ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ പംചചത്വാരിംശസ്സര്ഗഃ ।
സർവാംശ്ചാഹൂയ സുഗ്രീവഃ പ്ലവഗാന് പ്ലവഗര്ഷഭഃ ।
സമസ്താനബ്രവീദ്ഭൂയോ രാമകാര്യര്ഥസിദ്ധയേ ॥ 1 ॥
ഏവമേതദ്വിചേതവ്യം യന്മയാ പരികീര്തിതമ് ।
തദുഗ്രശാസനം ഭര്തുർവിജ്ഞായ ഹരിപുംഗവാഃ ॥ 2 ॥
ശലഭാ ഇവ സംഛാദ്യ മേദിനീം സംപ്രതസ്ഥിരേ ।
രാമഃ പ്രസ്രവണേ തസ്മിന്യവസത്സഹലക്ഷ്മണഃ ॥ 3 ॥
പ്രതീക്ഷമാണസ്തം മാസം യസ്സീതാധിഗമേ കൃതഃ ।
ഉത്തരാം തു ദിശം രമ്യാം ഗിരിരാജസമാവൃതാമ് ॥ 4 ॥
പ്രതസ്ഥേ സഹസാ വീരോ ഹരിശ്ശതവലിസ്തദാ ।
പൂർവാം ദിശം പ്രതിയയൌ വിനതോ ഹരിയൂഥപഃ ॥ 5 ॥
താരാംഗദാദിസഹിതഃ പ്ലവംഗോ മാരുതാത്മജഃ ।
അഗത്യാചരിതാമാശാം ദക്ഷിണാം ഹരിയൂഥപഃ ॥ 6 ॥
പശ്ചിമാം തു ഭൃശം ഘോരാം സുഷേണഃ പ്ലവഗേശ്വരഃ ।
പ്രതസ്ഥേ ഹരിശാര്ദൂലോ ദിശം വരുണപാലിതാമ് ॥ 7 ॥
തതസ്സർവാ ദിശോ രാജാ ചോദയിത്വാ യഥാതഥമ് ।
കപിസേനാപതീന്മുഖ്യാന്മുമോദ സുഖിതസ്സുഖമ് ॥ 8 ॥
ഏവം സംബോധിതാസ്സർവേ രാജ്ഞാ വാനരയൂഥപാഃ ।
സ്വാം സ്വാം ദിശമഭിപ്രത്ത്യ ത്വരിതാ സംപ്രതസ്ഥിരേ ॥ 9 ॥
നദംതശ്ചോന്നദംതശ്ച ഗര്ജംതശ്ച പ്ലവംഗമാഃ ।
ക്ഷ്വേലംതോ ധാവമാനാശ്ച വിനദംതോ മഹാബലാഃ ॥ 10 ॥
ഏവം സംബോദിതാസ്സർവേ രാജ്ഞാ വാനരയൂഥപാഃ ।
ആനയിഷ്യാമഹേ സീതാം ഹനിഷ്യാമശ്ച രാവണമ് ॥ 11 ॥
അഹമേകോ ഹനിഷ്യാമി രാവണം പ്രാപ്തമാഹവേ ।
തതശ്ചോന്മഥ്യ സഹസാ ഹരിഷ്യേ ജനകാത്മജാമ് ॥ 12 ॥
വേപമാനാം ശ്രമേണാദ്യ ഭവദ്ഭിഃ സ്ഥീയതാമിതി ।
ഏക ഏവാഹരിഷ്യാമി പാതാലാദപി ജാനകീമ് ॥ 13 ॥
വധിഷ്യാമ്യഹം വൃക്ഷാന് ദാരയിഷ്യാമ്യഹം ഗിരീന് ।
ധരണീം ദാരയിഷ്യാമി ക്ഷോഭയിഷ്യാമി സാഗരാന് ॥ 14 ॥
അഹം യോജനസംഖ്യായാഃ പ്ലവിതാ നാത്ര സംശയഃ ।
ശതം യോജനസംഖ്യായാശ്ശതം സമധികം ഹ്യഹമ് ॥ 15 ॥
ഭൂതലേ സാഗരേ വാഽപി ശൈലേഷു ച വനേഷു ച ।
പാതാലസ്യാപി വാ മധ്യേ ന മമാച്ഛിദ്യതേ ഗതിഃ ॥ 16 ॥
ഇത്യേകൈകം തദാ തത്ര വാനരാ ബലദര്പിതാഃ ।
ഊചുശ്ച വചനം തത്ര ഹരിരാജസ്യ സന്നിധൌ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ പംചചത്വാരിംശസ്സര്ഗഃ ॥
