શ્રીમદ્વાલ્મીકીય રામાયણે કિષ્કિંધાકાંડમ્ ।
અથ પંચચત્વારિંશસ્સર્ગઃ ।
સર્વાંશ્ચાહૂય સુગ્રીવઃ પ્લવગાન્ પ્લવગર્ષભઃ ।
સમસ્તાનબ્રવીદ્ભૂયો રામકાર્યર્થસિદ્ધયે ॥ 1 ॥
એવમેતદ્વિચેતવ્યં યન્મયા પરિકીર્તિતમ્ ।
તદુગ્રશાસનં ભર્તુર્વિજ્ઞાય હરિપુંગવાઃ ॥ 2 ॥
શલભા ઇવ સંછાદ્ય મેદિનીં સંપ્રતસ્થિરે ।
રામઃ પ્રસ્રવણે તસ્મિન્યવસત્સહલક્ષ્મણઃ ॥ 3 ॥
પ્રતીક્ષમાણસ્તં માસં યસ્સીતાધિગમે કૃતઃ ।
ઉત્તરાં તુ દિશં રમ્યાં ગિરિરાજસમાવૃતામ્ ॥ 4 ॥
પ્રતસ્થે સહસા વીરો હરિશ્શતવલિસ્તદા ।
પૂર્વાં દિશં પ્રતિયયૌ વિનતો હરિયૂથપઃ ॥ 5 ॥
તારાંગદાદિસહિતઃ પ્લવંગો મારુતાત્મજઃ ।
અગત્યાચરિતામાશાં દક્ષિણાં હરિયૂથપઃ ॥ 6 ॥
પશ્ચિમાં તુ ભૃશં ઘોરાં સુષેણઃ પ્લવગેશ્વરઃ ।
પ્રતસ્થે હરિશાર્દૂલો દિશં વરુણપાલિતામ્ ॥ 7 ॥
તતસ્સર્વા દિશો રાજા ચોદયિત્વા યથાતથમ્ ।
કપિસેનાપતીન્મુખ્યાન્મુમોદ સુખિતસ્સુખમ્ ॥ 8 ॥
એવં સંબોધિતાસ્સર્વે રાજ્ઞા વાનરયૂથપાઃ ।
સ્વાં સ્વાં દિશમભિપ્રત્ત્ય ત્વરિતા સંપ્રતસ્થિરે ॥ 9 ॥
નદંતશ્ચોન્નદંતશ્ચ ગર્જંતશ્ચ પ્લવંગમાઃ ।
ક્ષ્વેલંતો ધાવમાનાશ્ચ વિનદંતો મહાબલાઃ ॥ 10 ॥
એવં સંબોદિતાસ્સર્વે રાજ્ઞા વાનરયૂથપાઃ ।
આનયિષ્યામહે સીતાં હનિષ્યામશ્ચ રાવણમ્ ॥ 11 ॥
અહમેકો હનિષ્યામિ રાવણં પ્રાપ્તમાહવે ।
તતશ્ચોન્મથ્ય સહસા હરિષ્યે જનકાત્મજામ્ ॥ 12 ॥
વેપમાનાં શ્રમેણાદ્ય ભવદ્ભિઃ સ્થીયતામિતિ ।
એક એવાહરિષ્યામિ પાતાલાદપિ જાનકીમ્ ॥ 13 ॥
વધિષ્યામ્યહં વૃક્ષાન્ દારયિષ્યામ્યહં ગિરીન્ ।
ધરણીં દારયિષ્યામિ ક્ષોભયિષ્યામિ સાગરાન્ ॥ 14 ॥
અહં યોજનસંખ્યાયાઃ પ્લવિતા નાત્ર સંશયઃ ।
શતં યોજનસંખ્યાયાશ્શતં સમધિકં હ્યહમ્ ॥ 15 ॥
ભૂતલે સાગરે વાઽપિ શૈલેષુ ચ વનેષુ ચ ।
પાતાલસ્યાપિ વા મધ્યે ન મમાચ્છિદ્યતે ગતિઃ ॥ 16 ॥
ઇત્યેકૈકં તદા તત્ર વાનરા બલદર્પિતાઃ ।
ઊચુશ્ચ વચનં તત્ર હરિરાજસ્ય સન્નિધૌ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે પંચચત્વારિંશસ્સર્ગઃ ॥
