଭୂୟୋ ରାମକାର୍ୟର୍ଥସିଦ୍ଧୟେ ॥ 1 ॥
ଏଵମେତଦ୍ଵିଚେତଵ୍ୟଂ ୟନ୍ମୟା ପରିକୀର୍ତିତମ୍ ।
ତଦୁଗ୍ରଶାସନଂ ଭର୍ତୁର୍ଵିଜ୍ଞାୟ ହରିପୁଂଗଵାଃ ॥ 2 ॥
ଶଲଭା ଇଵ ସଂଛାଦ୍ୟ ମେଦିନୀଂ ସଂପ୍ରତସ୍ଥିରେ ।
ରାମଃ ପ୍ରସ୍ରଵଣେ ତସ୍ମିନ୍ୟଵସତ୍ସହଲକ୍ଷ୍ମଣଃ ॥ 3 ॥
ପ୍ରତୀକ୍ଷମାଣସ୍ତଂ ମାସଂ ୟସ୍ସୀତାଧିଗମେ କୃତଃ ।
ଉତ୍ତରାଂ ତୁ ଦିଶଂ ରମ୍ୟାଂ ଗିରିରାଜସମାଵୃତାମ୍ ॥ 4 ॥
ପ୍ରତସ୍ଥେ ସହସା ଵୀରୋ ହରିଶ୍ଶତଵଲିସ୍ତଦା ।
ପୂର୍ଵାଂ ଦିଶଂ ପ୍ରତିୟୟୌ ଵିନତୋ ହରିୟୂଥପଃ ॥ 5 ॥
ତାରାଂଗଦାଦିସହିତଃ ପ୍ଲଵଂଗୋ ମାରୁତାତ୍ମଜଃ ।
ଅଗତ୍ୟାଚରିତାମାଶାଂ ଦକ୍ଷିଣାଂ ହରିୟୂଥପଃ ॥ 6 ॥
ପଶ୍ଚିମାଂ ତୁ ଭୃଶଂ ଘୋରାଂ ସୁଷେଣଃ ପ୍ଲଵଗେଶ୍ଵରଃ ।
ପ୍ରତସ୍ଥେ ହରିଶାର୍ଦୂଲୋ ଦିଶଂ ଵରୁଣପାଲିତାମ୍ ॥ 7 ॥
ତତସ୍ସର୍ଵା ଦିଶୋ ରାଜା ଚୋଦୟିତ୍ଵା ୟଥାତଥମ୍ ।
କପିସେନାପତୀନ୍ମୁଖ୍ୟାନ୍ମୁମୋଦ ସୁଖିତସ୍ସୁଖମ୍ ॥ 8 ॥
ଏଵଂ ସଂବୋଧିତାସ୍ସର୍ଵେ ରାଜ୍ଞା ଵାନରୟୂଥପାଃ ।
ସ୍ଵାଂ ସ୍ଵାଂ ଦିଶମଭିପ୍ରତ୍ତ୍ୟ ତ୍ଵରିତା ସଂପ୍ରତସ୍ଥିରେ ॥ 9 ॥
ନଦଂତଶ୍ଚୋନ୍ନଦଂତଶ୍ଚ ଗର୍ଜଂତଶ୍ଚ ପ୍ଲଵଂଗମାଃ ।
କ୍ଷ୍ଵେଲଂତୋ ଧାଵମାନାଶ୍ଚ ଵିନଦଂତୋ ମହାବଲାଃ ॥ 10 ॥
ଏଵଂ ସଂବୋଦିତାସ୍ସର୍ଵେ ରାଜ୍ଞା ଵାନରୟୂଥପାଃ ।
ଆନୟିଷ୍ୟାମହେ ସୀତାଂ ହନିଷ୍ୟାମଶ୍ଚ ରାଵଣମ୍ ॥ 11 ॥
ଅହମେକୋ ହନିଷ୍ୟାମି ରାଵଣଂ ପ୍ରାପ୍ତମାହଵେ ।
ତତଶ୍ଚୋନ୍ମଥ୍ୟ ସହସା ହରିଷ୍ୟେ ଜନକାତ୍ମଜାମ୍ ॥ 12 ॥
ଵେପମାନାଂ ଶ୍ରମେଣାଦ୍ୟ ଭଵଦ୍ଭିଃ ସ୍ଥୀୟତାମିତି ।
ଏକ ଏଵାହରିଷ୍ୟାମି ପାତାଲାଦପି ଜାନକୀମ୍ ॥ 13 ॥
ଵଧିଷ୍ୟାମ୍ୟହଂ ଵୃକ୍ଷାନ୍ ଦାରୟିଷ୍ୟାମ୍ୟହଂ ଗିରୀନ୍ ।
ଧରଣୀଂ ଦାରୟିଷ୍ୟାମି କ୍ଷୋଭୟିଷ୍ୟାମି ସାଗରାନ୍ ॥ 14 ॥
ଅହଂ ୟୋଜନସଂଖ୍ୟାୟାଃ ପ୍ଲଵିତା ନାତ୍ର ସଂଶୟଃ ।
ଶତଂ ୟୋଜନସଂଖ୍ୟାୟାଶ୍ଶତଂ ସମଧିକଂ ହ୍ୟହମ୍ ॥ 15 ॥
ଭୂତଲେ ସାଗରେ ଵାଽପି ଶୈଲେଷୁ ଚ ଵନେଷୁ ଚ ।
ପାତାଲସ୍ୟାପି ଵା ମଧ୍ୟେ ନ ମମାଚ୍ଛିଦ୍ୟତେ ଗତିଃ ॥ 16 ॥
ଇତ୍ୟେକୈକଂ ତଦା ତତ୍ର ଵାନରା ବଲଦର୍ପିତାଃ ।
ଊଚୁଶ୍ଚ ଵଚନଂ ତତ୍ର ହରିରାଜସ୍ୟ ସନ୍ନିଧୌ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ପଂଚଚତ୍ଵାରିଂଶସ୍ସର୍ଗଃ ॥
