ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචචත්වාරිංශස්සර්ගඃ ।
සර්වාංශ්චාහූය සුග්රීවඃ ප්ලවගාන් ප්ලවගර්ෂභඃ ।
සමස්තානබ්රවීද්භූයෝ රාමකාර්යර්ථසිද්ධයේ ॥ 1 ॥
ඒවමේතද්විචේතව්යං යන්මයා පරිකීර්තිතම් ।
තදුග්රශාසනං භර්තුර්විජ්ඤාය හරිපුංගවාඃ ॥ 2 ॥
ශලභා ඉව සංඡාද්ය මේදිනීං සංප්රතස්ථිරේ ।
රාමඃ ප්රස්රවණේ තස්මින්යවසත්සහලක්ෂ්මණඃ ॥ 3 ॥
ප්රතීක්ෂමාණස්තං මාසං යස්සීතාධිගමේ කෘතඃ ।
උත්තරාං තු දිශං රම්යාං ගිරිරාජසමාවෘතාම් ॥ 4 ॥
ප්රතස්ථේ සහසා වීරෝ හරිශ්ශතවලිස්තදා ।
පූර්වාං දිශං ප්රතියයෞ විනතෝ හරියූථපඃ ॥ 5 ॥
තාරාංගදාදිසහිතඃ ප්ලවංගෝ මාරුතාත්මජඃ ।
අගත්යාචරිතාමාශාං දක්ෂිණාං හරියූථපඃ ॥ 6 ॥
පශ්චිමාං තු භෘශං ඝෝරාං සුෂේණඃ ප්ලවගේශ්වරඃ ।
ප්රතස්ථේ හරිශාර්දූලෝ දිශං වරුණපාලිතාම් ॥ 7 ॥
තතස්සර්වා දිශෝ රාජා චෝදයිත්වා යථාතථම් ।
කපිසේනාපතීන්මුඛ්යාන්මුමෝද සුඛිතස්සුඛම් ॥ 8 ॥
ඒවං සංබෝධිතාස්සර්වේ රාජ්ඤා වානරයූථපාඃ ।
ස්වාං ස්වාං දිශමභිප්රත්ත්ය ත්වරිතා සංප්රතස්ථිරේ ॥ 9 ॥
නදංතශ්චෝන්නදංතශ්ච ගර්ජංතශ්ච ප්ලවංගමාඃ ।
ක්ෂ්වේලංතෝ ධාවමානාශ්ච විනදංතෝ මහාබලාඃ ॥ 10 ॥
ඒවං සංබෝදිතාස්සර්වේ රාජ්ඤා වානරයූථපාඃ ।
ආනයිෂ්යාමහේ සීතාං හනිෂ්යාමශ්ච රාවණම් ॥ 11 ॥
අහමේකෝ හනිෂ්යාමි රාවණං ප්රාප්තමාහවේ ।
තතශ්චෝන්මථ්ය සහසා හරිෂ්යේ ජනකාත්මජාම් ॥ 12 ॥
වේපමානාං ශ්රමේණාද්ය භවද්භිඃ ස්ථීයතාමිති ।
ඒක ඒවාහරිෂ්යාමි පාතාලාදපි ජානකීම් ॥ 13 ॥
වධිෂ්යාම්යහං වෘක්ෂාන් දාරයිෂ්යාම්යහං ගිරීන් ।
ධරණීං දාරයිෂ්යාමි ක්ෂෝභයිෂ්යාමි සාගරාන් ॥ 14 ॥
අහං යෝජනසංඛ්යායාඃ ප්ලවිතා නාත්ර සංශයඃ ।
ශතං යෝජනසංඛ්යායාශ්ශතං සමධිකං හ්යහම් ॥ 15 ॥
භූතලේ සාගරේ වාऽපි ශෛලේෂු ච වනේෂු ච ।
පාතාලස්යාපි වා මධ්යේ න මමාච්ඡිද්යතේ ගතිඃ ॥ 16 ॥
ඉත්යේකෛකං තදා තත්ර වානරා බලදර්පිතාඃ ।
ඌචුශ්ච වචනං තත්ර හරිරාජස්ය සන්නිධෞ ॥ 17 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචචත්වාරිංශස්සර්ගඃ ॥
